Larroza at Abellana ilalarga ng Foxies sa PVL

ni Gerard Arce @Sports | July 15, 2024

Handa ng iparada ng Farm Fresh Foxies ang mga bagong pambato na sina 4th pick Maicah Larroza ng La Salle Lady Spikers at second round pick Pierre Abellana ng UST Golden Tigresses para sa Premier Volleyball League (PVL) Reinforced Conference na  magsisimula ngayong Martes sa Philsports Arena sa Pasig City.

Sa kabila ng kinakaharap na bagong hamon sa bagong komperensiya, nananatiling optimistiko ang koponan tungkol sa kanilang mga pagkakataon na palakasin ang pagdating ng dalawang batang manlalaro na maaasahan bilang mga opposite hitters.

Nais ng Foxies na malampasan nila ang 3-8 kartada sa nagdaang All-Filipino Conference na huhugot ng malaking motibasyon mula sa pagkuha ng straight set na panalo kontra Chery Tiggo Crossovers, pagkuha ng isang set laban sa eight-time champion na Creamline Cool Smashers at pahirapan ang two-time finalists na Choco Mucho Flying Titans sa madugong fifth set na harapan.

Paniguradong magagamit ng todo ng Foxies sina Larroza at Abellana sa panibagong transpormasyon sa pagkakaroon ng Japanese coach para magbigay ng agarang epekto pagpasok ng pros kaakibat ang kanilang karunungan sa ibang bagay at pagkakaroon ng mataas na abilidad ng pagtalon.

“Nao-overwhelm ako ngayon and I did not expect to be picked by Farm Fresh. But of course, I am very excited and I am looking forward to work with my future coaches and teammates,” wika ng 5-foot-3 na si Larroza. “With a Japanese coach and Farm Fresh being a young and emerging team, I am very excited na i-share yung skills ko sa kanila and I’m also excited na matuto ng mga bago sa Japanese coach and sa system ng Farm Fresh.”

Gymnast Elaiza Yulo, 2 ginto, NCR Girls Tankers, tig-5 golds

ni Gerard Arce @Sports | July 15, 2024

Medal Tally (as of 4:40pm)   G          S           B 

1.  National Capital Region    48        37        45       

2. Western Visayas                  34        24        27

3. Calabarzon                          33        29        33 

Namayagpag ng husto ang National Capital Region sa elementary girls swimming event matapos ang tig-limang gintong medalya na sinisid nina Sophia Rose Garra ng Malabon City at Alessandra Therese Martin ng Muntinlupa City, habang tig-2 gold medal ang nasungkit ng isang student-athlete mula sa taekwondo, table tennis at gymnastics na kinatampukan sa secondary girls ng nakababatang kapatid ni 2-time Olympian Edriel Carlos “Caloy” Yulo na si Elaiza Andriel Yulo para sa 2024 Palarong Pambansa sa Cebu City.

Solong nilangoy ng De La Salle Araneta University swimmer na si Garra ang 3 gold medal sa 50-meter backstroke, 100m backstroke at 200m individual medley, habang nakipagtulungan ito kina Gabrielle Gayle Ocampo, Adrienne Reese Tacuboy, Rielle Aislyn Antonio at kapwa golden girl na si Martin sa 4x100 at 4x50 medley relay.

Bukod sa dalawang ginto kasama ang mga nabanggit na swimmers, kumarera ang estudyante ng Paref Woodrose School na si Martin ng ginto sa 100-meter butterfly, 50m butterflystroke at 200-meter freestyle para maging pinakamaraming student-athlete na nagwagi ng ginto para sa powerhouse na NCR Region.  

Nakipagsanib-puwersa naman si Carlos Gabriel Docto ng University of Santo Tomas kina Christine Golez at Emmanuel Chris Josh Yamson sa Mixed doubles at doubles sa secondary boys, ayon sa pagkakasunod para sa dagdag na dalawang gintong medalya sa table tennis, habang ang kapwa Thomasian na si Eljay Marco Vista ay sumipa ng mga ginto sa Individual Poomsae Category A (below 59kgs) at Team Poomsae Boys (Group Boys) kasama sina Ateneo Junior High School Jose Lucas Llarena ng QC at John Paul Soriano ng ADT Montessori ng Pasig City.

Nagpamalas ng angking husay ang mga gymnasts ng NCR sa pangunguna ng 14-anyos na si Yulo mula sa Adamson University sa secondary girls sa Individual All Around (C3) at Team Championship.

Cebuana, naka-first gold sa 3000M Girls 64th Palaro

ni Gerard Arce @Sports | July 12, 2024

Itinakbo ng Lapu-Lapu City runner na si Asia Paraase ang kauna-unahang gintong medalya sa 2024 edisyon ng Palarong Pambansa matapos manguna sa 3000m secondary girls event, habang winasak ni Jyane Kirt Cantor ng Central Luzon ang elementary boys Long Jump kahapon sa Cebu City Sports Center. 

Pinagsumikapang maabot ng Pajo National High School student-athlete ang unang gold sa oras na 10:27.36 minuto para sa Region VII, habang sumegunda si Chrishia Mae Tajarros ng Region VIII sa 10:39.72 at pumangatlo si Mary Jane Pagayon ng Region XI  (10:52.72).

“Masaya po ako kasi pride na rin po ito ng Central Visayas. Payback na rin po para sa preparation nila. Masaya rin po kasi hindi lang din po kasi ito para sa akin kundi pati na rin po sa teammates ko,” pahayag ni Paraase, na nagsimulang tumakbo noong Grade 6, kung saan ito ang ikalawang sabak sa Palaro. “Dine-dedicate ko po ito sa sarili ko. Ang dami pong challenges na hinarap, nawawalan na rin po ako ng hope sa sarili ko. Ang saya ko po dahil nagawan ko ng paraan para hindi ako kainin ng kaba at takot.”

Tinalon naman ng Nueva Ecijano trackster na si Cantor ang 6.14 meters upang pagbidahan ang boys long jump at wasakin ang dating rekord na itinala ni Jeremie Tamles ng Davao Region na 6.04 meters noong 2002 Naga edisyon.  

Segunda si Khrispher Kyle Ngirngir ng Region VI sa 5.63meters, sinundan ni Ace Francis Bacongallo ng Region VII sa 5.59m at John Michael Ray Catindoy ng Region II sa 5.58m. Gold medal din sa elementary girls Discus Throw si Ariana Dawn Rabi ng Region I sa 31.21 meters, silver si Precious Rhoevie Andres ng Region II sa 31.14 meters at bronze si Sam Garcia ng Region IV-A sa 28.76 meters.