El Niño Alert: Init mas titindi

ni Jeff Tumbado | May 3, 2023

Naglabas ng El Niño alert ang Philippine Atmospheric, Geophysical and Astronomical Services Administration (PAGASA) na mas titindi ang init at alinsangan ng panahon sa susunod na tatlong buwan o Hunyo hanggang Agosto ng kasalukuyang taon.

Ang El Niño phenomenon ay namumuo sa pamamagitan ng abnormal na pag-init ng mga temperatura sa ibabaw ng dagat partikular sa gitna at silangang ekwador sa karagatang pasipiko at ang pagbaba sa normal na pag-ulan.

Bagama't pinapataas ng El Niño ang posibilidad na magkaroon ng mas mababa sa normal na kondisyon ng pag-ulan, sinabi ng PAGASA na higit sa normal na kondisyon ng pag-ulan sa panahon ng Southwest Monsoon season na kilala rin bilang Habagat season ay maaaring asahan sa kanlurang bahagi ng bansa.

Kaugnay nito, patuloy na susubaybayan ng PAGASA ang epekto ng El Niño phenomenon sa susunod na mga araw.

Inabisuhan naman ng PAGASA ang lahat ng ahensya ng gobyerno at ang publiko at hinihikayat na patuloy na mag-monitor at magsagawa ng mga hakbang sa pag-iingat laban sa napipintong epekto ng El Niño.

Dahil sa sunud-sunod na kapalpakan.. LTO at DOTr, kinasuhan ng transport groups

ni Jeff Tumbado | May 3, 2023

Sinampahan ng transport groups ng kasong sibil ang ilang matataas na opisyal ng Land Transportation Office (LTO) at Department of Transportation (DOTr) kasunod ng umano'y ilegal na pagpapalabas ng mga polisiya kaugnay ng pagpapatupad ng Public

Motor Vehicle Inspection Center (PMVIC).

Batay sa inihaing reklamo ni Atty. Israelito Torreon, legal counsel ng transport groups, sinampahan ng kaso sina DOTr Secretary Jaime Bautista, Usec. Reinier Paul Yebra, LTO Asec. Jose Arturo Tugade at iba pa.

Inihain ni Atty. Torreon ang Petition for Certiorari Prohibition sa Regional Trial Court ng Lupon, Davao Oriental upang ideklara ng korte na walang bisa ang mga naunang ipinalabas na Department Order/memorandum circular kaugnay ng umano'y ilegal na implementasyon ng PMVIC.

Ipinababasura rin ng iba't ibang transport group at road safety advocates ang pagpapairal ng PMVICs system na ginawa lamang sa bisa ng Department Order.

Sa isinampang reklamo ng lead counsel ng grupo laban sa LTO at DOTr sa Regional Trial Court (RTC) sa Lupon ng Davao Oriental, sinabi nito na layon lamang na gipitin hanggang sa nawala ang Private Emission Testing Center (PETC) gayong ito ay alinsunod umano sa mga umiiral na batas.

Bukod pa rito, ipinarerebisa rin ng grupo ang implementasyon ng Land Transportation Management System (LTMS) bunsod ng sunud-sunod na kapalpakan na naranasan ng kanilang hanay.

Magkasanib pwersang nagsampa ng kaso ang mga grupong Ang Kaligtasan sa Kalsada; National Confederation of Tricycle Operators and Drivers Association of the Philippines (NACTODAP); National Public Transport Coalition (NPTC); Association of Committed Transport Organizations Nationwide Corporation (ACTONA); Arangkada Riders Alliance Inc. (Motorcycle Riders) at Lupon Pedicab Operators Drivers Association at iba pang transport group sa Davao Region.

Paglilinis sa mga pasaway na pulis sa lower level, start na

ni Jeff Tumbado | April 29, 2023

Mas lalo pang paiigtingin ng Philippine National Police (PNP) ang pagsugpo laban sa mga tiwaling pulis o ang tinatawag na “rogue cops”.

Ito ang inihayag ni PNP Chief General Benjamin Acorda, Jr., kung saan inatasan na ang lahat ng regional directors ang pagkasa ng operasyon sa mga pasaway na pulis na uumpisahan sa “lower level”.

Ayon kay Acorda, meron na lamang umano na kakaunting tiwaling pulis sa kanilang hanay, base ito sa kanyang karanasan bilang isang counterintelligence agent.

"I intend to conduct really kung sino po 'yung mga nasa listahan at ayaw magbagong-buhay, ay talagang ooperate-an na natin,” pahayag ni Acorda.

"That is what I'm urging. Noong mineet natin 'yung regional directors, 'yan ang hiniling ko sa kanila — that the command responsibility, sa bawat paglilinis sa bawat level, is dapat masusunod," dagdag pa ng chief PNP.

Kamakailan lamang, nanawagan mismo si Interior Secretary Benhur Abalos sa apat na police generals at mga police colonels na maghain ng kani-kanilang courtesy resignation bilang bahagi ng pagsisikap ng gobyerno na tanggalin ang ilang high ranking officers at officials na idinadawit sa kalakalan ng ilegal na droga.

Ito aniya ang tanging paraan ng Kalihim para sa bagong simula sa hanay ng PNP.

Nitong Abril 20, 2023, nakumpleto ng binubuo na five-man advisory group ang review sa mga naghain ng resignations nang nasa 953 police officers at nitong Abril 25 nang irekomenda ang further evaluation o ang karagdagang pagsusuri sa 36 high ranking police officials ng National Police Commision (Napolcom).

Nakatakdang isumite ng five-member body ng Napolcom kay Chairperson Abalos para sa pinal na review at pagkatapos ay siyang ihahain naman kay Pangulong Ferdinand Marcos, Jr. para sa kanyang pag apruba.