Sunud-sunod ang serye, pamilya nabigyan na ng bahay at negosyo… COCO, TAOB NA SINA PIOLO AT JOHN LLOYD SA DAMI NG PROPERTIES

ni Erlinda Rapadas @Teka Nga | Nov. 19, 2024

Photo: Coco Martin, Piolo Pascual at John Lloyd Cruz

Hindi na nga maawat ang kasikatan at pagyaman ngayon ni Coco Martin dahil sa sunud-sunod na seryeng kanyang pinagbidahan, ang Juan dela Cruz, Ang Probinsyano (AP) at Batang Quiapo (BQ). 

Highest-paid endorser din siya at malalaking produkto ang kanyang ine-endorse. 

Kung pagbabatayan ang kanyang kinikita sa serye, pelikula at mga endorsements, daig na ngayon ni Coco sina Piolo Pascual at John Lloyd Cruz sa dami ng properties na kanyang naipundar. 

Lumaki sa hirap si Coco kaya masipag at madiskarte. Lumaki siya sa poder ng kanyang lola na masipag na negosyante. Ang lola niya ang naging idolo ni Coco, kaya nagsikap siya sa buhay. 

Nagsimula siya sa showbiz nang lumabas sa mga indie films, hanggang sa napadpad sa bakuran ng ABS-CBN, kung saan naging ganap siyang malaking artista. 

Co-producer, director at actor si Coco sa AP at BQ, kaya malaki ang kanyang kinikita at nakapagpundar ng negosyo at mga properties. At dahil sinuwerte, nag-share siya ng blessings sa kanyang mga kapatid. Binigyan niya ng sariling bahay ang apat niyang kapatid. 

Binigyan din niya ng negosyo ang mga ito upang maitaguyod ang kanilang pamilya. Ganoon kabait na kapatid si Coco Martin, kaya tuluy-tuloy ang kanyang suwerte.

---

Kuntento raw sa GMA-7…

RHIAN, 'DI LILIPAT SA ABS-CBN

Rhian Ramos - IG

Mismong si Rhian Ramos ang nagsabing hindi totoo ang balitang nagkaroon siya ng pag-uusap sa mga big bosses ng ABS-CBN para sa kanyang paglipat. 

Masaya na raw siya at kuntento sa pangangalaga ng GMA Network, at wala siyang balak na lumipat sa ibang TV stations, lalo na ngayon na kasama siya sa pantaseryeng Sang’gre: The Encantadia Chronicles.

Nakapag-taping na raw siya ng ilang araw at excited siya sa kanyang role. Masaya si Rhian na makatrabaho ang mga bagong henerasyon ng mga Sang'gres. 

Habang naghihintay sa pag-resume ng taping sa Encantadia, tumatanggap muna si Rhian ng pelikula. At isa na rito ang ‘Wag Mo 'Kong Iwan (WMKI) na idinirek ni Joel

Lamangan. Nagsisilbing hamon kay Rhian ang role na kanyang ginagampanan. 

Masaya ang love life ni Rhian Ramos ngayon at tatlong taon na ang relasyon nila ng partylist congressman na si Sam Verzosa. Kumakandidato ngayong midterm election si SV bilang mayor ng Maynila at makakalaban niya sina Isko Moreno at Honey Lacuna.

---

BLOOMING ngayon si Azenith Briones, kaya tinutukso siya ng mga kaibigan na baka in love. 

Pitong taon na ring biyuda si Azenith at malalaki na ang apat niyang anak at may sarili nang pamilya.

Likas na masipag, masinop at business-minded si Azenith, kaya nakapagpundar ng mga properties. Nag-e-enjoy na lang siya sa pagta-travel abroad, kasama ang pamilya at mga kaibigan. 

Pero, may chika na may ardent suitor ngayon si Azenith na isang rich foreigner, at hindi sila nagkakalayo ng edad.

For sure, guwapo ito dahil pumasa kay Azenith. LDR (long distance relationship) daw sila at next year ay muling magkikita dahil bibiyahe ang aktres pa-USA sa January. 

Well, deserve naman ni Azenith na magkaroon ng love life upang may makasama siya sa kanyang pagtanda. Hindi na siya pumupunta sa casino ngayon upang hindi na sila magkaproblema ng kanyang mga anak. 

Negosyo ang pinagkakaabalahan ngayon ni Azenith Briones at kumikita sa pagbebenta ng mga properties.

---

HINDI naawat ang lady producer na si Marynette Gamboa na sumugal upang i-produce at gawin ang pelikulang IDOL: The April Boy Regino Story na idinirek ni Efren Reyes, Sr.. 

Bago nag-pandemic noong 2020 ay handa na ang lahat para sa shooting ng nasabing pelikula. Pero inabot ng COVID pandemic na tumagal ng tatlong taon kaya pansamantalang nakansela ang shooting ng movie. 

Gayunpaman, may pangako si Ms. Marynette sa pamilya ni April Boy Regino na kahit ano'ng mangyari ay itutuloy at tatapusin ang movie, at maayos na natapos ang pelikulang kanilang pinaghirapan. 

