Casimero balik suntukan vs. Sanchez sa Oktubre

ni Gerard Arce @Sports | August 25, 2024

Photo: Boxing scene

Matunog ang pagbabalik sa bakbakan ni dating 3-division World champion John Riel “Quadro Alas” Casimero kontra kay dating World title challenger Saul “The Beast” Sanchez sa Okt. 13 sa bansang Japan.

Mag-iisang taon ding bakante sa laban ang dating 3-division World champion matapos mauwi sa 4th-round technical draw ang laban kontra sa boxing trainer na si Yukinori Oguni noong Okt. 12, 2023 sa Ariake Arena sa Tokyo, Japan, matapos ang aksidenteng pagsasalubong ng kanilang mga ulo na nagresulta sa pagkakaroon ng malaking cut sa Japanese boxer tungo sa tuluyang pagpapatigil ng laban.

Bago ang naturang planong laban ay naging laman rin ng iba’t ibang kontrobersiya ang 35-anyos na tubong Ormoc City, Leyte kasama ang kapatid at trainer na si Jason nang mapasok sa bangayan sa kampo ng MP Promotions at president nitong si Sean Gibbons, gayundin ang bulung-bulungan na paghahanap ng bagong boxing promoter na kanila ring pinabulaanan, kung saan kasalukuyan pa rin itong hawak ng Treasure Boxing Promotions ni dating World champion Masayuki Ito.

Kasalukuyang nakapuwesto ang dating World Boxing Organization (WBO) bantamweight champion (33-4-1, 22KOs) bilang number five ranked sa WBO, No.8 sa World Boxing Council at No.11 sa International Boxing Federation na pare-parehong hawak ni undefeated at two-time undisputed champion Naoya “The Monster” Inoue ng Japan, na nakatakdang itaya lahat ng korona laban kay TJ “The Power” Doheny ng Ireland sa Setyembre 3 sa Ariake Arena.

Naging malamlam ang kasikatan ni Casimero sapol ng mawala sa mga beywang ang WBO title belt at makipaghiwalay ng landas sa MP Promotions matapos labagin ang kautusan ng British Boxing Board of Control sa pagsusuot ng Sauna suit sa nakatakdang laban sana nito kontra Paul Butler, na nagresulta sa pagtanggal ng korona at mauwi sa pagsabak ng Briton kontra Jonas Sultan.

Batangas, Zamboanga at Negros umangat sa MPBL

ni Gerard Arce @Sports | August 24, 2024

Photo: SpinPH

Mga laro ngayong Sabado

(University of Bangued Gymnasium)

4 n.h. – Imus vs. Pasay

6 n.g. – Binan vs. Sarangani

8 n.g. – Valenzuela vs. Abra

Nagpamalas ng mahusay na atake si Juneric Baloria upang pangunahan ang hometown bet Batangas City Rhum Masters para kabugin ang South Cotabato Warriors upang makapagtala ng malaking agwat sa puntusan sa 2nd quarter tungo sa panalo para maiselyo ang ikatlong sunod na panalo sa bisa ng 91-82 sa main battle noong Miyerkules ng gabi ng Maharlika Pilipinas Basketball League (MPBL) 6th Season na ginanap sa Batangas City Coliseum sa Poblacion, Batangas City.

Iniangat ng 2013 NCAA Rookie of the Year mula UPHSD Dalta Altas ang 21 puntos kasama ang dalawang free throws, 6 assists para sa ika-17 panalo at 7 talo ng Batangas City. Sumuporta rin sa koponan na makamit ang solong ikatlong puwesto sa South Division sina Cedric Ablaza sa 19 puntos,  Levi Hernandez sa 17 puntos at 2  rebounds, Jeckster Apinan sa 12 puntos, 10 rebounds  at Carlos Isit sa 9 puntos.  

Angat para sa South Cotabato si Val Acuna sa kinargang 20 puntos kasama ang 2 rebounds at isang assist, gayundin ang ambag nina Nico Elorde sa 12 puntos, Jammer Jamito sa 12 puntos, 7 boards at 2 blocks at John Paul Calvo na may 12 puntos, na bumagsak sa 15-9 kartada.

Natakasan  ng Zamboanga Master Sardines ang Davao Occidental Tigers sa 67-65, gayundin ang Negros Muscovados ang Muntinlupa Cagers ELBURG Paramount sa 80-77 sa naunang dalawang laro ng single-round robin ng 29-team tournament.

Patuloy na nanguna para sa Zamboanga, na pinutol ang kanilang two-game losing skid, si dating league MVP Jaycee Marcelino sa 24 puntos. Lumista rin sa iskoring sina Pedrito Galanza Jr, na nagselyo ng panigurong free throw sa walong puntos. 

CCS 3rd place ng q'finals, Hitters pinatalsik Titans

ni Gerard Arce @Sports | August 23, 2024

Photo: OneSports / FB

Mga laro sa Sabado (FilOil EcoOil Centre) 4 n.h.

Cignal vs (ranked 7) 6 n.g.

Akari vs. Farm Fresh

Sinisiguro ng Creamline Cool Smashers ang ikatlong puwesto sa quarterfinals sa pagdispatsa sa kulelat at walang panalo na ZUS Coffee Thunderbelles sa bisa ng straight set sa 25-17, 25-15, 25-22 panalo kahapon, habang pinatalsik ng PLDT High Speed Hitters ang Choco Mucho Flying Titans sa 21-25, 25-18, kahapon sa Premier Volleyball League Reinforced Conference sa FilOil EcoOil Centre sa San Juan City.

Ipinakita ng Cool Smashers ang kanilang bagsik sa pagpapalabas ng kanilang malalim na puwersa at matayog na karanasan para tapusin lamang ang laro sa loob ng 77 minuto patungo sa quarterfinals na may tangan na 6-2 baraha na paghahandaan ang laban kontra sa Capital1 Solar Spikers (5-3). Nakuha ng PLDT ang kaparehong panalo para tumabla sa Creamline, subalit mas nakakataas ang kabuuang puntos na nalikom ng 8th-time league champion sa 20 puntos.

“We’re ready, sa lahat ng challenges na mangyayari. Ang importante lang talaga is yung determination namin na manalo,” pahayag ni Creamline coach Sherwin Meneses. “Lalo na knockout game, so, trust lang namin sa isa’t isa.” Bumida para sa Creamline si Erica Staunton na may 17 puntos, habang sumegunda si Bernadeth Pons sa 11 puntos upang maging pangunahing manlalaro na lokal sa kawalan nina Tots Carlos at Alyssa Valdez dulot ng injuries at paglalaro sa Alas Pilipinas national team nina Jema Galanza at Jia de Guzman.

Naging sandalan din sina middle blockers Lyn Bernardo at Bea De Leon na 8 at 4 na puntos, ayon sa pagkakasunod, habang idiniin ng Creamline ang atake sa 43 kontra 29 ng Thunderbelles. “Malaking bagay ‘to kasi matagal ko na rin hinihintay 'yung opportunity to play longer minutes,” saad ni Bernardo.