EST Cola naka-1st win vs. Farm Fresh sa PVL Invt'ls

ni Gerard Arce @Sports | September 10, 2024

Nakamit ng EST Cola ang kanilang unang panalo sa bisa ng come-from-behind panalo kontra sa Farm Fresh Foxies sa pamamagitan ng 22-25, 25-17, 19-25, 25-20, 17-15 sa pambungad na laro ng 2024 Premier Volleyball League Invitational Conference kahapon sa SM Mall of Asia Arena sa Pasay City.

Kuminang para sa U20 Thai team si Warisara Seetaloed na umiskor ng 33 puntos mula sa 29 atake, kabilang ang tig-dalawang aces at blocks gayundin ang 11 excellent receptions tungo sa unang panalo sa liga matapos ang apat na laro. Sumuporta rin sa Thai team sina Natthawan Phatthaisong sa 18 puntos mula sa 12 atake at tig-tatlong aces at blocks.

Tumulong din sa EST Cola si Nattharika Wasan sa 10 puntos, Sasithorn Jatta sa walong puntos, at Tanyaporn Seeso sa pitong puntos kasama ang 14 excellent digs, habang mahusay ang pamumuno sa opensa ni Panithita Khongnok sa 24 excellent sets at dalawang puntos.

“I’m very, very happy for this first win,” wika ng spiker na si Seetaleod nula sa isang interpreter, para buhatin ang koponan sa kanilang unang panalo sa torneo na inorganisa ng Sports Vision.

Dahil sa nakuhang panalo ay may tsansa ang EST Cola na lumaban sa bronze medal game, habang nalasap ng Farm Fresh ang kanilang ikatlong sunod na pagkatalo at nakatakdang kaharapin pa ang powerhouse na Creamline Coo Smashers sa Miyerkyles.

Tumapos naman para sa Farm Fresh si Asaka Tamaru ng 19 puntos mula sa 18 kills at 22 excellent receptions, gabang sinegundahan ito nina Aprylle Tagsip at Alyssa Bertolano sa 18 at 14 points, ayon sa pagkakasunod, habang nag-ambag sina  sina Caitlyn Viray at Rizza Cruz ng tig-walong puntos.

Perez petmalu ang hataw sa HD Spikers, EST Cola tinibag

ni Gerard Arce @Sports | September 9, 2024

Mga laro ngayong araw (Lunes)

(SM Mall of Asia Arena)

4 n.h. – Farm Fresh vs EST Cola

6 n.g. – Creamline vs Cignal 

Nagpatuloy sa pagpapasikat si last conference Best Foreign player Maria Jose Perez para sa Cignal HD Spikers na muling bumida para panatilihing walang panalo ang EST Cola sa pamamagitan ng straight set sa 25-23, 27-25, 25-12 sa pambungad na laro kahapon sa 2024 Premier Volleyball League (PVL) Invitational Conference sa SM Mall of Asia Arena sa Pasay City.

Humataw ang Venezuelan spiker ng 28 puntos mula sa 23 atake at 5 blocks kasama ang 9 na excellent receptions at 6 na excellent digs para sa ikalawang sunod na panalo ng HD Spikers sa mini-tournament.

Nakatulong ng foreign player si dating league MVP Frances Molina sa 12 puntos gayundin sina Toni Rose Basas sa 8 puntos, 4-time league best setter Angelica Cayuna sa 6 puntos at 19 excellent sets.

“I'm very happy we pulled off this win. The first two sets were extremely tough, but our mindset was clear – we wanted to get it,” pahayag ni Perez, na kagagaling lang sa battle-for-third na panalo sa nagdaang Reinforced Conference para makuha ang ika-limang bronze medal sa liga.

Ito ang ikalawang sweep ng Cignal sa kumperensya matapos walisin ang Farm Fresh nung Biyernes sa 25-16, 25-10, 25-18 para makuha ang pagsosyo sa liderato sa 2-0 kartada kasama ang defending champion na Kurashiki Ablaze.

Sinandalan naman ng EST Cola si Warisara Seetaloed na bumida sa 17 points, habang tumapos sina Nattharika Wasan, Tanyaporn Seeso at Natthawan Phatthaisong ng siyam, 7 at 6 na puntos, na natikman ang ikatlong sunod na pagkatalo sa kamay ng Kurashiki at ng Creamline Cool Smashers.  

Cool Smashers kampeon sa PVL Reinforced Conference

ni Gerard Arce @Sports | September 4, 2024

Humataw ng husto ang trifecta ng Creamline Cool Smashers na sina import Erica Staunton, Michele Gumabao at Bernadeth Pons upang itala ang kanilang ika-siyam na kampeonato sa pamamagitan ng pangwawalis sa first-time finalist na Akari Chargers na nagtapos sa 25-15, 25-23, 25-17, Miyerkules ng gabi sa winner-take-all championship ng 2024 Premier Volleyball League (PVL) Reinforced Conference sa Philsports Arena sa Pasig City.

Pinamunuan ng conference MVP na si dating Far Eastern University Lady Tamaraws na si Pons ang iskoring sa pagkarga ng triple-double para sa Cool Smashers sa kabuuang 19 puntos mula sa 14 atake at limang service aces, gayundin 13 excellent receptions at 12 excellent digs, habang sumegunda naman si Staunton sa 13 puntos sa siyam kills, tatlong blocks at isang ace, gayundin si Gumabao na may 10 puntos.

“Lahat ng championship namin proad ako kase pare-pareho rin naman, pero maganda ito kase marami kaming kulang pero nagtulong-tulong ang lahat,” pahayag ni Creamline head coach Sherwin Meneses.

“Marami pa naman kase yung bench namin mga bata pa naman at sana magpatuloy ang achievements ng Creamline,” dagdag ni Meneses patungkol sa kakayanan ng kanilang grupo na makapagwagi ng kampeonato kahit wala ang tatlong pangunahing iskorer mula kina Tots Carlos, Jema Galanza at Alyssa Valdez.

Sumuporta rin para sa Cool Smashers sina Bea De Leon sa walong puntos, Jeanette Panaga sa pitong puntos, at Kyle Negrito sa limang puntos, kasama ang 17 excellent sets na nakuha ang ikatlong sunod na kampeonato at ikalawang Reinforced Conference na huling napanalunan nung 2018.

Nanguna naman para sa Akari si Oluoma Okaro sa 14 puntos na sinundan ni Gretchel Soltones sa siyam puntos, kasama ang pitong receptions at limang digs, habang matamlay naman sa iskoring si Ivy Lacsina na mayroon lamang apat na puntos at siyam na receptions, gayundin si Camille Victoria sa limang puntos at playmaker Kamille Cal sa apat puntos at apat excellent sets.

Ginawaran namang conference Best Setter si Gel Cayuna ng Cignal na nakuha ang ikaapat na parangal, gayundin ang best middle blockers na sina Des Clemente ng Solar Spikers at Majoy Baron ng PLDT High Speed Hitters, habang Best Spikers sina Brooke Van Sickle ng Petro Gazz Angels at Soltones nbg Akari Chargers. Best Opposite hitter naman si Trisha Tubu ng Farm Fresh Foxies at Best Foreign Player si Maria Jose Perez ng Cignal HD Spikers.