Kapatid ni Kai Sotto, nasa UST Volleyball Team na

ni Gerard Arce @Sports | July 10, 2024

Sinelyuhan ng University of Santo Tomas Junior Golden Tigresses volleyball team ang pagtuntong sa koponan ng nakababatang kapatid ni Gilas Pilipinas standout at NBA dreamer Kai Zachary Sotto na si Erin para makuha ang serbisyo sa 88th season ng University Athletic Association of the Philippines (UAAP).

Maituturing na panibagong arsenal ng UST Juniors ang isang lahi na may angkan ng matatangkad para magamit na magpamalas naman sa volleyball court. Nakatakdang magsilbi ng isang taong residency ang 6-foot-3 middle blocker matapos maunang mag-commit sa De La Salle Zobel, habang pormal na kinilala ito ng coaching staff bilang susunod na bigating arsenal sa taraflex court.

Maaaring matugunan din ni Sotto ang puwersang angkin ng Junior Golden Tigresses na kinabibilangan nina Chalsiey Pepito, Aneeza Santos, Lianne Penuliar, Jaila Adrao, Kimberly Rubin at Avril Bron, na pare-pareho ring parte ng Alas Pilipinas Youth squad, habang umakyat  sa women’s side si Margaret Altea.

Pormal nang kinilala at tinanggap ang 15-anyos na middle blocker sa Espana-based volleyball squad matapos iharap kay Institute of Physical Education and Athletics (IPEA) sports director Rev. Fr. Rodel Cansancio O.P, na minsang nasilayan sa WNCAA tournament para sa Zobel volleyball girls.

Marami ring nabigla sa naturang paglipat ng anak ni dating PBA player Ervin Sotto dahil inaakalang magtutuloy ito hanggang sa sistema ni coach Ramil De Jesus para sa women’s division, subalit sinabi ng mga netizen na nanaig pa rin si coach Reyes sa pagsungkit sa future ng Golden Tigresses.

Sakaling magtuloy-tuloy ito hanggang sa collegiate ranks ay maaari itong maging puwersa sa depensa sa angkin nitong tangkad, kasunod na rin ng silver medal finish ng koponan sa nagdaang 86th season, kung saan binansagang “Mini Ms. U” ang mga manlalaro nito.

Murillo, unang foreign player ng Foxies na lalaro sa PVL

ni Gerard Arce @Sports | July 8, 2024

Tinapik ng Farm Fresh Foxies ang kauna-unahan nitong foreign player sa katauhan ni Yeny Murillo ng Colombia upang tumulong sa koponan na makapagbigay ng karagdagang opensiba sa  Premier Volleyball League (PVL) Reinforced Conference sa Hulyo 16 sa Philsports Arena sa Pasig City.

Mayroong malawak na karanasan ang 6-footer na outside hitter na minsang naglaro sa Arizona Western College at Grand Canyon University sa U.S. simula 2017 hanggang 2021.

Nagsimula itong pumasok sa professional league noong 2021 sa Ao Thiras ng Greece at Municipal Olympique Mougins Volleyball sa France noong 2022, habang nagtungo rin ito sa bansang Cyprus para maglaro sa Anorthosis Famagusta sa Czech Republic sa TJ Sokol Frýdek-Místek at muli sa France para sa Rennes EC.

Makakatulong ni Murillo para sa Farm Fresh sina power lefties Trisha Tubu at Caitlin Viray, Kate Santiago, Lorene Toring, Aprylle Tagisip, Ange Legacion, Elaine Kasilag, Pia Ildefonso, Alyssa Bertolano, Rizza Cruz, Joan Narit, ace playmaker Louie Romero at ang hinihintay na pagbabalik ni Jolina Dela Cruz mula sa injury.  

Makakasama ng Farm Fresh ang kampeon na Creamline Cool Smashers at ang Chery Tiggo Crossovers, Galeries Tower Highrisers, Nxled Chameleons at PLDT High Speed Hitters para sa Pool A, habang nasa Group B naman ang defending Reinforced Conference titlist na Petro Gazz Angels kasama ang Akari Chargers, Capital1 Spikers, Cignal HD Spikers, Choco Mucho Flying Titans at ZUS Coffee Thunderbelles.

Unang sasabak si Murillo laban kay American spiker Katherine Bell ng Chery Tiggo Crossovers sa ikalawang laro ng 4 p.m.  sa opening day kasama ang Highrisers na ipaparada ang Brazilian reinforcement na si Monique Helena, laban sa Nxled squad sa unang laro ng 2 p.m.

Hatawan sa PVL Reinforced Conference magbabalik na

ni Gerard Arce @Sports | July 4, 2024

Magbabalik muli ang matinding hatawan sa volleyball court kaakibat ang mga bigatin at talentadong foreign players sa Premier Volleyball League (PVL) Reinforced Conference simula Hulyo 16 sa Philsports Arena sa Pasig City.

Nakatakdang ilatag ng PVL ang panibagong pormat at listahan ng mga bagong manlalaro para sa bigating misyong maiparating ang matitinding mga laro na maghahatid ng saya sa lahat ng mga tagasunod na aabangan ang 12 koponan sa nangungunang pro-league sa bansa.

Nagawang hatiin ang 12 koponan base sa kanilang pwestuhan sa nagdaang All-Filipino Conference, kung saan makakasama ng kampeon na Creamline Cool Smashers ang Chery Tiggo Crossovers, Farm Fresh Foxies, Galeries Tower Highrisers, Nxled Chameleons at PLDT High Speed Hitters para sa Pool A, habang nasa Group B naman ang defending Reinforced Conference titlist na Petro Gazz Angels kasama ang Akari Chargers, Capital1 Spikers, Cignal HD Spikers, Choco Mucho Flying Titans and ZUS Coffee Thunderbelles.

Ilalatag ang isang group phase na mga laro kaakibat ang dalawang estado mula sa single round-robin format na mayroong second round, kung saan hahanapin ng top-three sa Pool A ang bottom three mula sa Pool B para sa Pool C, habang tatapatan naman ng top-3 sa Pool B ang bottom three sa Pool B para sa Pool D.

Mananatiling susundin pa rin ng PVL ang rankings sa FIVB Classification System sa kanilang preliminary round, kung saan aabante ang top-eight sa knockout quarterfinals na ang mananalo ay uusad sa semifinals na pagdedesisyunan para sa do-or-die match.

Ang top two-teams naman mula sa semis ay maglalaban para sa winner-take-all gold medal match habang ang matatalo ay magtutunggali sa bronze medal.

Ang PVL Reinforced Conference ay magtatampok ng tatlong laro sa lahat ng paunang araw ng laro, na magbibigay daan para sa Invitational Conference na itinakda para sa Setyembre.