Kabataan nagrambulan.. Lato-lato, ipagbabawal sa QC

ni Jeff Tumbado | June 20, 2023

Nakatakdang ipagbawal na ang larong lato-lato sa isang barangay sa Quezon City.

Ito ay kasunod ng nangyaring rambulan ng mga menor-de-edad sa Bgy. Holy Spirit nitong Sabado dahil nagkapikunan.

Ayon kay Barangay Chairwoman Lydia Ballesteros, bago naganap ang insidente ay isang grupo ng mga bata na nasa edad 10 hanggang 15 na kalalakihan ang nakitang nagtitipon sa isang kanto at nagpapasiklaban umano sa lato-lato.

Maya-maya pa ay isang bata ang tumawid ng kalsada at itinulak ang isa pang naglalaro, hanggang mauwi sa rambulan na sinalihan ng ibang kabataan.

Ayon pa sa opisyal, wala umanong nagtungo sa kanilang Barangay para maghain ng report.

Sa kanilang pag-iimbestiga, wala naman umanong lubhang nasaktan sa kaguluhan at mismong mga magulang ng mga nasangkot na bata ay hindi na interesado na magreklamo.

Sa mga pangyayari ay plano ni Ballesteros na tuluyan nang ipagbawal ang lato-lato sa kanilang barangay upang maiwasan na ang kahalintulad na insidente ng kaguluhan.

Metro Manila, niyanig.. 6.3 Lindol sa Batangas

ni Jeff Tumbado | June 16, 2023

Isang magnitude 6.3 na lindol ang yumanig sa lalawigan ng Batangas at malaking bahagi ng Luzon region kahapon.

Batay sa tala ng Philippine Institute of Volcanology and Seismology (Phivolcs), naganap ang lindol na tectonic ang pinagmulan alas-10:15 ng umaga ng Huwebes, Hunyo 15, kung saan namataan ang epicenter nito 15 kilometro ang layo sa timog-kanluran ng Calatagan, Batangas, na may lalim na 119 kilometro.

Ayon kay Erlington Olavere, seismic and earthquake specialist ng Philvolcs, nang dahil sa lalim ng origin ng pag-uga ng lupa ay ramdam ang pagyanig sa matataas na gusali.

"Normally, mas ramdam ito sa mga high-rise at saka mga medium-rise buildings, ‘yung mga nasa upper floor. So, sila ‘yung medyo mas makakaramdam against doon sa mga nasa ground floor," ani Olavere.

Naramdaman ang Intensity IV sa ilang parte ng National Capital Region (NCR) partikular sa Maynila, Mandaluyong City, Valenzuela City, Quezon City at Region 3 sa Bulacan, Region 4A sa Batangas, Cavite, Tagaytay at Rizal.

Intensity III naman sa Pateros, Las Pinas City, Makati City, Marikina City, Paranaque City, Pasig, Obando, Bulacan; Laurel, Batangas; Bacoor City at Imus, Cavite; San Pablo City; at San Pedro, Laguna at San Mateo, Rizal.

Naiulat din ang Intensity II sa Caloocan City; San Juan City; Muntinlupa City; San Fernando, La Union; Alaminos at Bolinao, Pangasinan; Santa Maria, Bulacan; Tarlac; Bamban, Tarlac at intensity I naman sa San Jose Del Monte, Bulacan.

Agad na sinuspinde ng Department of Transportation ang lahat ng operasyon sa Metro Rail Transit (MRT) at Light Rail Transit (LRT) at pinatigil ang lahat ng tren sa pinakamalapit na terminal.

Taas-singil sa kuryente sa Mayo

ni Jeff Tumbado | April 27, 2023

Dahil sa nararanasang tindi ng init ng panahon, nakaambang magtaas sa singil sa kuryente ang Manila Electric Company (Meralco) sa Mayo.

Hahataw ang konsumo sa kuryente sa buong bansa bunsod ng panahon ng tag-init na dahilan para sumipa nang todo ang presyo ng kuryente sa wholesale electricity spot market (WESM).

Ang WESM ay mistulang palengke na binibilhan ng kuryente ng mga kooperatiba o utility gaya ng Meralco.

Higit P1 ang itinaas sa presyo ngayong Abril kumpara noong Marso sa Luzon.

"We attribute it to the na-experience natin na parang heat wave, 'yung na-experience natin in the last two weeks, d'yan humahataw ang mga cooling system sa Pilipinas," ani Independent Electricity Market Operator of the Philippines spokesperson Isidro Cacho.

Batay sa projections, lalo pang titindi ang konsumo sa kuryente dahil Mayo pa ang inaasahang peak demand, kaya puwedeng manatiling mahal ang kuryente sa spot market hanggang sa mga susunod na buwan.

Noong nakaraang buwan, nasa 32 porsyento ng supply ng Meralco ang binili sa WESM kaya kung malaking supply ang galing sa merkado, mararamdaman ito sa bill ng mga konsyumer.