Nagsasabi lang daw ng totoo… JOJO, ‘DI TAKOT IDEMANDA NI MARK

ni Janiz Navida @Showbiz Special | Mar. 26, 2025

Photo: Jojo Mendrez via Bulgar

Nagpatawag ng emergency mediacon kahapon ang controversial singer-businessman na si Jojo Mendrez, ang tinaguriang The Revival King na kumanta ng Nandito Lang Ako, para once and for all ay tapusin na raw ang lahat ng isyung nag-uugnay sa kanila ng The Bad Boy ng Dance Floor na si Mark Herras.

Aminado ang singer na na-hurt siya sa bigla na lang pang-iiwan sa kanya ni Mark sa ere last Sunday nu'ng supposed to be ay magpe-present sila ng award sa PMPC's 38th Star Awards for TV, pero bigla na lang daw nagpaalam ang aktor na magsi-CR lang at hindi na bumalik.

Kaya last minute, tinawagan naman daw ng team niya si Rainier Castillo at ito na nga ang nakasama niya the whole night.

Sumama ang loob ni Jojo sa ginawa ni Mark kaya tinext daw niya ito ng mahabang mensahe ng pamamaalam at pasasalamat sa kanilang pagkakaibigan, pero imbes sorry at explanation, thumbs up lang daw ang reply ng aktor.

Kaya lalong na-hurt si Jojo at nagpatawag nga ng press para linawing never daw talaga silang nagkaroon ng relasyon ni Mark, at anumang pinansiyal na tulong na ibinigay niya sa aktor ay wala raw siyang hininging kapalit. 

Ayon kay Jojo, inamin sa kanya ni Mark na may anxiety at depression ito at dahil sa awa kaya hindi siya makatanggi sa aktor tuwing dumadaing ito sa kanya na walang pera.

Ang ikinasasama lang ng loob ni Jojo, sa lahat ng nagawa niya para kay Mark, na bukod sa nabigyan niya ng mga raket ay nagkautang pa pala sa kanya ng more or less P1 million, bigla nga siyang iniwan nang wala man lang pasabi.

Kuwento pa ni Jojo, ikinagulat nga rin niya ang inasal ni Mark nu'ng nasa Luxent Hotel sila bago pa ang Star Awards for TV sa Dolphy Theater ng ABS-CBN.

Habang magkakasama raw sila, bigla na lang siyang inaway at sinumbatan nito dahil nalaman daw ni Mark mula sa misis nito na binigyan niya ng cellphone si Rainier Castillo na isa pang nali-link sa kanya ngayon.

Binantaan pa nga raw siya ni Mark ng “‘Pag ako naetsapuwera rito, susunugin ko ang bahay mo,” at narinig daw ‘yun ng mga managers niya.

Tinanong namin si Jojo kung hindi ba siya nag-aalala na resbakan ni Mark ng demanda dahil sa mga sinabi niya at sagot nito, “Bakit naman ako matatakot, ako pa nga ang dapat magdemanda dahil sa pagbabanta niya sa aking susunugin niya ang bahay ko?”

Well, side ni Jojo ‘yan, at bukas pa rin naman kami sa paliwanag ni Mark Herras sa lahat ng ibinulgar laban sa kanya ng Revival King.

Anyway, after this controversy, gusto na lang daw mag-focus ni Jojo sa promo ng kanyang Nandito Lang Ako original song na composed by Jonathan Manalo at released ng Star Music kaya no wonder na malakas ang dating sa mga listeners at talagang nakaka-LSS (last song syndrome).

After Nandito Lang Ako, naka-line-up na ring i-record ni Jojo Mendrez ang Tamis ng Unang Halik, I Love You, Boy at Pare, Mahal Mo Raw Ako.

---

LOLO pala sa talampakan (great-great grandfather) ng former beauty queen na si Ms. Evangeline Pascual ang dakilang makata na si Francisco Baltazar a.k.a. Francisco Balagtas, ang lumikha ng epic poem na Florante at Laura.

Nabanggit ito sa amin ni Ms. Evangeline nang dumaan siya last Thursday (March 20) sa ginanap na Pandesal Forum sa Kamuning Bakery na pag-aari ng kasamahan naming si Wilson Flores para sa advanced celebration ng World Poetry Day nu’ng Biyernes (March 21).

Ayon sa former beauty queen, dumaan lang siya para magbigay ng suporta sa kaibigang award-winning poet na si Prof. Vim Nadera na present sa event kasama sina National Artist for Literature Prof. Dr. Gemino Abad, accompanied by his daughter, Ateneo de Manila University educator Cyan Abad Jugo.

Nabanggit sa amin ni Ms. Evangeline na maglalabas siya ng sariling libro kung saan du’n daw mababasa ang istorya ng kanyang buhay at abangan n’yo na lang ang pasabog tungkol d’yan dahil this year din daw niya ilalabas ang naturang book. 

