Mga nahatulang Pinay surrogate mom, tulungan

by Info @Editorial | Dec. 6, 2024

Pinagsisikapan ngayon ng ating gobyerno na mapauwi ang 13 Pinay surrogate mothers na convicted sa Cambodia.

Ayon sa Department of Foreign Affairs (DFA), sa kabila ng conviction, napagaan ang parusa laban sa mga Pinay. Ito ay dahil sa halip na 20 taong pagkabilanggo sa ilalim ng surrogacy ban ay trafficking na lamang ang ikinaso sa kanila at mula sa apat na taon ay ginawang 2 taon na lamang ang kanilang parusa ng Phnom Penh.

Dalawa sa mga Pinay ang nanganak na kaya inaayos na rin ang pagkupkop sa kanilang sanggol sa pakikipagtulungan sa Department of Social Workers and Development (DSWD) at Department of Justice (DOJ).

Napag-alaman na ang 13 surrogate mothers ay na-recruit online sa pamamagitan ng private messaging o texting ng isang ahensya na nakabase sa Pilipinas. Wala rin umanong direktang pag-uusap ang mga Pinay sa kanilang kliyente dahil hawak ng third party agency representative ang lahat ng kanilang transaksyon.

Nawa’y magsilbi itong babala sa mga nagbabalak na pumasok sa ilegal na gawain.

Walang maidudulot na maganda ang pagsuway sa batas, sa halip ilalagay ka pa nito sa kapahamakan.

Pang-aabuso sa mga bata gamit ang internet, talamak!

by Info @Editorial | Dec. 5, 2024

Isang bagong anyo ng pagsasamantala sa mga bata ang patuloy na umuusbong sa internet — ang online prostitution. 

Isang masaklap na katotohanan na ang ating mga kabataan ay napapabilang sa mga biktima ng ganitong klaseng pang-aabuso, isang pagsasamantala na hindi lamang nagmumula sa mga hindi kilalang tao kundi pati na rin sa mismong pamilya nila.

Sa kabila ng mga pagsusumikap na sugpuin ang child exploitation, hindi pa rin natitinag ang mga sindikato at mga magulang na handang ibenta ang kanilang mga anak para sa pera. 

Sa kabilang banda, ang mga batang hindi pa kayang maunawaan ang nangyayari ay magdudulot ng grabeng trauma at pagkasira ng kanilang mga buhay.

Kadalasan, ang mga magulang o kamag-anak ang mismong nagiging “tulak” sa kanilang mga anak sa ganitong uri ng pang-aabuso, kung saan ang internet at mga online platform ay nagiging kasangkapan para sa kanilang negosyo ng pagpapakita ng katawan at sekswal na aktibidad ng bata. 

Ang mga ganitong gawain ay hindi lamang isang paglabag sa batas kundi isang paglapastangan sa bawat karapatan ng isang bata — ang karapatang mabuhay sa ligtas na kapaligiran at ang karapatang ituring silang may dignidad.

Bilang isang lipunan, hindi natin dapat hayaan ang mga bata na maging biktima ng isang sistema na nagtutulak sa kanila sa madilim na landas ng pagsasamantala.

Ang kanilang mga katawan ay hindi kalakal, at ang kanilang dignidad ay hindi nasusukat sa halaga ng pera. 

Scammer, naglipana ngayong Kapaskuhan, ingat!

by Info @Editorial | Dec. 4, 2024

Pinag-iingat ng Department of Social Welfare and Development (DSWD) ang publiko kaugnay sa panibagong online scam na ginagamit na naman ang pangalan ng ahensya.

Kaugnay ito ng kumakalat na online link na nagsasabing makatatanggap ng Christmas gift na nagkakahalagang P7,000 mula sa DSWD ang sinumang sasagot sa isang survey questionnaire.

Kaya huwag basta magbigay ng personal na impormasyon, lalo na sa mga online surveys o kahalintulad na mga alok. Iwasan ang mga link na hindi pamilyar o hindi katiwa-tiwala.

Kung ikaw ay makakatanggap ng ganitong alok, magtanong sa mga eksperto o mga kilalang kumpanya kung sila ba ay nag-aalok ng ganitong klase ng promo. 

Kung ang alok ay masyadong maganda para maging totoo, malamang ay scam ito.

Ang Kapaskuhan ay panahon ng pagbibigayan, sadyang may mga hindi tapat na tao na nagsasamantala.

Lumalaganap ang mga scam na nagdudulot ng matinding pinsala sa mga biktima. Ito ay isang seryosong isyu na kailangang pagtuunan ng pansin.

Mahalaga na ang bawat isa sa atin ay magpakita ng pagiging mas mapanuri at maingat.