High Speed Hitters, umatras sa PVL Invt'l Conference

ni Gerard Arce @Sports | September 1, 2024

Kinumpirma ni Premier Volleyball League commissioner Sherwin Malonzo ang pagkatanggap ng pormal na hiling ng PLDT High Speed Hitters na mag-backout na sa Invitationals noon pang Huwebes, mula sa initial semis game day pero hindi natuloy dahil sa power outage.

Ayon naman sa pag-aanalisa ng liga ang ginawang protesta ng PLDT at pagkatalo ay wala namang kaugnayan sa pasya ng team, nakasentro lang anila ang lahat sa naisin ng team na makapagpahinga at makapagpagaling dahil sa rami ng players nila na may injuries.

Una nang nagpahayag ang PLDT na hindi na masisilayan ang k kanilang laro sa 2024 Premier Volleyball League (PVL) Invitational Conference.

Gayunman, hindi ito dahil sa kontrobersiyal nilang pagkatalo laban sa Akari Chargers sa nakaraang semifinal round sa Reinforced Conference nitong Sabado sa MOA Arena, Pasay City.

Una nang lumiham ang High Speed Hitters sa PVL noong nakaraang linggo, ayon sa ulat at aprubado na umano ito ng liga.

Ayon sa source ng PLDT, batbat ng injuries ang kanilang players at hirap na umanong mairaos ang kanilang laro at wala naman anilang kaugnayan ang nangyari noong Sabado.

Magpapahinga raw muna ang PLDT matapos ang kanilang bronze medal match ngayong Lunes dahil nais ng team na makapagpagaling muna ang kanilang players mula sa matitinding injuries.

Napuno ng kontrobersiya ang kanilang pagkatalo lalo na sa Set 5 kung saan humiling ang coaching staff ng challenge sa net fault pero hindi tinanggap.

Ang semifinalists ng Reinforced Conference ay eligible na maglaro para sa Invitational tilt na nakatakda ngayong darating na Linggo.

Pasok na ang Akari, Creamline, Cignal at guest teams Kurashiki Ablaze at EST Cola sa kompetisyon kabilang na ang ipapalit sa team ng PLDT.

Napag-alaman na ang mga injured na players ay sina Fil-Canadian ace Savi Davison at debut spiker Kianna Dy.

High Speed Hitters kontra Chargers as PVL Semifinals

ni Gerard Arce @Sports | August 28, 2024

Photo: PLDT High Speed Hitters / Premier Volleyball League

Mga laro (Huwebes)

(Philsports Arena, Pasig City)

Semifinals

4 n.h. – PLDT vs Akari

6 n.g. – Creamline/Petro Gazz vs Cignal

Nagpamalas ng mahusay na maturity at tibay ng dibdib ang PLDT High Speed Hitters sa ika-apat at huling set upang maiselyo ang comeback win sa pangunguna ng magandang patakbo sa opensa ni ace playmaker Kim “Kaf” Fajardo para talunin ang Chery Tiggo Crossovers sa iskor na 25-23, 25-27, 15-25, 25-18, 15-9 upang umabante sa semifinals katapat ang naghihintay na unbeaten at top seed na Akari Chargers sa do-or-die quarterfinal round ng Premier Volleyball League (PVL) Reinforced Conference, kahapon sa FilOil EcoOil Centre sa San Juan City.

Namahagi ng pambihirang 23 excellent sets at 2 puntos ang 3-time collegiate champion mula sa De La Salle Lady Spikers at dating national team standout upang mabigyan nito ng 37 puntos si Elena Samoilenko na bumanat ng tatlong sunod na atake at panapos na block sa atake ni Mylene Paat para sa 32 atake.

“Sa akin talaga, tiwala lang sa team at coaches at syempre respeto rin sa kalaban. Di ko puwedeng isipin na merong Reinforced (import) kase buo ang tiwala ko sa kanilang lahat. Sobrang saya namin, halos maiyak na kaming lahat,” pahayag ni Fajardo matapos ang laro.

Naging malaking bahagi rin ng opensa sa 5th set si Majoy Baron na kumamada ng  9 puntos kabilang ang krusyal na block kay Chery Tiggo import Kath Bell para makuha ang 14-9 iskor. Sumegunda sa scoring  si Fiola Ceballos sa 12 puntos. Malaking hugot mula sa bench si Kiesha Bedonia sa 8  puntos, Mika Reyes sa 7 at Erika Santos sa anim, habang sumalo ng 24 excellent digs si Kath Arado.

High Speed Hitters at CCS sa knockout q'finals na

ni Gerard Arce @Sports | August 27, 2024

Photo: PLDT High Speed Hitters at Creamline Cool Smashers - Premier Volleyball League

Mga laro ngayong Martes

(FilOil EcoOil Centre) Quarterfinals

4 n.h. – PLDT vs Chery Tiggo

6 n.g. – Creamline vs Petro Gazz 

Magkakaharapang mga koponang nasa kalagitnaan ng team standings para umusad sa susunod na round sa pagtatapat ng No.4 seed PLDT High Speed Hitters at No.5 Chery Tiggo Crossovers sa pambungad na laro at bakbakan ng No.3 Creamline Cool Smashers at No.6 Petro Gazz Angels sa main game ng knockout quarterfinal match ngayong araw sa 2024 Premier Volleyball League (PVL) Reinforced Conference sa FilOil EcoOil Centre sa San Juan City.

Kung sisipatin ay pare-parehong patas ang kapasidad ng apat na koponan na nagkumpulan sa gitna sa pagtatapos ng crossover-elimination round, habang nauna ng makausad ang top-two spots na Akari Chargers at Cignal HD Spikers matapos payukuin sa magkahiwalay na tagpo ang No.8 seed na Farm Fresh Foxies sa 4th set at ang sorpresang No.7 seed na Capital1 Solar Spikers sa makapigil-hiningang five setter, ayon sa pagkakasunod.

Minsang pinataob ng Chery Tiggo ang PLDT sa dikdikang five set panalo noong Agosto 3 sa 25-19, 20-25, 25-20, 21-25, 15-10 kasunod ng 39 puntos na pagsabog ni import Katherine Bell, habang nakaligtas ang Angels laban sa Creamline noong Agosto 13 sa isa pang fifth set na nagtapos sa 25-23, 25-19, 20-25, 23-25, 15-12 na pinagtulungang buhatin nina import Wilma Salas at reigning MVP Brooke Van Sickle.

Paniguradong muling sasandalan ni PLDT coach Rald Ricafort ang mga bataan na sina import Elena Samoilenko at mga lokal na sina Erika Santos, Fiola Ceballos, Majoy Baron, Mika Reyes, Jovie Prado at ace playmaker Kim Fajardo, habang sasandalan ni coach Kungfu Reyes at ng Chery Tiggo ang import na si Bell, kasama sina Ara Galang, Mylene Paat, Pauline Gaston, Seth Rodriguez, Shaya Adorador, Mary Rhose Dapol at Jasmine Nabor.