6 Nat'l athletes, inaasahang papasok sa Tokyo Paralympics

ni Gerard Peter - @Sports | July 02, 2021

Umaasa ang Philippine Sports Commission (PSC) na matutumbasan o malalampasan pa ng Pilipinas ang maipapadalang mga Paralympians sa 2020+1 Tokyo Paralympics matapos paniguradong makapagdadala ang bansa ng 5 national athletes.

Inihayag ni PSC Commissioner Arnold Agustin na naghihintay pa sila sa Tripartite Agreement na para sa 3 sports events mula Cycling, Para-Power Lifting at Table Tennis upang masamahan sina Allain Ganapin (Para taekwondo), Jerrold Mangliwan (Para Athletics; wheelchair racer), Jeanette Aceveda (Para Athletics; discuss thrower), Ernie Gawilan (Para Swimming) at Gary Bejino (Para Swimming).

“Silang lahat ay dumaan sa standard qualifying event, so napakahirap ng pagka-qualify nila,” wika ni Agustin, kahapon ng umaga sa TOPS Usapang Sports on Air.

“Mayroon pa tayong inaabangan by Tripartite Agreement dun sa ating cycling at sa para-power lifting, bale inaabangan pa rin natin iyon hopefully mapili rin sila,” dagdag ni Agustin na umaasang mapapantayan ang 6 na naipadala sa 2016 Rio Paralympics o higit pang manlalaro sa paralympiad na nakatakdang magsimula sa Agosto 24-Setyembre 5 sa Tokyo, Japan. “So, we’re still waiting sa tatlong event na iyon, hopefully magkaroon pa ng dagdag, kase nung last Rio Olympics 6 yung nagqualified natin eh, so right now 5 pa lang, maganda sana kung equal o madagdagan pa natin sa Tokyo Olympics,” paliwanag ni Agustin sa programang suportado ng PSC, Games and Amusement Board at Philippine Amusement and Gaming Corporation (PAGCOR).

Sinabi rin ni Agustin na may tsansa na muling makabalik sa Olympiad si 2016 Rio Olympics singles class 8 bronze medalist at 7-time ASEAN Para Games champion Josephine Medina sa Tokyo meet kung sakaling magba-backout ang kasalukuyang World number 1 sa kanyang kategorya.

“Although hindi siya (Medina) na-invite via partite, bale No.2 siya, just in case na magbackout yung No,1 makakapasok siya automatic,” saad ni Agustin, kung saan tinuldukan ng 51-anyos na two-time Asian Para Games silver medalist ang 16 na taong pagkagutom sa medalya sa Paralympic Games na huling kinuha ni para-power lifter Adeline Dumapong sa 2000 Sydney Paralympics sa kanyang bronze medal sa women’s under-82.5kgs category.

May tsansa ang PHL Judoka sa Olympics, kung may aatras

ni Gerard Peter - @Sports | July 01, 2021

Mayroong maliit na pagkakataon na hindi lamang si four-time Southeast Asian Games gold medalist Kiyomi Watanabe ang babandera sa national judo team sa darating na 2020+1 Tokyo Olympics, bagkus ay isa pang judoka ang maaring mabigyan ng tsansa kung papalarin sa panahon ng pandemic.

Inamin ni Philippine Judo Federation (PJF) president David Carter na mayroon pang natitirang tsansa na makasingit pa ang isa pang SEA Games medalist sa katauhan ni men’s under-73kgs lightweight Keisei Nakano na nasa malayong 78th place sa Olympic ranking, kung may ilang mga judo players ang maisipang hindi na tumuloy dahil sa lumalalang kaso ng Covid-19 sa buong mundo dahil sa mga bagong variants gaya ng Delta at Delta plus.

“That is true. There is still very slim chance na mag-qualify si Keisei. We can’t really say. Yung iba very far sa kanila, pero they qualified,” pahayag ni Carter, Martes ng umaga sa weekly PSA Forum webcast. “Baka may mga manlalaro na mag-beg off because of the current situation of Covid. )If ever it turns that way) mapupunta yung unused quota na tinatawag (kay Keisei),” dagdag ni Carter.

Ang naturang puwesto ng 24-anyos na Filipino-Japanese ay maaaring bumaba pa kung tatanggalin ang may dobleng bansa sa rankings, dahil tanging isang bansa lamang ang magrere-prisinta kada weight division.

May ilang judoka aniya sa ibang bansa ang nakatanggap ng Continental Quota gaya ng nakuha ng 24-anyos na 2018 Jakarta-Palembang Asian Games silver medalist na si Watanabe, na lagpas pa sa kasalukuyang pwesto ni Keisei. Ito ay sina Younis Eyal Slman ng Jordan na may Asian Continental Quota na nasa 95th place at Lucas Diallo ng Burkina Faso ng African CQ na lumapag naman sa 110.

Maaaring maihalintulad umano ang tsansa ni Keisei sa sitwasyon ng kanyang nakatatandang kapatid na si Kodo Nakano, na nakapasok sa 2016 Rio Olympics sa pamamagitan ng wild card entry matapos umatras ang isang judoka sa ibang bansa para makapaglaro ito sa men’s half-middleweight category. “That’s one hope na mayroong umatras,” sambit ni Carter.

Kahit fully vaccinated, 'di pa rin ligtas ang Olympic athletes

ni Gerard Peter - @Sports | June 30, 2021

Hindi maitatanggi ng sports officials sa buong mundo, maging sa Pilipinas, ang panganib ng mapaminsalang COVID-19 sa national at professional athletes kahit na nabakunahan na ang mga ito ng dalawang beses.

Ito’y matapos na tamaan pa rin ng delikadong sakit ang mga pro athletes na sina Chris Paul ng Phoenix Suns, US Open champion Jon Rahm at isang Ugandan Olympic coach na hindi pinangalanan sa kabila ng pagiging ‘fully vaccinated’ ng mga ito.

Aminado si Japanese Olympic Committee president Yasuhiro Yamashita na hindi nila masisiguro na magiging “zero” ang kaso ng COVID-19 sa lahat ng koponan na papasok sa mula sa ibang bansa, ngunit hihigpitan nila sa iba’t ibang paraan na maharang ang mga papasok na may dalang sakit.

“No matter what measures are put in place, there is no way we will have zero positive cases arriving,” wika ni Yamashita. “Even if you've had two vaccine doses, it doesn't guarantee every individual will be negative. In order to make sure no clusters arise, we need to have thorough measures at the border at the time of entry to Japan.”

Ang ganitong sitwasyon ay naiintindihan ng Philippine Olympic Committee (POC) na tila dala na ng malaking panganib para sa mga athletes, coaches at sports officials ang 2020+1 Tokyo Olympics sa Hulyo 24-Agosto 8.

“Well these are chances we have to bear with during this pandemic. However, we are positive that everyone will be negative come Olympic Games,” wika ni POC Legal Affairs Commission chairman at Chief Legal Counsel Atty. Wharton Chan sa panayam ng Bulgar Sports sa online messaging. “We all know that despite the vaccine there are possibilities of still getting positive with the virus. However, you are a lot safer compared to non-vaccinated individuals. We have nothing to worry about as long as you take proper precautions and there will only be a small chance of getting severe symptoms,” dagdag ni Chan, na tumatayo ring secretary general ng Samahang Kickboxing ng Pilipinas.