Bagama't hindi sila pinalad makapasok sa MMFF 2024, maaga naman itong mapapanood sa mga sinehan. Showing na ang IDOL: The April Boy Regino Story sa November 27. Ang baguhang aktor na si John Arcenas ang gumanap bilang si April Boy.

Kasama rin sa movie sina Irene Celebre, Kate Yalung, Dindo Arroyo, Rey "PJ" Abellana, at may special role ang Jukebox Queen na si Imelda Papin. 

Buo ang paniniwala ni Marynette ng WaterPlus Productions na tatangkilikin ng mga tagahanga ni April Boy Regino ang pelikula. Dito malalaman ang mga hirap na kanyang pinagdaanan bago siya sumikat.

Dedma na may Barbie na ang ex-mister… RICHARD, ‘DI KAWALAN KAY SARAH

ni Erlinda Rapadas @Teka Nga | Nov. 18, 2024

Photo: Barbie, Richard at Sarah - Manila Restaurant - IG Sarah Lahbati

Marami ang nagtataka kung bakit tila ‘unbothered’ si Sarah Lahbati sa kanyang sitwasyon nang maghiwalay sila ni Richard Gutierrez.

Wala naman siyang post sa socmed (social media) na regular na nagbibigay ng sustento si Richard sa dalawa nilang anak. 

Ang masasayang bonding sa mga kaibigan at ang pamamasyal nilang mag-ina abroad ang laging post ni Sarah sa socmed. Patunay lamang ito na masaya si Sarah sa kanyang pagiging single ngayon. 

Nagkaroon siya ng panahon para sa kanyang sarili at nag-e-enjoy kasama ang mga kaibigang sina Kathryn Bernardo, Sofia Andres, atbp. niyang non-showbiz friends.

May mga negosyong naipundar si Sarah na kumikita na nang milyones ngayon, kaya hindi na niya problema ang gastusin ng dalawang anak. At balewala rin kay Sarah kung i-display man ni Richard ngayon ang relasyon nila ni Barbie Imperial, hindi siya insecure at alam niya ang kanyang mga karapatan. 

Hindi na rin siya naghahabol ng sustento kay Richard para sa dalawa nilang anak. Ang mahalaga kay Sarah ay nagkaroon siya ng kalayaan na kumilos at magdesisyon para sa kanyang sarili. 

Suportado si Sarah Lahbati ng kanyang mga magulang at kapatid. Kung anuman ang pinagdaraanan niya ngayon sa kanyang personal na buhay, may pamilya at mga kaibigan siyang handang dumamay.

---

BFF pa naman ng anak, nang-iwan pa rin… 

AI AI, NAGPAKASAL KAY GERALD DAHIL SA PAYO NI SANCHO

Sa isang lumang interbyu ni Ai Ai Delas Alas, naikuwento niyang ang anak niyang si Sancho ang nagpakilala sa kanya kay Gerald Sibayan. Parehong badminton players noon sa De La Salle sina Sancho at Gerald. Dito nagsimula ang panliligaw ni Gerald sa Comedy Queen. 

Nang maging magkarelasyon na sina Ai Ai at Gerald, si Sancho mismo ang nagpayo sa kanyang ina na magpakasal na kay Gerald upang magkaroon ng tahimik na pamilya. 

Pagkatapos ng kasal, naghabilin si Sancho kay Gerald na mahalin at huwag sasaktan ang kanyang ina. 

Ngayong hiwalay na sina0 Ai Ai at Gerald, hindi kaya sinisisi ni Sancho ang kanyang sarili kung bakit naipakilala pa niya si Gerald sa kanyang ina? At hindi na rin sana niya pinayuhan ang Comedy Queen na magpakasal kay Gerald upang hindi na gaanong nasaktan ang kanyang ina. 

Maraming naisakripisyo si Ai Ai sa larangan ng pag-ibig. Todo-bigay siya kung magmahal, pero madalas pa rin siyang nasasaktan at iniiwan ng mga lalaking minahal niya. 

Sa ngayon, ang tanging magagawa ng mga anak ni Ai Ai ay damayan siya at bigyan ng moral support. May career pa rin naman siya at marami pang blessings ang darating sa kanya, marami siyang natulungan, at ‘yun ang good karma niya. Makaka-move on pa rin siya at may magandang kapalit ang kanyang mga kabiguan sa pag-ibig.

---

Marami ang nagtatanong kung bakit hindi pa nagkakaroon ng boyfriend ang Kapuso actress na si Sanya Lopez.

Sexy naman siya at maganda, sweet din at mahusay makisama sa lahat ng kanyang nakakatrabahong artista. For sure, may mga secret admirers din na nakikiramdam at gustong manligaw kay Sanya. Pero nakikita nilang sobrang busy at goal-oriented ang aktres, kaya hindi naitutuloy ang panliligaw. 

Career ang priority ni Sanya at marami siyang plano sa buhay. Hindi rin siya nagmamadali na magka-boyfriend. Inuna muna ng Kapuso actress ang pagpupundar ng bahay at sasakyan. Gusto rin niyang maging financially stable, kaya sinasamantala niya ang mga oportunidad na dumarating.