Samantala, para sa pagdiriwang nga ng World Poetry Day, nagpa-sample ng kani-kanilang likhang tula sina Dr. Gemino at Prof. Nadera at ipinaalala sa mga kabataan at kasalukuyang henerasyon ang kahalagahan ng tula sa ating pamumuhay.

Nang mahingan ng payo si Dr. Abad para sa next generation of poets, aniya, “Work on your language the way the farmer works on his land," emphasizing the importance of linguistic mastery and imaginative expression. 

Nakakabilib naman ang mga estudyante ng Neptali A. Gonzales High School sa Mandaluyong na sina Queen Jeramay R. Saldivar, Aries King T. Federis, and Pearl Mae Angela Cabudlan sa kanilang ipinamalas na balagtasan under the guidance of their teacher Jayson A. Cruz and supported by their principal Dr. Corazon Regino. At hindi rin nagpatalo si Sir Wilson ng Kamuning Bakery dahil kahit may dugong Chinese, magaling din pala itong gumawa ng tula na ipinamalas niya sa mga dumating na guests.

Sikat na dancer, sirang-sira raw ang imahe… AC, BUKING SA PBB ANG PAGIGING MARITES AT TOXIC

ni Ambet Nabus @Let's See | Mar. 26, 2025

Photo: AC Bonafacio - PBB

Sumisigaw ang ilang netizens na tuluyan na raw nasira ang imahe ni AC Bonifacio nang dahil sa Pinoy Big Brother (PBB) Celebrity Collab Edition.  

Sa patuloy daw kasing pagdami ng mga isyung ibinabato rito kagaya ng mga tsismis sa ibang housemates, ang backstabbing, ang pagdamay sa ibang wala naman sa loob at iba pang Marites kumbaga, obyus na hindi ito nakakatulong sa image ng kilalang dancer.  

Mula kina Criza Taa at Harvey Bautista, hanggang sa dating PBB housemate na si Ylona Garcia na umano’y na-bully din nang wagas ni AC kaya hindi na bumalik ng bansa, at iba pang hanash ng pagka-Mosang nitong si AC, wala kaming nababasang magandang komento maging ang pagiging inglesera niya.  

Laking-Canada si AC bago pa man nakilala sa socmed nang dahil sa dancing ability nito, tapos ‘yun na nga, sa socmed din siya nahusgahan ng pagiging ‘toxic’.

Ang siste, mas na-magnify ito ngayon dahil sa PBB kung saan mas marami ang nakakapanood at nakakahalata ng kanyang mga galawan.  

Kung bahagi naman daw ng isang mahalagang ‘script’ si AC Bonifacio para mas pag-usapan ang Bahay ni Kuya, puwes, paghandaan na raw po natin ang iba pang malalaki at iskandalosong drama soon!

---

MARAMI naman ang naaaliw sa naging acceptance speech ni Janine Gutierrez nang manalo ito sa PMPC Star Awards for TV.  

Bukod sa acting award ay itinanghal na Female Celebrity of the Night ang napakaganda at seksing aktres, counterpart ni Dingdong Dantes bilang Male Celebrity of the Night.  

Sa kanyang acceptance speech ay sinabi nitong may maiuuwi na siyang sobre at bulaklak, na ikinaaliw ng mga nasa venue, kasama na si Kim Chiu na isa sa mga hosts that night.  

Sa isang video na napanood namin, makikitang itinataas pa ni Janine ang sobre habang tumitingin sa side nina Kim at co-host nito, kaya napahagikhik naman ang Chinita Princess.  

Nanalo ring Best Supporting Actress si Janine para sa series na Lavender Fields (LF) kung saan first time niyang naging kontrabida kasama ang boyfriend na si Jericho Rosales at si Jodi Sta. Maria.  

Si Kim naman ang itinanghal na Best Actress para sa Linlang series kasama si Paulo Avelino, na kapwa niya winner bilang Power Couple, kaliga ng co-winner nilang BarDa na sina Barbie Forteza at David Licauco.

---

SPEAKING of Papa Dong (Dingdong Dantes), isa nga siya sa mga biggest winners sa Star Awards for TV dahil bukod sa Male Celebrity of the Night ay nanalo rin siyang Shining Male Star of the Night (si Julie Anne San Jose naman sa babae).

Pero ang pinakabongga nga sa mga nakuha niya ay ang pagiging Best Game Show Host para sa Family Feud (FF).  

Sey ni Papa Dong, “Iba ang high ng ganitong recognition. Truly a valuable one.”

Sa tinagal-tagal na kasing umeere sa Pilipinas ng FF, very consistent si Papa Dong sa pagkakaroon ng recognition bilang mahusay na host nito, with all due respect sa mga nauna nang naging hosts ng show gaya nina Ogie Alcasid, Edu Manzano, Richard Gomez at Luis Manzano.  

Sa kasalukuyan ay laging nagtatala ng mataas na rating ang show sa Kapuso Network at isa nga ito sa mga pambato ng GMA-7.  

Tuluy-tuloy lang ang maganda at very smooth-sailing na takbo ng career ni Papa Dong na very soon ay may series na lalabas this year, may movie with Charo Santos at isa pang undisclosed project.  

