Wi Ha-jun ng ‘Squid Game,’ may fan meeting sa Manila

ni Eli San Miguel @K-Buzz | July 13, 2024

Photo: Wi Ha Jun / IG

Makakatanggap na naman ng good news ang mga Pinoy K-Wave fans dahil nakatakdang bumisita sa Manila ang “Squid Game” star na si Wi Ha-jun para sa isang fan meeting.

Isasagawa ng aktor ang kanyang fan meeting na may pamagat na "A Wively Day" sa Setyembre 15 sa New Frontier Theater.

Sumikat si Wi Ha-jun sa kanyang karakter bilang pulis na si Jun-ho sa "Squid Game" ng Netflix. Naging most-watched ang nasabing series sa buong mundo sa Netflix, na nakasungkit ng higit sa 142 milyong miyembro at 1.65 bilyong oras ng panonood sa unang apat na linggo nito.

Lumabas din siya sa mga pelikulang "Gonjiam: Haunted Asylum," "Shark: The Beginning," at "Midnight," pati na rin sa mga drama na "Something in the Rain," "Romance Is a Bonus Book," "18 Again," "Little Women," at "Worst of Evil."

Matatandaan na huling bumisita si Wi Ha-jun sa Pilipinas noong Mayo ng nakaraang taon.

Korean YouTuber na si Tzuyang, gustong perahan ng mga influencers, bina-blackmail

ni Angela Fernando @K-Buzz | July 11, 2024

Iniulat kamakailan sa isang Korean media na ang sikat na mukbang YouTuber na si Tzuyang ay naging target ng pangingikil o “blackmailing,” at napag-alamang ang grupong “Tow Truck Union” ang mga suspek.

Sa slang ng Korea, ang terminong “reg-ka,” na direct translation ay “tow truck,” ang alyas ng mga YouTube account na nagpapalaganap ng negatibong opinyon tungkol sa mga kilalang personalidad sa pamamagitan ng video content na nagbabahagi ng mga impormasyong walang basehan.

Binubuo ang nasabing union ng mga YouTuber nina Hwang Chul Soo, Gujeyeok, Crocodile, Gango, Carancula, Uhm Tae Woong, at iba pang mga personalidad na hindi pinangalanan.

Sinasabing ang union ay nangingikil ng milyun-milyong won mula kay Tzuyang at binabantaan ito gamit ang kanyang nakaraan. Lumabas sa isang voice recording mula sa isang tawag na direktang binabantaan ni Gujeyeok ang mga tauhan ni Tzuyang.

Ipinagyabang pa ni Gujeyeok na nakabili sila ng bagong GV80 na kotse gamit ang perang kinita nila sa ganitong paraan. Dagdag pa nila, si Tzuyang ay nagbibigay ng ₩6.00 million KRW (humigit-kumulang $4,340 USD) kada buwan sa mga babae na dati niyang kasamahan bilang hush money.

Ipinahayag din nilang hindi sila natatakot na mademanda, dahil maliit lamang ang danyos kumpara sa perang kinikita nila mula sa sikat na Youtuber. Kilala si Tzuyang na isang malaking mukbang YT channel na may 10-milyong subscribers sa buong mundo habang may 192k lang na tagasunod si Gujeyeok.

Jennie ng BLACKPINK, nagsisisi sa paghithit ng vape

ni Eli San Miguel @K-Buzz | July 10, 2024

Lubos na pinagsisisihan ng K-Pop superstar na si Jennie ng BLACKPINK ang kanyang paghithit ng vape sa Italy. Naglabas ng paumanhin nitong Martes ang kanyang management label na Odd Atelier Entertainment patungkol sa kanyang indoor na paggamit ng vape.

“We sincerely apologize to everyone who felt uncomfortable with Jennie’s actions in the content released on the 2nd,” saad sa pahayag. Dagdag nito, “Jennie acknowledges and deeply regrets her mistake of vaping indoors and causing inconvenience to the staff.

Jennie has personally apologized to all the staff on-site who may have been affected.” “We apologize to her fans who have been disappointed through this incident. We hope to prevent this from reoccurring in the future,” sabi pa sa paumanhin.

Noong Hulyo 2, ipinost ang isang video sa YouTube channel ng K-Pop superstar na nagpapakitang siya'y nasa Capri, Italy.

Sa video, ipinunto ng mga nagagalit na netizen na nakita nilang gumagamit ng vape si Jennie habang kasama ang kanyang mga staff, kaya naman agad itong naging kontrobersyal. Sa ngayon, burado na ang nasabing video clip.