Comelec, mapapalaban vs. text spoofing, blasting ngayong halalan

by Info @Editorial | Jan. 15, 2025

Nababahala ang Commission on Elections (Comelec) sa paglaganap ng text spoofing, text blasting o iba pang may kinalaman pagdating sa information technology, ngayong panahon ng eleksyon.

Ang ‘text spoofing’ ay panggagaya ng pangalan ng kumpanya, ahensya o kilalang personalidad para makapasok mismo sa lehitimong text thread habang ang ‘text blasting’ naman ay isahang pagpapadala ng text message sa maraming receiver.

Ayon sa poll body, mahirap ma-monitor ang mga may kinalaman sa ganitong gawain kaya patuloy ang kanilang pakikipag-ugnayan sa National Telecommunications Commission (NTC) at Department of Information and Communications Technology (DICT) para bantayan at pigilan ang mga ganitong kalokohan. 

Kaugnay nito, kailangang maglatag ng mas mahigpit na mga polisiya at mga batas na magbabawal at magpaparusa sa mga ganitong uri ng gawain. 

Ang mga mobile network providers ay may obligasyon ding magpatupad ng mga mekanismo upang mapigilan ang mga ganitong klase ng pag-abuso sa kanilang sistema.

Mahalaga rin ang papel ng bawat isa sa atin bilang mga botante.  Dapat na maging mapanuri at responsable sa mga mensaheng natatanggap mula sa hindi kilalang numero o source. 

Sa halip na mabola o madala sa mensaheng natatanggap, dapat suriin ito, maghanap ng iba pang mapagkakatiwalaang source, at mag-ingat sa pagpapakalat ng impormasyon na hindi pa nasusuri.

Tungkulin nating lahat, mula sa mga otoridad hanggang sa bawat isa sa atin na tiyakin na ang teknolohiya ay nagagamit para sa kapakanan ng bayan, hindi para maging sanhi ng pagkalito at pagkawatak-watak.

Mas mabigat na parusa vs. scammer ng OFW

by Info @Editorial | Jan. 14, 2025

Isa ang overseas Filipino workers (OFWs) sa mga matatag na haligi ng ekonomiya ng Pilipinas. 

Ang kanilang sakripisyo at pagsisikap sa ibang bansa ay hindi lamang para sa kanilang pamilya kundi para na rin sa pagpapaunlad ng bansa. 

Subalit, kasabay ng kanilang tagumpay at ambag sa lipunan, ay ang lumalalang banta ng mga scam na naglalayong pagsamantalahan ang kanilang hirap. 

Ang mga scammer ng OFW ay may iba’t ibang modus. Isa na rito ang mga pekeng recruitment agencies, investment schemes at mga fake online job offers. 

Kaya mahalagang bigyan ng pansin ng pamahalaan ang pagpapanagot sa mga scammer ng OFW. 

Ang mga ganitong uri ng krimen ay hindi lamang pagnanakaw ng pera, ito’y isang paglabag sa karapatan ng mga manggagawang Pinoy. 

Kapag napag-iwanan at naging biktima ng mga scammer, maraming OFW ang mawawalan ng tiwala sa mga institusyon, at magiging dahilan ito upang magduda sila sa mga legal na proseso. 

Sa ngayon, isinusulong ang panukalang batas na maging Overseas Filipino Worker Protection Against Fraud Act of 2025.

Sa ilalim nito, hindi bababa sa P10 milyon ang multa at 20 taon hanggang habambuhay na kulong sa sinumang mapatutunayang guilty sa panloloko sa mga OFW.

Bukod sa pagpapanagot sa mga scammer, kailangan din ng mga konkretong aksyon upang maprotektahan ang mga OFW mula sa mga panlilinlang. 

Mapayapa at malinis na rally

by Info @Editorial | Jan. 13, 2025

Ang rally ay mahalagang bahagi ng isang malusog na demokrasya. 

Isa itong paraan upang ipahayag ang saloobin at opinyon ukol sa mga isyu ng bayan. 

Gayunman, sa kabila ng layuning iparating ang mga hinaing, madalas ang mga rally ay nauuwi sa kaguluhan at karahasan, na nagdudulot ng pagkasira ng ari-arian at paglabag sa karapatang pantao. 

Pero sa kabilang banda, may mga rally naman na nagsisilbing magandang halimbawa kung paano dapat isagawa ang isang demonstrasyon — ito ang inaasahan sa rally ng Iglesia ni Cristo (INC) ngayong araw. Ito ay bilang pagpapakita ng pagpabor sa pahayag ni Pangulong Bongbong Marcos laban sa pagpapatalsik kay Vice President Sara Duterte.

Sa nasabing rally, inaasahan umanong makikita ang kanilang mataas na antas ng disiplina at malasakit sa kaayusan. 

Ang pagtitipon ay gagawin umanong maayos, may tamang koordinasyon sa mga otoridad at may respeto sa mga karapatan ng iba. 

Nais nating ipaalala sa lahat ng sektor ng lipunan na ang pagpapahayag ng saloobin ay hindi kailangang magdulot ng kaguluhan. Sa halip, ito ay isang halimbawa ng kung paano dapat isagawa ang isang protesta na may dignidad at may malasakit sa kapwa at maging sa kapaligiran.

Sa pamamagitan ng mapayapa at maayos na pagtitipon, maipapakita natin na ang tunay na pagbabago at pag-unlad ng lipunan ay nangyayari hindi lamang sa pamamagitan ng mga malalaking pagkilos, kundi sa mga maliit na hakbang na puno ng malasakit at disiplina.Sa kabila ng lahat ng ito, isang mahalagang bagay na dapat tandaan ay ang kapangyarihan ng bawat isa na magpahayag ng saloobin. 

At ang tunay na diwa ng demokrasya ay hindi nasusukat sa dami ng sigaw o gulo, kundi sa respeto at pagkakaisa para sa kapakanan ng nakararami.