Jennie ng BLACKPINK at BamBam ng GOT7, spotted na nag-date

ni Eli San Miguel @K-Buzz | Sep. 20, 2024

Naging target na naman ng 'dating rumors' si Jennie ng BLACKPINK . Ito'y matapos mag-viral ang pagde-date umano nila ni BamBam, na miyembro ng K-pop group na GOT7, matapos silang makita na magkasama sa Los Angeles. Kumalat online ang mga larawan nilang dalawa na magkasama sa Sushi Park, isang Japanese restaurant sa West Hollywood, California.

Dahil dito, nagsimula ang mga espekulasyon na may romantic relationship ang dalawa. Naglabas naman agad ng pahayag nitong Huwebes ang OA Entertainment, ahensiya ni Jennie, upang pabulaanan ang mga tsismis na ito. "The two people who are friends just met in the US and had a meal together. The dating rumors are groundless," pahayag ng ahensiya.

Ngayong Biyernes, puno na rin ng mga posts mula sa fans ang social media platform na X, na binibigyang-diin ang hindi pagbibigay ng malisya sa pagkakaibigan nina Jennie at BamBam.

Matatandaan na samu’t saring 'dating rumors' na ang napagdaanan ni Jennie dahil sa kanyang kasikatan sa industriya ng K-pop at tila nagiging kontrobersiyal ang bawat pakikipag-hangout niya sa mga lalaking personalidad.

Tungkol naman sa kasalukuyang estado ng kanyang karera, kamakailan lamang ay pumirma si Jennie ng kontrata sa Columbia Records at maglalabas siya ng kanyang solo single sa Oktubre.

Charlie Puth, ikinasal na

ni Eli San Miguel @Entertainment | September 18, 2024

Ikinasal na ang American singer-songwriter na si Charlie Puth, kay Brooke Sansone na isang digital marketing at PR coordinator.

Ibinahagi ng singer ang mga larawan ng kanilang garden wedding sa Instagram, kung saan naka-black suit si Charlie na may white lace details mula sa BODE, habang si Brooke ay nakasuot ng strapless gown na may floral designs mula kay Danielle Frankel.

Sa kanyang caption, inihayag ni Charlie ang romantikong mensahe para sa kanyang asawa.

“I love you Brooke…I always have, with you I am my very best. I promise I’ll love you everyday in this life, and even more when we move on to our next,” panimula niya.

“Brooke Ashley Sansone, and now you’ll be Brooke Ashley Puth. Thank you for making me the happiest man alive. It has always been you,” dagdag pa niya.

Naging Instagram official sina Charlie at Brooke noong Disyembre 2022. Inanunsiyo naman niya ang kanilang engagement noong Setyembre 2023.

Sumikat si Charlie sa kantang “See You Again” kasama si Wiz Khalifa para sa “Fast & Furious” film franchise. Nagkaroon din siya ng collaboration song kasama ang BTS member na si Jungkook para sa single na “Left and Right.”

Rapper na si Sean ‘Diddy’ Combs, inaresto sa New York

ni Angela Fernando @Entertainment | September 17, 2024

Naaresto sa New York ang American rapper na si Sean "Diddy" Combs, na naharap sa sunud-sunod na kaso ng sexual assault at inimbestigahan sa federal na kasong human trafficking nu'ng nakaraang taon, ayon sa kanyang abogadong si Marc Agnifilo.

Nangyari ang pag-aresto kamakailan sa Park Hyatt Hotel sa 57th Street sa Manhattan kung saan dinala si Diddy sa kustodiya ng Homeland Security Investigations, ayon sa isang hindi pinangalanang source na pamilyar sa mga naganap na negosasyon.

Wala pang linaw ang mga paratang at detalye ng kaso laban kay Combs sa kasalukuyan. Ayon kay Agnifilo, nakikipagtulungan ang kanyang kliyente sa imbestigasyon na humantong sa indictment kaya kusang lumipat ito sa NY nu'ng nakaraang linggo upang harapin ang mga paratang dito. Nanindigan naman ang team nitong inosente ang at sinabi nilang wala itong itinatago.