Mahilig kumain ng cake, donut, fries at pizza, mas madaling magka-COVID

ni Thea Janica Teh | September 20, 2020

Mas malaki ang tiyansang magkaroon ng COVID-19 ang mga taong mahilig kumain ng pagkaing mayaman sa trans fat, ayon sa World Health Organization (WHO).

Tinatayang 49% sa Pilipinas ang namamatay dahil bukod sa COVID-19, nakakukuha rin ng ibang sakit tulad ng cardiovascular disease ang mga taong nasosobrahan sa trans fat.

Nakasaad sa House Bill 7200 at 7202 na ipagbawal ang mga pagkain na mayaman sa trans fat lalo na ngayong panahon ng pandemya. Ginagawa kasing stress-reliever ng mga Pinoy ang pagkain sa fast food chain.

Sa katunayan, ayon sa isang food delivery service sa bansa, naging triple umano ang kanilang kostumer dalawang linggo pa lamang ng quarantine. Dagsa rin ngayong pandemya ang mga relief na canned goods at 3-in-1 coffee, ngunit ayon sa WHO, masama ang madalas na pagkain ng mga ito.

Ang trans fatty acid (TFA) o trans fat ay madalas matagpuan sa meat at dairy products. Mayroon ding trans fat na gawa sa hydrogenation o pagpoproseso ng vegetable at fish oil na makatutulong upang tumagal ang mga pagkain.

Ayon kay Alyssa Bautista, Neurology professor sa Columbia University sa New York, madalas makita ang trans fat sa cookies, donut, cake, chips, crackers, French fries, frozen pizza at marami pang iba.

Kaya naman pinaalalahanan ng WHO na hindi dapat tataas sa 2.2 grams kada araw ang pagkain ng mga mayayaman sa trans fat. Aniya, ugaliin pa rin ang pag-eehersisyo kahit nasa loob ng bahay at pagkain ng masusustansiyang pagkain.

Kung cheese lover ka, read mo na!...

keso, panlaban sa heart disease, diabetes at pampababa pa ng cholesterol

ni Justine Daguno - @Life and Style | August 15, 2020

Say cheese! Marami sa atin ang mahilig sa cheese—pang-toppings o panlagay sa spaghetti, pizza, salad, palaman sa tinapay o kahit papakin lang ay panalo talaga!

Sabihin man ng iba na ito ay ‘unhealthy’ sapagkat nagtataglay ito ng saturated fat. Pero alam n’yo ba na ayon sa pag-aaral, ang tamang pagkonsumo ng keso ay maraming magandang benepisyo sa atin? Narito ang ilan sa mga ito:

1. PANLABAN SA HEART DISEASE. Ang pagkonsumo ng 2 ounces o 1-inch cube ng cheese araw-araw ay maaaring makatulong upang maiwasan ang iba’t ibang heart disease. Ito ay dahil ang keso ay nagtataglay ng iba’t ibang bitamina tulad ang calcium, potassium at magnesium, riboflavin at B12.

2. PANG-IWAS SA DIABETES. Para sa mga taong mayroong ‘sweet tooth’ o mahilig sa pagkain ng matatamis, oks kung kahihiligan din ninyo ang keso. Ang pagkain ng 1 3/4 ounces ng cheese kada araw ay nakatutulong upang mapababa ang risk sa pag-develop ng Type 2 diabetes nang hanggang walong porsiyento. Ang calcium umano na tinataglay nito ay malaki ang epekto upang mapanatiling normal ang insulin sa katawan ng tao.

3. MABUTI PARA SA CHOLESTEROL. Ang araw-araw din na pagkain ng cheese ay nakatutulong upang mapababa ang cholesterol ng tao. Ayon sa pag-aaral, bagama’t nagtataglay ito ng kaparehong amount ng saturated fat at calories, ang mga ‘cheese eaters’ ay hindi hamak na mas mababa ang LDL cholesterol kumpara sa mga taong mas pinipili ang butter o margarine.

