ni Janiz Navida @Showbiz Special | Feb. 24, 2025
Photo: Letter to Mark - Circulated
Kumakalat ngayon sa social media ang isang sulat na diumano'y napulot ng waiter ng Dapo Resto sa QC matapos ang ginawang media launch ng single ng The Revival King na si Jojo Mendrez nu'ng Martes.
Palaisipan sa mga netizens kung sino ang "Bebe" na tinutukoy sa sulat kung saan mababasa sa dulo na ang nagsulat ay may pangalang "Jojo".
Mababasa naman sa nilalaman ng sulat ang: "Please 'wag ka ng magsayaw sa gay bar hindi kasi maganda para sa yo. Take care always. Nandito lang ako."
Kapansin-pansin na ang mga katagang “Nandito lang ako” ay title ng latest single ni Jojo Mendrez.
Matatandaan namang naging viral din kamakailan ang picture na magkasama sina Jojo Mendrez at Mark Herras sa isang hotel casino, na nasundan pa ng sorpresang pagdating ng aktor sa media launch ng Nandito Lang Ako single ng The Revival King sa Dapo Resto kung saan binigyan ni Mark si Jojo ng bouquet ng bulaklak.
Ang tanong ng mga netizens, para nga kaya kay Mark Herras — na naging kontrobersiyal din ang pagsasayaw sa gay bar kamakailan — ang naturang sulat?
Well, bukas ang aming kolum sa paglilinaw ng magkabilang kampo.
Ipinalit kay VG Mark na doktor, ‘di tumagal ng 1 year… KRIS, UMAMING SINGLE ULI
SINGLE na naman pala uli si Kris Aquino at ini-announce niya ito sa mahaba niyang Instagram post kahapon kasabay ng pagbibigay ng update sa kanyang kalusugan.
Sa umpisa ng IG post ay may mga hugot si Kris na:
“Yesterday's a closing door
You don't live there anymore
Say goodbye to where you've been
And tell your heart to beat again
“Let every heartbreak
And every scar
Be a picture that reminds you
Who has carried you this far
‘Cause love sees farther than you ever could
In this moment heaven's working
Everything for your good”
At sa bandang dulo ng kanyang post, mababasa naman ang “I've always been honest with all of you, for some time now I have been single, no boyfriend so clearly no fiance. I never gave details while we were a couple so it makes no sense to elaborate now.”
Kung matatandaan, June, 2024 lang nang aminin ni Kris na isang doktor niya rito sa ‘Pinas ang bagong nagbibigay ng inspirasyon sa kanya matapos nga ang naging relasyon nila ni Batangas Vice-Gov. Mark Leviste.
So, wala pang 1 year tumagal ang last BF ni Kris?
Ang pagpasok pala sa pulitika at pagtakbo bilang konsehal sa Dasmariñas, Cavite ang dahilan ng pagkawala ng karakter ni Neil Coleta sa serye ni Coco Martin na FPJ’s Batang Quiapo.
Nakatsikahan namin recently si Neil kasama ang mga kagrupo niya na tinawag na F4 o Fantastic Four ng Dasmariñas na sina Tutuy Perez, Arnel del Rosario at Vlad Maliksi, kung saan pare-pareho silang tumatakbo bilang mga independent candidates sa pagka-konsehal.
Si Neil daw ang nakaisip ng itatawag sa kanila at napag-usapan nilang mas magandang magsama-sama sila para mas mapadali ang pagkampanya at pagpapakilala sa mga residente ng Dasma lalo't sikat ang F4 at napag-usapan nga uli dahil sa pagkamatay ni Barbie Hsu na leading lady ng F4 sa Meteor Garden kamakailan.
Maayos naman daw na nagpaalam si Neil kay Coco na kakandidato siya at bigyan muna ng time para sa kampanya at nangako naman daw si Coco na puwede pang makabalik ang karakter niya sa BQ after ng eleksiyon.
Suportado rin siya ni Coco sa kanyang pagtakbo kung saan turismo ang gusto niyang isulong at balak ngang dalhin sa Paru-Paro Festival sa Dasma ang mga kaibigang artista tulad nina Coco Martin, Daniel Padilla, Kathryn Bernardo at marami pang iba basta available raw ang mga ito.
Nagpasabi na rin daw siya kay Daniel kung puwede siyang maikampanya sa Dasma pero naiintindihan niya kung sakaling walang time ang kumpare dahil busy naman ito sa taping ng Incognito.
First time ni Neil na sumabak sa pulitika. Matagal na raw siyang inaalok na tumakbong kagawad at kapitan pero busy siya noon at ayaw naman daw niyang mauupo siya sa puwesto pero ‘di naman niya matututukan.
Ngayon daw ang right timing dahil naramdaman niyang handa na siya at umaasa siyang pagkakatiwalaan ng mga kababayan sa Dasma lalo't marami siyang plano sa turismo sa kanilang lugar.
May kani-kanya ring advocacy at plataporma ang tatlo pang kasama ni Neil sa F4 na sina Tutuy (magpopokus sa sports), Arnel (livelihood) at Vlad (mental health) at ang bongga nila, may billboard lang naman sila sa Dasma!
Samantala, may asawa't dalawang anak na pala ngayon si Neil Coleta. Dating Wowowin dancer ni Willie Revillame ang napangasawa niya at happy family man daw siya.
