Gen. Acorda, bagong PNP Chief

ni Jeff Tumbado | March 25, 2023

Itinalaga bilang bagong hepe ng pambansang pulisya si Police Major General Benjamin Acorda, Jr. kapalit ng nagretirong si Police General Rodolfo Azurin, Jr.

Si Acorda ang ika-29 na hepe ng Philippine National Police (PNP).

Batay ito sa General Order na pirmado ni Police Major General Robert Rodriguez, director ng Personnel and Records Management.

Si Acorda ay miyembro ng Philippine Military Academy (PMA) Sambisig Class of 1991.

Bago maitalaga sa puwesto, si Acorda ay nanungkulan bilang Intelligence Director ng PNP.

Nagsilbi rin si Acorda bilang Regional Director ng Police Regional Office (PRO) 10, Director ng PNP Integrity Monitoring and Enforcement Group (IMEG) at iba pang posisyon sa pulisya.

Si Acorda ay magsisilbing hepe ng PNP sa loob ng 8 buwan hanggang sa magretiro sa Disyembre 2023.

Samantala, tinawagan ng pansin ni Pangulong Ferdinand Marcos, Jr. si Acorda na palaging ipatupad ang “maximum tolerance” pagdating sa mga kritisismo laban sa organisasyon.

Dumalo si Marcos sa change of command ceremony ng PNP na idinaos sa Camp Crame kahapon.

Sa naging talumpati ng Pangulo, inatasan nito si Acorda na tiyakin na ang police force ay magiging bukas sa public scrutiny sa ilalim ng kanyang liderato.

Inatasan din niya si Acorda na tiyakin na mararamdaman ng publiko ang presensiya ng kapulisan sa kalsada kasabay din sa pagbibigay proteksyon sa mga vulnerable sector, kabilang na ang media at civil action groups.

Plastic card, paubos na — LTO.. Lisensya, naka-print lang sa papel

ni Jeff Tumbado | April 21, 2023

Papayagan ng Land Transportation Office (LTO) na magamit bilang pansamantalang driver’s license ang Official Receipt (OR) o ang resibo na ibinibigay kapag kumukuha ng lisensya ng pagmamaneho.

Ang hakbang na ito ng LTO ay sa harap ng inaasahang kakulangan ng suplay ng plastic card na ginagamit sa paggawa ng driver's license.

Sa ilalim ng Memorandum na ipinalabas ng LTO, inaatasan ang mga regional at district office na sakaling maubos na ang suplay ng plastic card para sa driver's license ay gagamitin muna ang Official Receipt bilang “Temporary Driver’s License”.

Ang OR ay kailangang may kumpletong detalye, unique na QR code, at may mga screenshot ng harap at likod ng driver’s license card.

Inaatasan din ang mga regional director ng LTO na magkaroon ng re-allocation ng suplay ng plastic card sa kanilang mga nasasakupan kung kinakailangan.

Batay sa pinakahuling datos ng LTO, nasa 147,522 na lamang ang plastic cards na magagamit sa pag-iimprenta ng driver’s license na posibleng abutin na lang ng katapusan ng kasalukuyang buwan.

“Kaya po agad na rin pong gumawa ng hakbang ang LTO para matugunan ang inaasahang kakapusan na ito. Nakipagpulong na rin ang LTO sa mga law enforcer tulad ng PNP Highway Patrol Group upang maipabatid sa kanila na kung manghuhuli ng mga lumalabag sa batas-trapiko ay tanggapin na rin kung OR lamang ang ipapakita ng motorista,” ayon kay LTO Chief Tugade.

Mananatili ang panuntunan na ito hangga’t hindi nakakapag-imprenta ng plastic na driver’s license card.

Sa ngayon, hinihintay pa ng LTO na matapos ang proseso ng procurement ng plastic cards na pinangangasiwaan ng Department of Transportation (DOTr).

221 pulis, sibak sa ‘Degamo killing’

ni Jeff Tumbado | April 19, 2023

Nasa kabuuang 221 police personnel mula sa Police Regional Office 7 (PRO7) ang tinanggal sa pwesto kaugnay sa nangyaring pagpaslang kay Negros Oriental Governor Roel Degamo noong Marso 4.

Ito ang kinumpirma ni PRO7 Deputy Regional Director for Operations Police Col. Noel Flores kung saan humalili sa mga inalis ay ang mga tauhan ng Regional Mobile Force Battalion (RMFB).

“I want to inform the body that 221 personnel from Basay, Bayawan, Sta. Catalina, and Villa Hermosa have been already relieved,” pahayag ni Flores.

Ang pagsibak umano sa buong pwersa ng police personnel sa apat na bayan sa Negros Oriental ay alinsunod sa kautusan ni Interior Sec. Benhur Abalos.

Ang hakbang ng kalihim ay base naman sa mga naging testigo sa krimen na kung saan ay tinukoy ng mga ito na ilan sa mga naging spotter para sa mga salarin ay pawang mga pulis.

Karamihan sa mga itinuturong pulis ay kasalukuyan pang nasa probinsya.

Agad na ring ipinag-utos ni PNP Deputy Chief for Administration Police Lt. General Rhodel Sermonia ang mabilis na pagtukoy sa mga pulis na nagsisilbing spotter upang agad isailalim sa kostudiya at kasuhan kung mapatunayan.