519-k mananakay kada araw, makikinabang sa M. MLA Subway

ni Atty. Rodge Gutierrez @Mr. 1-Rider | Enero 24, 2023

Sa pagpasok pa lamang ng taon, sinalubong tayo ng napakalaking problema nang magkaroon ng aberya sa Ninoy Aquino International Airport (NAIA), na kahit ipinatawag na sa Senado ang mga responsable sa pangyayari ay tila wala namang nangyari.

Wala namang napiga ang Senado dahil sa usaping teknikal ang napadpad ang imbestigasyon at ang masaklap, naulit ang kahalintulad na pangyayari nito lamang nakaraang linggo at mahigit sa tatlong libong pasahero na naman ang naapektuhan.

Hindi pa natin alam kung ano na ang direksyong tinatahak ng mga pangyayaring ito kung may mga ulo bang gugulong para papanagutin sa naturang pangyayari o mababaon na lamang ito sa limot tulad ng ibang aberya sa pamahalaan.

Gayunman, dapat nating panghawakan ang anunsiyo ng pamahalaan na itutuloy umano ang malalaking proyekto na iniwan ng nakaraang administrasyon, partikular ang pagtuon sa pampublikong transportasyon.

Isa na rito ang Metro Manila Subway project na pinasinayaan na ni Pangulong Ferdinand Bongbong Marcos Jr. (P-BBM) ang tunnel boring machine na gagamitin sa Metro Manila subway construction at hudyat na ito ng drilling operations sa Valenzuela City.

Natural na posible munang magdulot ng pagsisikip ng daloy ng trapiko dahil aabutin ng ilang taon bago makumpleto ang naturang proyekto kaya maging si P-BBM ay umaapela na sa publiko ng mahabang pasensya.

Ang 33.1 kilometro na Metro Manila subway ay magmumula sa Valenzuela City at magtatapos sa Parañaque City, na ayon sa Department of Transportation (DOTr) ay nasa 519,000 pasahero araw-araw ang makikinabang sa itatayong 17 istasyon.

Noong Enero 9, 2023 ay nagsimula nang umandar ang tunnel boring machine sa bahagi ng Valenzuela, na siyang bubutas sa gagawing tunnel ng Metro Manila Subway Project (MMSP) na kauna-unahang subway sa Pilipinas.

Indikasyon na ang naturang launching ng tunnel boring machine na handa ang pamahalaang ito na ipagpatuloy ang mga naantalang proyekto ng nakaraang administrasyon, lalo na sa kapakanan ng mga biyahero sa bansa.

Ang simula nang pagbubutas ng tunnel sa Valenzuela City ay kasama sa Contract Package (CP) 101 ng MMSP— nakapaloob dito ang pagtatayo ng MMSP Depot at Philippine Railway Institute sa Valenzuela City.

Tatlong underground stations sa Quezon City (Quirino Highway, Tandang Sora & North Ave), semi-underground station ng Valenzuela City depot at anim na tunnel na magdudugtong sa mga ito. Anim na TBM ang gagamitin para sa excavation ng mga tunnels ng CP 101.

Ang mga TBM ay mas mabilis, epektibo at ligtas na gamit para sa paghuhukay sa lupa at paglatag ng mga tunnels dahil may kakayahan itong maghukay ng iba’t ibang klase ng lupa tulad ng matitigas na bato o buhangin.

May kabuuang 25 TBM ang nakahandang gamitin para mabilis na maisakatuparan hanggang sa matapos ang Metro Manila subway na ito, na ngayon pa lamang ay excited na ang marami nating kababayan.

Kasabay nito ay itatayo na rin ang state-of-the-art at modernong Philippine Railway Institute (PRI), ito ang kauna-unahang railways training institute na magsisilbing planning, implementing, at regulatory agency para sa human resources development, at research and training center sa ating railway sector.

Ang mga pasahero mula sa walong siyudad ang direktang makikinabang sa Metro Manila Subway na daraanan nito mula sa Valenzuela City hanggang FTI-Parañaque City, at may sanga patungong NAIA Terminal 3, Pasay City.

Libu-libong kababayan natin ang tiyak na mabibigyan ng trabaho sa proyektong ito mula sa pagsisimula ng konstruksiyon hanggang sa matapos at magsimula ang operasyon ng inaabangang subway na ito.

Higit sa lahat, maihahanay na ang ating bansa sa mauunlad na bansa na may mga underground mass transport, na kitang-kita naman natin kung gaano kalaki ang magiging benepisyo nito para sa mga mananakay.

Karangalan din natin bilang isang Pilipino ang proyektong ito, na sana lang ay hindi na magkaaberya tulad ng nangyari sa NAIA kamakailan.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Operatiba ng MMDA pasimuno sa kolorum, LTO, LTFRB, I-ACT, dapat mag-sample para hindi madamay

ni Atty. Rodge Gutierrez @Mr. 1-Rider | Enero 24, 2023

Mula noon hanggang ngayon ay santambak pa rin ang ‘kotong enforcer’ sa tauhan ng Metro Manila Development Authority (MMDA) na daig pa ang kalawang na siyang sumisira sa magandang intensyon ng ahensya.