And yet, sa gitna ng lahat ng mga ito ay ang umiikot na tsika na pinaghahandaan na rin daw nila ni Yan (Marian Rivera) ang pagkakaroon ng third child?  

Hmmm... parang not in the near future pa ito. Hahaha!

Madlang pipol, shocked na nainlab sa kanya ang aktor… NIKKI, UMAMING NA-TRAUMA SA RELASYON NILA NI TROY

ni Vinia Vivar @Frankly Speaking | Mar. 26, 2025

Photo: Nikki Valdez at Troy Montero - Instagram

Matinding trauma pala ang naranasan ni Nikki Valdez noong time na karelasyon niya si Troy Montero.  

Nag-guest ang aktres sa Fast Talk with Boy Abunda (FTWBA) at dito ay napag-usapan nila ang past affair niya with Troy noong mga panahong dalaga at binata pa sila.  

“Alam mo naman na ‘to, Tito Boy, at saka, pinag-uusapan na lang natin ‘to, ha? Hindi na para maapektuhan pa tayong lahat,” paglilinaw niya muna.  

Noong time na karelasyon daw niya si Troy ay nasa peak ang aktor ng career nito at napakarami raw na-shock na nagustuhan siya nito.  

“During that time, it was his peak, the peak of his career and ang daming na-shock na ‘Ha? Bakit s’ya?’ Bakit daw ako, ‘di ba?  

“Umabot pa nga sa point na may reference pa silang ang foreigner, mahilig sa kamukha ko. Yeah, may ganu’n nu’ng time na ‘yun,” kuwento ni Nikki.  

“That was so painful for me, especially my family. My kuya then was in college and I remember he told me, napanood niya ‘yung isang interview sa TV na ‘yun na nga, ‘yung parang ‘Bakit si Nikki Valdez? Ang mga foreigner talaga, ang hilig sa mga mukhang ganyan!’ So, nasaktan ‘yung kuya ko for me,” pagre-recall ng aktres.  

Umabot na raw sa point na hindi na raw sila bumibili ng diyaryo at hindi na raw siya nagbabasa ng entertainment section.  

“Na-trauma talaga ako,” sambit niya.  

“Siguro kung that happened in this generation, ‘yung sinasabi nila na ‘yung mental health ko, bagsak, negative talaga. Kasi, hindi ko alam paano umabot sa ganu’n.  

“Eh, siyempre, nu’ng time na ‘yun, in love lang tayo. Tao lang naman tayo. And I believe na ours was a genuine kind of love,” tsika ni Nikki.  

As we all know, happily married na ngayon si Troy kay Aubrey Miles while Nikki naman got married to her 2nd husband, Luis Garcia in 2018.

---

Hindi napigilang maging emosyonal ni Quezon City 1st District Representative re-electionist Arjo Atayde sa kanyang State of the District Address (SODA) na ginanap last Monday sa SM North Skydome.

Naging napakaganda kasi ng pagtanggap at suporta ng mga tao sa kanyang pagpasok sa pulitika, kaya naman naging maganda rin ang kanyang performance.

Napaiyak ang aktor-pulitiko habang nagpapasalamat sa suportang natatanggap niya mula sa kanyang constituents at mga kasamahan na rin mula sa pulitika at showbiz industry. Kasama na rin dito of course ang kanyang pamilya at misis na si Maine Mendoza.

“Wala ako rito kundi dahil sa inyong tiwala, isang tiwalang hindi ko kailanman sisirain,” naiiyak niyang wika.

Sa loob ng 3 taong pag-upo ng first-time public servant, nakakabilib na napakarami niyang nagawa sa kanyang distrito. Una na nga rito ang kanyang signature program na “Aksyon Agad” na napakaraming natulungan.

“Sa ilalim ng Aksyon Agad, naisakatuparan natin ang mga programang may direktang epekto sa pang-araw-araw na buhay ng ating mga mamamayan,” aniya.

Sa kanyang speech, inisa-isa ni Cong. Arjo ang kanyang accomplishments at kabilang dito ang 60 dialysis patients a day receiving free treatment at the district’s new facility, 75,466 individuals provided with medical assistance, 4,598 students receiving CHED educational aid at napakarami pang iba. 

Aniya, “Sa bawat pisong inilalaan ng gobyerno para sa ating distrito, sinisigurado nating walang nasasayang—lahat ay napupunta sa programang direktang makakatulong sa inyo.

“Public service is not about grand gestures or sweet words—ito ay ang mabilis, epektibo, at tunay na pagtugon sa pangangailangan ng tao…”

Sa huli ay nangako si Arjo na lalo pa siyang magsusumikap sa mga darating na araw bilang pasasalamat sa tiwalang ibinigay sa kanya.

“Sa bawat araw na lumilipas, patuloy kong pinagsisikapan na patunayan na karapat-dapat ako sa pagkakataong ibinigay ninyo sa ‘kin… Maraming-maraming salamat, Distrito Uno! Thank you for believing in me; I won’t let you down,” sey ni Arjo.