Isa si Sanya Lopez sa mga lead stars ng historical seryeng Pulang Araw (PA), kasama sina Alden Richards, Dennis Trillo, Barbie Forteza, David Licauco, atbp..

Hinahasa niya nang husto ang kanyang acting skills upang makaganap sa iba’t ibang roles. Choice niyang gawing prayoridad ang kanyang career, at kahit loveless, hindi naman malungkot ang kanyang buhay.

Nang magbakasyon sa Canada… ARIEL, NAPAGKAMALANG TATAY AT BODYGUARD NI GELLI

ni Erlinda Rapadas @Teka Nga | Nov. 17, 2024

Photo: Ariel at Gelli - socmed

Malaki ang iginanda at ibinata ng hitsura ngayon ni Gelli de Belen, hindi mo aakalain na may mga binata na siyang anak. 

Mismong ang King of Talk na si Boy Abunda ang humanga kay Gelli nang mag-guest sa birthday episode ni Abunda sa Fast Talk with Boy Abunda (FTWBA) kasama ang mister nitong si Ariel Rivera. 

At habang nagtatagal ang pagsasama nina Ariel at Gelli, lalong nagmumukhang bagets ang aktres. 

Kuwento nga ni Ariel, napagkamalan siyang tatay ni Gelli noong nagbakasyon sila sa Canada. At nu'ng minsan naman, napagkamalan din siyang bodyguard ng misis.

Happy ang married life ni Gelli, kaya mukha siyang bata at maganda pa rin, at ang sikreto raw ng kanilang matagal na pagsasama ni Ariel ay hindi sila nag-aaway. Kung may mga bagay na hindi nila mapagkasunduan, idinadaan nila sa diskusyon at hindi nauuwi sa away. Pareho rin silang hindi seloso-selosa at may tiwala sa isa’t isa.

---

'Di na lang sila pang-love team…

MAY-EDAD NANG AKTRES, BUMIBIGAY NA SA ACTOR-POLITICIAN NA SUPER GENEROUS MAGREGALO 

BLIND ITEM:

MARAMI ang nagsasabing hindi lang pang-promo sa kanilang serye ang panunukso ngayon sa may-edad nang aktres at sa actor-politician. 

Ayon sa ilang malapit sa actor, type niya ang magandang aktres kahit medyo may-edad na ito. Wala namang magiging problema dahil single ang status ng veteran actress. 

Noong kanyang kabataan at kasikatan, kinababaliwan at pinagpapantasyahan siya ng maraming aktor. 

Sa isang guwapong action star siya umibig at nagkaroon ng mga anak. Pero ngayon ay may sariling pamilya na rin ang mga anak ng magandang aktres, kaya naghahanap siya ng kalinga at pagmamahal. 

May mga umaaligid na gustong manligaw sa may-edad nang aktres, pero medyo choosy pa siya at nag-iisip kung muli siyang makikipagrelasyon. 

Kaya nagtanung-tanong muna siya sa ilang kaibigang artista tungkol sa background ng actor-politician na pumoporma ngayon sa kanya. Kilala rin kasing matinik sa chicks ang machong actor-politician. 

Dalawang beauty queens-actresses ang kanyang mga ex-GFs. At lately, mukhang bumibigay na ang may-edad na aktres matapos makausap ang beauty queen-actress na dating nakarelasyon ng actor-politician na napaka-generous daw kung magregalo. 

Hihintayin na lang ang pag-amin nila sa publiko.

---

LABIS na ipinagpapasalamat ni ER Ejercito ang pagdamay ng mga kasamahan niyang artista noong pumanaw ang kanyang kabiyak na si Maita Sanchez dahil sa kanser.

Dating mayor ng Pagsanjan si Maita, at ito ang balwarte ng mga Estrada, kaya rito siya ibinurol. 

Dumating at nakiramay kay ER Ejercito sina Sen. Bong Revilla, Jr., Sen. Jinggoy Estrada, Phillip Salvador, Azenith Briones, atbp..

Nagluluksa man sa pagpanaw ng kanyang asawa, kailangan ni ER na maging matatag para sa kanyang mga anak. At marami siyang dapat ayusin ngayong kumakandidato siyang mayor ng Pagsanjan, Laguna. 

Dati nang nanungkulan na gobernador ng Laguna si ER. Malaki ang malasakit niya sa Pagsanjan, kaya muli niyang itutuloy ang mga proyektong nasimulan niya. At alam niyang gagabayan siya ng yumao niyang asawa na si Maita Sanchez.

---

TWENTY-NINE years nang umeere sa GMA-7 ang Bubble Gang. Kaya, kakaibang episode ang handog ng show sa kanilang mga loyal viewers. 

Two-part special ito na may kakaibang concept dahil sinamahan ng musical numbers at mga original Tagalog songs na binali at binigyan ng bagong areglo upang maaliw at maka-relate ang mga viewers ng Bubble Gang.

Kaya hindi boring panoorin ang BG dahil lagi silang may mga bagong idea at sumusunod kung ano ang uso sa henerasyon ng mga GenZ. 

Malaking hamon sa buong cast ng Bubble Gang ang makapagpasaya sa halos tatlong dekada nilang pamamalagi sa ere.