5 “suppliers” ni Matthew Perry ng ketamine, naaresto na

ni Angela Fernando @Entertainment News | August 16, 2024

File Photo: Matthew Perry - Sa Los Angeles premiere noong 2015 / AP

Naaresto na ang limang taong sangkot sa pagkamatay ng aktor ng "Friends" na si Matthew Perry, ayon sa dalawang mapagkakatiwalaang law enforcement sources na kinumpirma sa CBS News kamakailan.

Hindi pinangalanan ang mga suspek sa pagsu-supply ng ketamine kay Perry. Naganap ang mga pag-aresto halos isang taon matapos matagpuan ang walang buhay na katawan ng 54-anyos na aktor sa kanyang jacuzzi sa bahay niya sa Pacific Palisades, Los Angeles.

Inilabas ang ulat ng toxicology ng Los Angeles County medical examiner, kung saan nakasaad na ang sanhi ng pagkamatay ni Perry ay dahil sa matinding epekto ng ketamine.

Matatandaang bukas si Perry tungkol sa kanyang pakikipaglaban sa addiction, na kanyang tinalakay sa kanyang best-selling na memoir na "Friends, Lovers and the Big Terrible Thing." Ang libro ay inilabas dalawang taon bago siya pumanaw.

Lisa, inilabas na ang bagong single na ‘New Woman’

by Eli San Miguel @K-Buzz | August 16, 2024

Nagbabalik si Lisa Manoban na may bagong kantang swak na swak para sa sayawan. Sa kanyang bagong single na 'New Woman,' kumakanta ang BLACKPINK member tungkol sa self-love. Kasama niya naman bilang collaborator ang Spanish singer na si Rosalia.

Ipinapakita sa music video ang mga eksena kung saan suot ni Lisa ang mahahabang blonde wig at iba pang chic looks.

Nagsimula nang magbigay ng pahiwatig si Lisa tungkol sa isang bagong solo single mula pa noong Hulyo. Inihayag niya noong Agosto na ito ay isang kolaborasyon kasama si Rosalia.

Noong Hunyo, matatandaang inilabas ni Lisa ang “Rockstar,” ang kanyang unang kanta at music video pagkatapos ilunsad ang sariling record label na Lloud.

Para sa MTV Video Music Awards 2024, nakakuha ng apat na nominasyon ang BLACKPINK member para sa “Rockstar,” kabilang ang Best K-Pop, Best Choreography, Best Art Direction, at Best Editing.

Concert ni Taylor Swift, mas hihigpitan

by Eli San Miguel @Overseas News | August 15, 2024

Magbabalik-entablado si Taylor Swift ngayong Huwebes upang ipagpatuloy ang kanyang major concert tour na may mas mahigpit na seguridad matapos ang nabigong Islamic State-inspired attack na nagdulot ng kanselasyon ng kanyang mga palabas sa Vienna noong nakaraang linggo.

Inihayag ng British police na hindi maaapektuhan ng insidente sa Vienna ang kanyang limang palabas sa Wembley Stadium, kung saan inaasahang darating ang 90,000 na Swifties bawat gabi.

Papapasukin ang mga fans sa Wembley gamit ang mga metal detector at pinapayagang magdala alamang ng isang maliit na bag. Bawal ang mga glass at metal containers, laptop, at payong.

Sinabi ng 34-anyos na si Swift, na ang pinakamalaking takot niya ay ang panganib sa kanyang mga fans lalo nu’ng nangyari ang mga pag-atake noong 2017 sa mga music events, kabilang ang pamamaril sa Las Vegas at suicide bombing sa isang concert ni Ariana Grande sa Manchester.

Samantala, inaasahan namang kikita ang kanyang 'Eras' tour ng higit sa $1 bilyon, ang kauna-unahang tour na makakamit ito, mula sa 149 na palabas sa loob ng dalawang taon.