Aguilar at Wong, pinagmulta ng tig-20k dahil sa bawal na ensayo

ni Alvin Olivar - @Sports | July 8, 2020

Pinatawan ng multang tig-P20,000 sina Japeth Aguilar ng Barangay Ginebra at Adrian Wong ng Rain or Shine matapos maglaro ng 5-on-5 basketball sa isang gym sa San Juan City kahit pa nasa ilalim ng general community quarantine ang Metro Manila.

Bukod sa multa ay pinapag-swab test ng PBA sina Aguilar at Wong bago magtapos ang Martes. Pinasasailalim din ni PBA Commissioner Willie Marcial sina Aguilar at Wong sa isang 14-day quarantine at pagkatapos nito ay kailangan muli silang dumaan sa swab test.

Pinapag-community service rin sina Aguilar at Wong ng 30 oras.

Kamakailan ay lumabas ang isang video na nagpapakitang naglalaro ng 5-on-5 sina Aguilar at Wong kasama na rin sina Isaac Go at Thirdy Ravena. Mahigpit na ipinagbabawal ang paglalaro ng 5-on-5 basketball sa ilalim ng GCQ.

Dahil sa kumalat na video ay pinatawag ni Marcial sina Aguilar at Wong para sa kanilang paliwanag. Kasama rin sa meeting sina head of operations Eric Castro, legal counsel Melvin Mendoza, at mga opisyal ng Games and Amusement Board na sina commissioner Eduardo Trinidad, Dioscoro Bautista, at Rodil Manaoag.

De Ocampo, nagretiro, pero asst. coach na ng TNT KaTropa

ni Alvin Olivar - @Sports | July 1, 2020

Kinuha ng TNT KaTropa bilang assistant coach ang dati nilang manlalaro na si Ranidel De Ocampo matapos magretiro kamakailan sa paglalaro.

Ito ang anunsyo ni TNT team manager Gabby Cui kahapon na kung saan sasama na sa coaching staff na pinamumunuan ni head coach Bong Ravena at active consultant Mark Dickel.

“Coach Ranidel brings us a wealth of championship experience and basketball knowledge that will definitely help our team reach our aspirations for another championship,” saad ni Cui sa panayam ng 2OT at ng SPIN.ph.

Nagretiro si De Ocampo kamakailan matapos maglaro ng dalawang taon sa Meralco Bolts. Ngunit bago siya napunta sa Bolts ay naglaro ng siyam na taon si De Ocampo sa Talk ‘N Text kung saan nagwagi siya anim na titulo at dalawang finals MVP sa koponan.

Dahil rin sa kanyang paglalaro sa Talk ‘N Text ay napili si De Ocampo bilang parte ng Gilas Pilipinas noong 2013 kung saan nagwagi ng silver medal ang koponan dahil na rin sa kanilang panalo kontra South Korea sa semifinals.

Nalipat mula TNT hanggang sa Meralco si De Ocampo matapos ang isang trade na nagdala rin sa 2019 draft pick ng KaTropa sa Bolts.

Ayon sa ulat ng SPIN.ph, ang pagkuha kay De Ocampo ay matagal ng plano ng koponan at wala itong kinalaman sa pagkakaalis kay Tab Baldwin bilang assistant coach ng KaTropa dahil sa mga kanyang mga kontrobersyal na mga komento kamakailan tungkol sa basketbol sa Pilipinas.

Brownlee, swak na para maging naturalized player — Douthit

ni Alvin Olivar - @Sports | July 1, 2020

Nilalaban ni Marcus Douthit na maging susunod na naturalized player ng Gilas Pilipinas si Justin Brownlee, ang import ng Barangay Ginebra sa PBA.

Sa isang panayam sa Extra Session podcast ng Guerilla Podcast Syndicate-Philippines, inihayag ni Douthit ang kanyang suhestiyon na maging naturalized player si Brownlee dahil na rin sa kanyang mga kakayahan na pinakita sa mga nakalipas na taon.

Ayon kay Douthit, swak sa Gilas si Brownlee dahil sa kanyang abilidad na maglaro ng iba’t ibang posisyon. Ito rin ang magbibigay daan kila June Mar Fajardo at Kai Sotto na makapaglaro ng maraming minuto sa Gilas.

“My opinion is that I think they should go after someone like Justin Brownlee. I think right now, he is perfect just because he can play different positions. We still have June Mar and we still got Sotto coming up too. Those guys need minutes for international playing,” wika ni Douthit.

Si Douthit ang pinakaunang naturalized player ng bansa sa panahong itinayo ang Gilas Pilipinas national team. Sinundan siya ni Andray Blatche na posibleng hindi na maglaro sa koponan matapos ng kanyang nilaro sa 2019 FIBA Basketball World Cup sa China.

Ayon kay Douthit, malaking bagay para sa koponan ang kaalaman ni Brownlee sa mga manlalaro sa Gilas Pilipinas at sa PBA sa paghahanda para sa mga kompetisyon.

“Everyone is thinking like we need a big guy. Right now, the game isn’t all about the big guys anymore. Justin has been playing in the Philippines longer than I have. So he knows everything and you don’t have to convince him to be a naturalized player. You don’t have to sell him to the country. He is on there. I think that’s what they should be doing. He knows the country just as well as Filipinos that live there,” ani Douthit.