Robredo at Duterte most searched presidential at vice presidential candidates – Google Trends

ni Jasmin Joy Evangelista | April 7, 2022

Si Vice President Leni Robredo ang most searched sa mga presidential candidates, habang si Davao City Mayor Sara Duterte-Carpio naman ang most searched sa vice-presidential candidates, ayon sa Google Trends nitong Miyerkules.

Nanatili si Robredo sa top spot sa nakalipas na linggo na may 41 percent, malayo sa kanyang closest rival, former Sen. Ferdinand Marcos Jr. na may 29 percent.

Nasa ikatlong puwesto naman si Sen. Manny Pacquiao na may 14 percent, na sinundan ni Manila Mayor Isko Moreno sa ikaapat na may 12 percent, at Sen. Panfilo Lacson sa ikalimang puwesto na may 4 percent.

Batay sa comparison chart ng searches kina Robredo, Marcos, at Moreno, makikitang nanguna pa rin si Robredo pagdating sa interest over time — kung saan inilalarawan ng Google Trends kung gaano kasikat ang search term para sa isang specific period.

Batay sa sukatan nito, ang term na magkakaroon ng score na 100 ay nangangahulugang naabot nito ang peak ng popularity habang ang score na 50 ay nangangahulugang hindi gaanong popular.

Mula March 30 hanggang April 6, nakakuha si Robredo ng average score na 59, habang si Marcos ay nakakuha ng 41. Si Moreno naman ay may average score na 17.

Batay sa datos ng tatlong kandidato, ipinakita ng Google Trends na nakuha ni Robredo ang pinakamalaking search interest sa Bicol Region na may 63 percent kumpara kay Marcos na may 27 percent at Moreno na may 10 percent.

Mas mataas din ang nakuhang score ni Robredo kumpara kina Marcos at Moreno sa Calabarzon (54 percent to 33 percent to 13 percent); Metro Manila (52-32-16), at iba pang lugar.

Sa Ilocos Region na kinokonsiderang balwarte ni Marcos ay nanguna rin si Robredo na may 48 percent habang si Marcos ay nasa 40 percent lamang.

Si Marcos naman ay umangat kay Robredo sa Bangsamoro Region (50 percent to 32 percent); Davao Region (46 to 41); Caraga (45 to 44); at Northern Mindanao (44 to 42).

Hindi ito ang unang Google Trends na nagpakita na si Robredo ay lumamang kay Marcos: Noong Marso, nakakuha si Robredo ng 38 percent share kumpara sa 28 percent ng dating senador.

Isko: ‘Pag nanalo pula o dilaw, magkaka-coup d’état; kung gusto n’yo ng peace of mind,iboto n’yo ako

ni Jasmin Joy Evangelista | April 7, 2022

“Kung gusto ninyo ng peace of mind, iboto ninyo ako.” Inihayag ni presidential candidate Francisco “Isko Moreno” Domagoso nitong Miyerkules na posibleng magkaroon ng coup d’état kung mananalo sa May 9 polls ang “pula” o “dilaw” – at ipinresinta ang kanyang sarili bilang “the alternative.”

“Its time to heal, time to move forward, walang nang awayan sa politika. Kasi talagang ‘pag nagpatuloy ang away n’yan, ‘pag nanalo ang isa, ikukudeta ng isa. ‘Pag nanalo ‘yung isa, ikukudeta ng isa. Aawayin ng isa, aawayin. Hindi na matitigil,” pahayag niya sa ambush interview sa Pagadian City, Zamboanga del Sur .

“Kung gusto ninyo ng peace of mind, iboto ninyo ako. Kasi pansin ko painit nang painit ang away ng pula at dilaw. Personalan na. Talagang medyo nagkakapersonalan na. Talagang medyo nagkakapersonalan na. Kaya ako ang paniwala ko, hindi ito matitigil kapag isa sa kanila. Magbabawian pa din, maghihigantihan pa din. “Para bang sila tumatakbo kasi gusto lang nila tumakbo para talunin ‘yung isa, ‘yung isang political clan laban sa kabilang political clan,” pahayag pa ni Moreno.

Para sa Semana Santa… LTFRB naka-heightened alert na mula April 8

ni Jasmin Joy Evangelista | April 7, 2022

Inanunsiyo ng Land Transportation Franchising and Regulatory Board (LTFRB) nitong Miyerkules na naka- “heightened alert” na sila mula April 8, para sa Semana Santa at summer season.

Ayon sa LTFRB, naka-“heightened alert” sila hanggang April 18, 2022, bilang pagtalima sa direktiba ng Department of Transportation: “Oplan Biyaheng Ayos: Summer Vacation 2022.”

Kaugnay nito, ipinag-utos ni LTFRB Chairman Martin Delgra III sa lahat ng agency leaders na siguruhin ang safety at security ng lahat ng pasahero at pagsunod ng mga Bus Terminals sa guidelines ng LTFRB, kung saan inaasahan ang mabigat na daloy ng trapiko dahil sa Semana Santa.

Magsasagawa rin ng random inspections ang LTFRB sa mga bus upang matiyak ang “road worthiness” at kaligtasan ng mga commuter.

Sinabi rin ng LTFRB na maaaring pumunta ang mga pasaherong pauwi ng probinsiya sa mga sumusunod na terminal sa Metro Manila: Parañaque Integrated Terminal Exchange (PITX), Santa Rosa Integrated Terminal (SRIT), North Luzon Expressway Terminal (NLET), at Araneta Center Terminal.

Ang mga pribadong terminal naman sa Metro Manila ay maaaring ma-access ng bus operators mula 10 p.m. hanggang 5 a.m. base sa “window scheme” na ipinatutupad ng Metropolitan Manila Development Authority.

“Maglalagay din ng mga Malasakit Help Desk na maaaring pagtanungan o pagsumbungan ng mga mananakay,” ani LTFRB.

“Ipoposte ang mga Malasakit Help Desk sa mga naitalagang Integrated Terminal Exchange na nauna nang nabanggit at sa mga lugar malapit sa mga pribadong terminals,” dagdag pa nito.