Santambak ang media at vlogger na palaging nakabuntot sa operasyon ng mga operatiba ng MMDA, ngunit tila nakakaligtaan nilang hindi lang iilan kung hindi napakaraming enforcer ang nakikinabang sa operasyon ng kolorum sa kanilang nasasakupan.

Tinalakay natin ang problemang ito sa dami ng sumbong na ating natatanggap na may ilang asosasyon ng kolorum na van na bumibiyahe sa EDSA ang sila na mismo ang nagmamanipula sa ilang opisyal ng traffic enforcer ng MMDA kung sino ang padaraanin sa EDSA at kung sino ang hindi.

May isang ‘babaeng maliit’ na sadyang hindi muna natin inilathala ang pangalan ngunit binansagang ‘Gasul’ dahil bahagya lamang umanong tumaas sa tangke ng gasul, na namumuno ng ilang samahan ng mga van na sigang-siga ang dating dahil sa kanya tumatanggap ng lingguhang suhol ang mga tiwaling enforcer ng MMDA.

Hindi lang MMDA ang tumatanggap ng lingguhang lagay dahil maging ang ilang operatiba ng Land Transportation Office (LTO), InterAgency Council for Traffic (I-ACT) at ilan sa mismong operatiba ng Land Transportation Franchising Regulatory Board (LTFRB) ay tumatanggap din kaya malaya ang mga kolorum na van sa EDSA.

Naniniwala naman tayong ilan lang naman ang mga tiwaling operatiba, kaya lang ay nadaramay ang kani-kanilang ahensya at hindi maiiwasang mag-isip ng ating mga kababayan na hanggang katas-taasan ay tumatanggap ng lagay dahil lantaran ang pagdaan ng van na kolorum.

Libu-libo ang mga van na isang dahilan kaya nagsisikip ang EDSA na mula sa iba’t ibang lalawigan, naiisip n’yo ba kung magkano ang kinikita ng mga enforcer na nakahambalang sa EDSA?

Huwag na nating halukayin ang mga nasa malalayo, busisiin na lang natin itong itong terminal sa Balibago Complex sa Sta. Rosa, Laguna na pinamumugaran ng legal at kolorum na van na pawang bumibiyahe mula Balibago patungong Crossing na pumaparada sa Starmall sa Mandaluyong City.

Sa Balibago pa lamang ay puro ilegal na ang terminal at kamakailan lamang ay may napaulat na operator ng van ang namatay dahil nabaril ng mga katunggali sa agawan sa terminal na pinamumugaran ng mga kolorum, kaya panahon na para linisin ang lugar na ito.

May ilang van na tila legal dahil pinayagan silang maging Premium Taxi na dapat hanggang pitong pasahero lamang ang sakay ngunit nagiging illegal dahil ginagamit nila ito sa pangungulorum na umaabot sa 18 pasahero kada biyahe ang sakay.

Ang masaklap, may sarili silang patakaran sa pagsingil ng pasahero, dahil kolorum nga ay walang kumukontrol, kaya sumisingil sila ng P200 bawat pasahero mula Balibago patungong Crossing dahil nagbibigay nga sila ng ‘lagay’ para makadaan sa EDSA.

Ang mas grabe pa, ang mga van na hindi nagbibigay ng lagay kay 'Gasul' na opisyal ng mga samahan ng van at may-ari rin ng ilang Premium Taxi ay siya ring nagpapahuli sa mga kakumpitensyang van gamit ang mga operatiba ng MMDA.

Noong isang araw ay may isang van na legal ang prangkisa ang hinuli ng MMDA ngunit kinumpiska pa rin ang lisensya dahil bawal umanong dumaan sa EDSA—'yun pala ay itinimbre lamang ni 'Gasul' dahil kakumpitensya sa biyahe at ayaw maglagay.

Hindi tayo tutol sa panghuhuli ng van sa EDSA kung talagang bawal, pero dapat lahat at hindi porke may ‘lagay’ ay puwedeng magpabalik-balik at ‘yung mga hindi nagbibigay ay regular na hinuhuli at minamanipula pa ang mga operatiba ng MMDA.

Nanawagan tayo kay MMDA Chairman Romando Artes, na kung hindi pa panahon para ire-shuffle ang lahat ng operatiba sa EDSA ay magsagawa man lamang ng imbestigasyon para mawala na ang buwayang enforcer na nakasisira sa magandang imahe ng MMDA.

