Song Joong-ki, magkaka-baby na uli kay Katy Louise Saunders

ni Eli San Miguel @K-Buzz News | July 9, 2024

Inaasahan ng South Korean actor na si Song Joong-ki at ng kanyang asawang si Katy Louise Saunders ang kanilang pangalawang anak, ayon sa kumpirmasyon ng management label ni Song.

Kinumpirma ng ahensiya ni Song na HighZium Studio ang pagbubuntis ni Saunders sa isang maikling pahayag sa Korean media outlet na Sports Chosun nitong Lunes.

Gayunpaman, hindi nagbigay ng karagdagang detalye ang ahensiya kung gaano na katagal ang pagbubuntis ng asawa ng aktor. “Actor Song Joong Ki is becoming a father of two,” pahayag ng HighZium Studio.

Ikinasal ang dalawa noong Enero 2023 at nagkaroon ng panganay limang buwan pagkatapos. Unang ikinasal si Song Joong-ki sa award-winning actress at 'Full House' star na si Song Hye-kyo noong Oktubre 2017.

Naging kontrobersiyal naman ang kanilang divorce noong Hulyo 2019. Kilala ang aktor na si Song sa kanyang lead roles sa mga K-drama tulad ng "Descendants of the Sun," "Vincenzo," "Reborn Rich," at "Arthdal Chronicles."

Samantala, si Saunders ay isang British actress na kilala sa kanyang mga papel sa mga pelikulang "The Lizzie McGuire Movie" at "The Borgia."

‘Sweet Home 3’ ni Song Kang at Lee Jin-wook, ilalabas na sa Hulyo 19

ni Eli San Miguel @Entertainment News | July 8, 2024

Nakatakdang ilabas sa Hulyo 19 ang "Sweet Home 3" na pinagbibidahan nina Song Kang at Lee Jin-wook na umiikot ang kuwento tungkol sa huling paglalaban ng mga “humans, monsters, at neohumans.”

Magpopokus ang pinakabagong season sa isang ultimate showdown nina Hyun-su (Song Kang) at Sang-wook (Lee Jin-wook). Sa trailer na nagbigay ng pasulyap sa huling season, ipinakita si Hyun-su na nakipagtagpong muli kay Eun-hyeok (Lee Do-hyun) kung saan agad silang naglaban.

Nakita rin sa trailer ang iba pang mga karakter na sina Yi-kyung (Lee Si-young), Eun-yu (Ko Min-si), Chan-young (Jinyoung), Tak In-hwan (Yoo Oh-seong), Dr. Lim (Oh Jung-se), Kim Yeong-hu (Kim Moo-yeol), at Kid (Kim Sia) habang hinaharap ang mga pagsubok na dulot ng mga nakaraang pangyayari.

Batay sa isang webtoon na may parehong pamagat, ang unang season ng "Sweet Home" ay ipinalabas noong Disyembre 2020 habang ang ikalawang yugto nito ay inilabas matapos ang isang taon.

Ang Sweet Home ang unang South Korean series na pumasok sa Top 10 ng Netflix sa United States, at umabot pa hanggang sa ikatlong puwesto. Tatlong araw matapos ang paglabas nito, nanguna ang serye sa walong rehiyon at nasa Top 10 naman sa 42 rehiyon.

ENHYPEN, naglabas ng album preview para sa “Romance : Untold”

ni Eli San Miguel @Overseas News | July 5, 2024

Naglabas ang K-Pop boy band na ENHYPEN ng isang preview ng kanilang upcoming studio album na "Romance : Untold," na ilalabas sa Hulyo 12.

Ipinakita nila ang isang house party-themed album preview para sa opisyal na YouTube channel ng HYBE Labels, kung saan makikita ang mga miyembro na masayang nakikisabay sa bawat kanta mula sa album.

Mayroong walong kanta sa album na may natatanging genre ang bawat isa: "Moonstruck" (alternative R&B),"XO (Only If You Say Yes)" (pop), "Your Eyes Only" (soft synth-pop), "Hundred Broken Hearts" (alternative R&B), "Brought The Heat Back" (funk/dance pop), "Paranormal" (rock drum & bass), "Royalty" (modern pop), at "Highway 1009" (medium pop).

Ibibida sa bagong album ang mas pinaunlad na kakayahan sa musika ng grupo sa pamamagitan ng pagiging producer at lyricist. Ilalabas ang "Romance : Untold" dalawang taon at siyam na buwan matapos ang kanilang unang studio album na "Dimension : Dilemma."

Binubuo ang ENHYPEN ng pitong miyembro na sina Jungwon, Heeseung, Jay, Jake, Sunghoon, Sunoo, at Ni-ki. Sila ang pinakamabilis na K-Pop boy group na naging million seller kaya naman patok na patok din sila sa mga Pinoy K-Pop fans.