4. NAKAPAGPAPALAKAS NG KATAWAN. Ang pagkain ng halos isang tasa ng ricotta cheese sa isang araw sa loob ng 12 linggo ay nakatutulong upang mapalakas ang kalamnan lalo na sa matatanda o may edad 60 pataas. Sa resulta ng isang pag-aaral noong 2014 sa Clinical Interventions, ipinapayo sa matatanda ang regular at tamang pagkonsumo ng keso sapagkat ito ay milk protein base na hindi lamang nakapagpapatibay ng mga buto kundi nakapagpapalakas talaga ng katawan.

‘Ika nga ng mga ‘cheese lovers’, “The cheesier, the better!” Totoo na ang paborito nating keso ay hindi lang para talaga masarap, kundi sobrang oks din dahil marami pala itong magandang benepisyo sa ating katawan. Pero siyempre, tulad ng ibang pagkain, dapat hinay-hinay pa rin dahil alam naman natin lahat ng sobra ay hindi rin maganda. Tandaan na moderation ang kailangan sa anumang bagay. Okie?!

Tips para bumenta ang pagkain sa online selling

ni Jersy Sanchez - @No Problem| August 15, 2020

Maraming nawalan ng hanapbuhay, kaya naman marami sa atin ang naging instant online seller ng iba’t ibang mga produkto. Numero-unong ibinebenta ay mga pagkain, mula sa silog meals, meryenda at mga ulam. Kaliwa’t kanan din ang bentahan ng pastries at marami pang iba.

Kaya ang tanong ng online sellers, ano ang epektibong marketing strategy para mapansin at makabenta sa netizens gayung maraming option o kakumpetisyon?

1. MASARAP NA PAGKAIN. Siyempre, mas mabenta ang pagkain kung masarap ito at gumamit ng de-kalidad na produkto dahil dito nakabase ang quality ng iyong lulutuin. Maganda rin kung orihinal mong recipe ang iyong gagamitin o ibebenta dahil malaking puntos ito para sa mga customer na mahilig sumubok ng iba’t ibang pagkain.

2. REASONABLE PRICE POINT. Hindi puwedeng magpresyo ka lang depende sa gusto mo o dahil gusto mo lang tapatan ang presyo ng ibang sellers. Kailangan mong gawin nang tama ang costing depende sa ingredients na ginamit mo.

Tandaan, isa sa mahalagang hakbang ito dahil kailangan mong maipakita na worth it ang iyong produkto base sa presyo nito.

Isa pang tip, humanap ng mapagkakatiwalaang supplier para makakuha ng murang supplies o ingredients na may magandang kalidad.

3. ATTRACTIVE PHOTOS. Dahil mas madaling ma-attract ang tao kapag may visuals, kailangan mo ng actual photos ng iyong mga produkto. Mahalaga na original photos ang iyong gagamitin para madali mo itong ma-edit para sa poster o menu kung may iba ka pang ibinebentang pagkain.

4. FREE SAMPLES. Kung nagsisimula ka palang at gusto mong makilala pa ang iyong mga produkto, okay ding mamigay ng samples. Kanino? Well, puwedeng sa mga kaibigan o kakilala mo. Puwede mong hingin ang kanilang opinyon hinggil sa iyong produkto nang sa gayun ay malaman mo kung ano pa ang puwedeng i-improve nito, gayundin, kung puwede na itong isama sa iyong menu.

Kung may existing ka nang products, puwede ka namang magbigay ng ilang sample sa mga nag-order sa ‘yo para matikman nila ito at maka-order agad kung magugustuhan nila.

Pagdating sa online selling, kailangan talaga nating mag-level up. Dahil maraming kapwa online sellers at potential buyers, dapat tayong maging malikhain at mapamaraan para maging mabenta ang ating produkto.

Kaya kung ikaw ay nagsisimula o nagbabalak sumabak sa online selling ng anumang produkto, sundin lamang ang tips na ito. Okie?