Tips para ‘di ma-stress ang mga alagang hayop ngayong Summer

ni Mabel Vieron @Life & Style | April 30, 2024

Ngayong super init, maraming bagay ang kailangan nating ingatan at bantayan. Bukod sa madalas nangyayari ang sunog, mas mataas din ang kaso ng rabies sa ganitong panahon kung saan iritang-irita ang ating mga alagang hayop, partikular na ang mga aso at pusa.

Tuwing summer talaga maraming nakakalmot o nakakagat ng aso at pusa, kahit pa na sabihing alaga natin ito dahil marami sa mga ito ay aburido o wala sa tamang kondisyon kaya hindi dapat basta kulitin o harutin.

Kaugnay nito, narito ang ilan sa mga paraan upang mapanatiling kalmado at stress-free ang ating mga alagang hayop:

1. HUWAG KALIMUTAN PAINUMIN NG TUBIG. Tulad ng tao, kailangan din ng mga hayop na maging hydrated nang sa gayun hindi sila madaling mairita. Huwag kakalimutan na maglagay ng sapat na tubig o ice cube sa kanilang inumin upang matiyak natin na presko ang kanilang pakiramdam anumang oras. 

2. HUWAG KALIMUTANG MAKIPAG-BONDING. Ang mga alaga nating hayop ay parang tao rin na kailangan ng oras, kaya as a fur parents huwag natin kakalimutan na makipag-bonding sa kanila. Isa pa, magandang paraan ito para mapanatili ang kanilang magandang mood at attitude.

3. SIGURADUHING REGULAR ANG GROOMING. Bagama’t may kakayahang makapaglinis ng sariling katawan ang mga alaga nating hayop, kailangan pa rin natin na masiguro ang kanilang grooming, tulad ng regular na pagputol ng mga kuko, pagpapaligo, pag-trim ng balahibo at iba pa.

4. BANTAYAN ANG SINTOMAS NG HEAT STROKE. Hindi lamang tao ang maaaring makaranas ng heat stroke, kundi maging ang mga alaga nating hayop. Nangyayari ang heat stroke sa mga pet kapag naisawalambahala o hindi agad napansin ang mga senyales. Ang ilan sa mga sintomas nito ay sobrang pagkahingal, mabilis na tibok ng puso, pagsusuka o diarrhea, pagkawala ng malay at iba pa. Kapag napansin ang ilan sa mga sumusunod ay pumunta agad sa beterinaryo.

Natural lang na mairita o mawala sa mood ang mga pet. Kaya bilang pet owner, kailangan alam natin ang mga dapat gawin para ‘di rin sila ma-trigger. Oki? 

Tips para ‘di feeling lonely ang solo travel

ni Jersy L. Sanchez @Life & Style | May 14, 2023

Bakasyon season ngayon dahil perfect ang summer season para sulitin ang pagta-travel, kasama man natin ang ating friends o family, o solo travel.

Usung-uso ngayon ang solo travelling dahil bukod sa tipid ay malaya mong magagawa ang mga gusto mo. Pero for sure, may ilang hesitant na gawin ito dahil takot makisalamuha sa ibang tao o mag-explore, habang may mga game na game naman dahil magandang paraan ito para mas makilala ang sarili habang nasa isang bagong environment.

Pero ang tanong, hindi ba lonely ang solo traveling? Don’t worry dahil we got you, beshie!

Narito ang ilang tips para hindi ka feeling lonely at masulit ang iyong solo travel:

1. HOSTEL PARA SA ACCOMMODATION. Isa sa mga mahirap desisyunan ay ang accommodation, lalo na kung ikaw ay solo traveler. Bagama’t ang iba ay mas gustong mag-stay sa luxury hotel room, may iba namang oks na sa hostel kung kailangan lamang nila ng matutuluyan sa gabi at kung nagtitipid. Pero sa true lang, ang hostel stay ay magandang paraan para makakilala rin ng iba pang travelers na posibleng solo ring nagta-travel.

2. MAG-EXPLORE. Anumang klase ng accommodation ang in-avail mo – hotel o hostel – iwasang mag-stay lang dito buong araw. Lumabas at mag-explore kahit hindi ka pamilyar sa environment dahil sa ganitong paraan, hindi mo mararamdaman na mag-isa ka dahil sa mga lokal o sa mga kapwa mo traveler.

3. GUMAWA NG ITINERARY. Paano? Sa tulong ng social media, madali kang makakagawa ng itinerary sa pamamagitan ng mga local Facebook groups na may mga meet-up para sa mga tao na posibleng kapareho mo ng interes. Gayundin, puwedeng mag-search ng hashtag tungkol sa mga aktibidad na patok sa iyong destinasyon. Kung plano mong makipag-meet sa mga kapwa turista o lokal, paalala lang na mag-ingat sa pagbabahagi ng iyong mga impormasyon dahil in the end, hindi mo pa personal na kilala ang iyong mga mami-meet na tao.

4. ALONE TIME. Para sa iba, ang solo travel ay isang form of self-care dahil nagagawa nila ang mga gusto nila nang malaya. Bilang halimbawa, puwede mong i-treat ang iyong sarili sa isang mamahaling dinner para mas ma-feel mo ang iyong bakasyon at alam mong relaxed ka.

5. MAKIPAG-BONDING SA MGA LOKAL. Para sa iba, hindi madaling makisalamuha sa mga kapwa turista, pero ayon sa mga travel experts, ang pinakamagandang paraan para ma-experience ang isang lugar ay ang makipag-usap o makisama sa mga lokal. Paano? Simulan sa pamimili sa local stores at makipagtsikahan sa mga kapwa mamimili o sa may-ari ng tindahan.

6. MAG-INGAT. Sa lahat ng pagkakataon, solo travel man o may kasama ka, tiyaking alam ng iyong mga mahal sa buhay kung nasaan ka. Bago bumiyahe, puwede mong i-share sa loved ones mo ang iyong itinerary at panatilihing nakabukas ang live location ng iyong mobile phone. Gayundin, make sure na may dala kang battery pack o charger sa lahat ng pagkakataon. Puwede ring mag-download ng offline map na puwede mong ma-access anytime.

So, ano pa ang hinihintay mo, besh? Habang summer, make sure na lalabas ka sa iyong comfort zone at subukang mag-solo travel.

Maraming paraan para ma-enjoy ang iyong biyahe, pero bago ang lahat, planuhing mabuti ang iyong trip at tiyaking mako-contact ka ng iyong mga mahal sa buhay anytime.

Sana’y nakatulong ang mga tips na ito para sa iyong travel. Enjoy, ka-BULGAR!

7.3 lindol sa Sumatra Island; tsunami warning, itinaas

ni J. Sanchez | April 26, 2023

Niyanig ng magnitude 7.3 na lindol ang Sumatra Island sa Indonesia, kahapon nang alas-3:00 ng madaling-araw.

Dalawang oras matapos ang lindol, naglabas ng tsunami warning, na dahilan upang lumikas ang mga residente.

Ayon sa United States Geological Survey, ang epicenter ng lindol na naganap ay nasa dagat na malapit sa Mentawai islands.

Bagama’t, walang naitalang casualty, may ilang aftershocks na naranasan.

Samantala, madalas na nakakaranas ng paglindol ang Indonesia dahil ito ay nasa Pacific Ring of Fire, na seismically active zone kung saan iba’t ibang plates ng mga crust ng mundo ang nagsasalubong.