Biyahe ngayong Semana Santa, bantay-sarado

ni Jeff Tumbado | April 4, 2023

Tiniyak ng Land Transportation Franchising and Regulatory Board (LTFRB) na magiging maayos ang pagbiyahe ng publiko sa kanilang mga destinasyon ngayong Semana Santa.

Ayon kay LTFRB Chairman Teofilo Guadiz III, noong nakaraang linggo pa lamang ay ipinakalat na ng mga regional director ng LTFRB sa lahat ng regional office ang kanilang mga enforcer upang matiyak ang maayos at mahusay na daloy ng pasahero sa mga pampublikong terminal sa bansa.

Iginiit ni Chairman Guadiz na magsasagawa ng inspeksyon ang mga enforcer sa mga tsuper at konduktor upang siguraduhin na mananatiling alerto at maayos ang kanilang pag-iisip at katawan sa oras ng pamamasada sa pamamagitan ng pagsusuri kung nakainom ba ang mga ito ng alak o ipinagbabawal na droga.

Susuriin din ng mga enforcer ang mga public utility bus (PUB) upang masiguro na hindi ito kolorum at ligtas pa itong pumasada.

Titiyakin din ng mga enforcer na nasusunod ang mga umiiral na public health safety protocol sa loob ng pampublikong sasakyan dahil nananatiling nasa state of national public health emergency ang bansa.

Naglabas na rin ang LTFRB ng Special Permits para sa 743 units upang matiyak na mayroong sapat na PUB na magsisilbi sa mga pasaherong pupunta sa kani-kanilang probinsya.

Ferry boat nasunog, 29 patay

ni Jeff Tumbado | March 31, 2023

Tinatayang nasa 29 indibidwal ang kumpirmadong namatay sa pagkasunog ng isang pampasaherong barko sa karagatang sakop ng Basilan nitong Miyerkules ng gabi.

Ayon kay Philippine Coast Guard (PCG) District BARMM Commander Commodore Rejard Marfe, kabilang sa nakita ang mga labi ng 18 biktima sa loob ng nasunog na MV Lady Mary Joy 3.

Nasa sampu naman ang naunang naitalang nasawi na nalunod matapos tumalon mula sa nasusunog na barko.

“As of now, continuous ‘yung pag-search natin sa barko para makita natin kung meron pang cadavers na madi-discover,” pahayag ni Marfe.

“Nalunod 'yung sampu. Ito ‘yung tumalon na walang lifejacket and nalunod,” dagdag ni Marfe.

Sinabi ni Marfe, nasa 230 ang nakaligtas sa trahedya kasama ang mga crew ng barko habang 9 sa mga nakaligtas ang nagtamo ng sugat at kinailangang dalhin sa pagamutan.

Samantala, batay naman sa nakuhang impormasyon ni Basilan Gov. Hadjiman Hataman-Saliman, galing sa Zamboanga City ang MV Lady Mary Joy 3, at papunta sa Sulu nang masunog ito.

Idinagdag niya na batay sa kuwento ng ilang nakaligtas, natutulog sila nang mangyari ang sunog alas-11 ng gabi nang Miyerkules.

Idineklarang naapula ang sunog sa ferry boat alas-7:30 ng umaga ng Huwebes.

Ayon sa imbestigasyon, sinabi umano ng kapitan ng barko na dinala niya ang sasakyan sa Baluk-Maluk Island sa Hadji Muhtamad nang magkaroon ng sunog, para maisalba ang mga pasahero.

Pinaniniwalaan na nagmula sa accommodation area sa second deck ng barko ang sunog.

Hindi naman umano overloaded ang barko na 430-katao ang kapasidad at 205 lang ang pasahero at may 35 crew nang mangyari ang sunog.

Wala ring ulat ng oil spill mula sa barko, ayon sa PCG.

Sa isang pahayag, nagpaabot naman ng pakikiramay si Basilan Rep. Mujiv Hataman sa mga kaanak ng mga nasawi.

Patuloy umano ang isinasagawang paghahanap sa mga posibleng nakaligtas sa trahedya, at maging sa labi ng mga nasawi.

Nakikipag-ugnayan din umano ang tanggapan ng kongresista sa Department of Social Welfare and Development para mabigyan pa ng karagdagang tulong pinansiyal ang mga nakaligtas para sa kanilang gastusin.

"Nakikipag-usap din kami sa mga awtoridad at mga opisyal ng lokal na pamahalaan upang siyasatin kung ano ang puwedeng gawin para maiwasan ang mga ganitong insidente," ani Hataman.

2 todas sa pinulutang palaka

ni Jeff Tumbado | March 25, 2023

Utas ang dalawang indibidwal makaraang mamulutan ng palaka sa Bgy. Camaya, Bataan kamakalawa.

Namatay habang nagpapagamot sa Mariveles District Hospital (MDH) ang mga biktima na sina Dennis Zarate, 37, at Charlie Caballero, 28, ilang oras nang sila’y isugod sa nabanggit na gusali.

Napag-alaman sa ulat ng Mariveles Municipal Police Station na hapon ng Huwebes nang mangyari ang insidente sa bahay ni Caballero sa nasabing lugar kung saan ay naghanda ang mga ito sa kanilang inuman.

Sinasabing nagluto ang mga biktima ng adobong palaka na kanilang pulutan.

Maya-maya pa umano ay nakaranas ng sobrang pananakit ng tiyan ang dalawa at tuluyang nag-collapse.

Sa naturang ospital binawian ng buhay ang mga biktima dahil sa cardiac arrest.

Sa pagsusuri ng mga doktor, napag-alamang hindi palakang bukid ang kanilang pinulutan kundi uri ng “palakang-tubo”.

Ayon sa impormasyon mula sa mga eksperto, ang palakang-tubo, na kalimitang nakikita sa mga tubuhan o sugar cane plantation, ay may lason na taglay at hindi dapat ito kinakain ng mga tao dahil sa panganib sa kalusugan at buhay.