Malaking tulong Chairman Artes kung ipatatawag mo ang isa sa iyong operatiba na nakamo-TOR YO! na nasa EDSA dahil kaabutang-palad niya si 'Gasul', baka sakaling hindi magsinungaling at maayos na ang problema sa kolorum ng van sa EDSA.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Multa sa bora-bora na motorsiklo

ni Atty. Rodge Gutierrez @Mr. 1-Rider | Enero 21, 2023

Bora-bora ito ang tawag sa motorsiklong sobrang ingay ng tambutso na kapag humaharurot na sa kalye ay nagdudulot na ng pagkainis sa marami nating kababayan kaya ito ay mariing ipinagbabawal ng batas.

May ilan kasi tayong kababayan na nahihilig sa motorsiklo partikular 'yung mga bago pa lamang na gustung-gustong binibihisan ang motorsiklo at maraming pagkakataon na nawawala na ito sa standard.

Karaniwang pinapalitan ng mas malakas ay ang busina na talagang nakakabingi, kasunod na pinapalitan ay ang mga ilaw, lalo na sa mga ‘kagulong’ natin sa mga lalawigan na dumadaan sa national road ay karaniwang gumagamit ng napakalalakas na headlights para labanan ang mga kasalubong na malalaking sasakyan.

Kasunod na pinapalitan ay gulong, upuan at kung anu-ano pa, pero higit sa pinakanauunang pinapalitan ay ang tambutso ng motorsiklo upang mas maganda umano ang tunog ngunit may ilan na ang gusto talaga ay sobrang lakas.

Mula sa 125cc scooters hanggang 1000cc sportsbike ang karaniwang sumasailalim sa modifications at ayon sa pag-aaral, ang aftermarket exhaust systems ay nagbibigay ng saya at excitement sa ilan nating ‘kagulong’ at seryosong perhuwisyo naman sa ilan nating kababayan.

Kapansin-pansin din ang pagdami ng bentahan ng sobrang lalakas na pipes and mufflers na pasimpleng ipinagbibili sa ilang maliliit na talyer sa bahagi ng 10th Avenue sa Caloocan City na dinarayo ng mga ‘kagulong’ natin na naghahanap ng murang piyesa ng motorsiklo.

Talagang hanggang sa kasalukuyan ay malaking debate pa rin ang legalidad ng aftermarket exhaust system sa bansa pero bilang Unang Representante ng 1-Rider Partylist ay hindi naman tayo nagpapabaya na hindi maisaayos para mapabuti ang ating mga ‘kagulong’.

Matagal nang maraming nagbabawal sa paggamit ng malakas na tambutso pero isa ang Siyudad ng Maynila ang binigyan talaga ng malaking anunsiyo noong Oktubre 1, 2021 nang maging isang ganap na noise regulation ordinance na ito sa kanilang lugar at hindi lang motorsiklo ang sakop nito kundi lahat ng sasakyan.

Sabagay halos pare-pareho naman ang multa dahil ang motorsiklo o kahit anong sasakyan na lalabag ay pagmumultahin ng P1,000 para sa 1st offense, P2,000 sa 2nd offense at ang ikatlo at susunod pang mga paglabag ay P5,000 na.

Ang masaklap sa lahat ng tatlong insidente ng paglabag ay kakalasin ng traffic enforcer ang modified muffler/exhaust at hindi na ito ibabalik pa dahil karaniwang sabay-sabay na itong sinisira.

Sa pinakahuling panuntunang ipinatutupad ng Land Transportation Office (LTO), may sound limit na 99 decibels sa motorsiklo at sa kahit kotse.

Dapat malinaw sa ating mga ‘kagulong’ kung ano ba itong decibels — ito ang basehan na sumusukat sa intensity kung gaano kalakas ang lumalabas na tunog at paano ba malalaman kung lagpas na ang ingay sa 99 decibels.

Ang ingay ng 99 decibels ay halos kasing lakas ng tunog ng ginagamit na jackhammer kapag may sinisirang kalsada o kaya ay kasing lakas ng tunog ng lumilipad na jet sa taas na 1,000 feet at ang matagal na exposure sa 99 decibels ay maaaring magresulta sa iba’t ibang perhuwisyo.

May mga device na ginagamit para madetermina kung gaano ba talaga ang lakas ng isang tunog, ito ang decibel meter — modern meter ito na karaniwan ay digital na at hand-held para hindi mahirap gamitin.

Iba-iba kasi ang pananaw ng ating mga kababayan pagdating sa ingay, marami sa ating mga kababayan ang naiingayan sa mga pampasaherong jeep na lumalagabog ang lakas ng tunog ng bass kapag nagpapatugtog ng music kaya hindi sila sumasakay dito.

Pero marami rin tayong kababayan na suki ng mga lumalagabog na pampasaherong jeepney na kung tawagin ay ‘patok’ lalo na ang mga estudyante na tila hinihele pa dahil sa halos hindi na magkarinigan sa loob ng sasakyan dahil sa lakas ng tugtog.

Ganyan din ang marami nating ‘kagulong’ na kaya gusto ng maingay na tambutso dahil mas nararamdaman umano nila ang performance ng motorsiklo na sa iba ay kabaliktaran naman.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09063043012, GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.