Holdapan at patayan, ‘wag balewalain

by Info @Editorial | Jan. 21, 2025

Nakapanlulumo na tila nagiging pangkaraniwan na ang mga balita tungkol sa araw-araw na mga holdapan at patayan. 

Hindi lamang ito nagdudulot ng takot at pangamba sa mga mamamayan, kundi pati na rin ng kawalan ng tiwala sa mga institusyong inaasahan nating magbibigay ng proteksyon at katarungan.

Isa sa sinasabing mga dahilan ng paglaganap ng mga holdapan at patayan ay ang malalang kondisyon ng ekonomiya. 

May mga napipilitan umanong pumasok sa mga ilegal na gawain upang matugunan ang kanilang mga pangangailangan. 

Ang kakulangan sa oportunidad, edukasyon at suporta mula sa gobyerno ay nagiging isa sa mga malupit na sanhi ng desperasyon, na mas pinipili ang madali ngunit mas marahas na solusyon na hindi dapat.

Bukod dito, ang pagkakaroon ng mga armas at ang kakulangan ng mas mahigpit na batas at mga programa laban sa krimen ay nagpapadali sa pagsasakatuparan ng mga holdapan at patayan. 

Sa kabilang banda, ang ilang mga pulis ay nagiging biktima na rin ng krimen dahil sa kawalan ng tamang kagamitan, kapos sa training at pag-aalaga sa kanilang moralidad.

Sa mga oras ng krisis, ang mga biktima ng mga holdapan at patayan ay hindi lamang ang mga taong nawalan ng buhay o ari-arian, kundi pati na rin ang buong komunidad. 

Kailangan ng seryosong aksyon mula sa gobyerno, lokal na pamahalaan at mga tagapagpatupad ng batas upang sugpuin ang paglaganap ng mga krimen. 

Kailangang mas dagdagan ang presensya ng pulisya sa mga lugar na may mataas na insidente ng krimen, pati na rin ang paggamit ng mga makabagong teknolohiya upang matukoy ang mga kriminal.

Hindi rin natin dapat kalimutan ang papel ng bawat isa sa ating komunidad. Kailangang maging mapagmatyag at magsanib-puwersa upang maprotektahan ang isa’t isa laban sa karahasan.

Buhay ng kabataan, winawasak ng droga

by Info @Editorial | Jan. 20, 2025

Isa pa rin sa mga pinakamabigat na isyung kinahaharap ng ating lipunan ay ang patuloy na paglaganap ng ilegal na droga.

Hindi maitatanggi na isa sa mga pinakaapektadong sektor ay ang mga kabataan, partikular na ang mga estudyante. Ang tanong, paano natin ito lalabanan? 

Minsan, ang mga estudyante na hindi pa lubos na nakakaintindi sa mga epekto ng kanilang ginagawa, ngunit dahil sa peer pressure, kakulangan sa gabay mula sa pamilya, o kaya’y kahirapan, ay nahuhulog sa mga bisyong ito. 

Ang masaklap pa, madalas hindi rin sapat ang mga programa at sistema ng mga paaralan at komunidad upang tugunan ang problemang ito nang maaga. 

Sa halip na pagyamanin ang kanilang mga pangarap, ang ilang kabataan ay unti-unting nawawasak ng drugs.

Isang malaking bahagi ng problemang ito ay ang mga sindikato ng droga. Minsan, ang mga dealer ng droga ay gumagamit ng mga diskarte upang makuha ang tiwala ng mga estudyante, na kadalasan ay madaling maimpluwensyahan. Sila ‘yung may mahihinang pundasyon sa pamilya at lipunan. 

Upang labanan ang problemang ito, kinakailangan ng mas malalim na pagtutok. 

Kailangang magpatuloy ang mga programa ng edukasyon hinggil sa mga panganib ng droga, at maging bukas ang mga guro na pag-usapan ang mga isyung ito sa mga kabataan. 

Dapat ding magkaroon ng mas maigting na kooperasyon ang pulisya at mga lokal na pamahalaan, upang mapigilan ang pagpasok ng droga sa komunidad. 

Mahalaga rin ang suporta ng pamilya. Kung ang bawat magulang ay mas magiging aktibo sa pagtutok sa kanilang mga anak, mas magiging ligtas ang kanilang buhay. 

Ang pagbibigay ng sapat na pag-aaruga, gabay at tamang kaalaman sa mga kabataan ay makakatulong upang maiwasan nilang maging biktima ng droga. 

Doble-ingat sa mga trabahong iniaalok online

by Info @Editorial | Jan. 19, 2025

Mahigit 70,000 illegal job recruitment posts sa iba’t ibang social media platform ang tinanggal ng Department of Migrant Workers (DMW) noong 2024.May kabuuang 71,653 na fake job postings at accounts ang na-deactivate kabilang na ang 50,220 na kahina-hinalang post sa Facebook at 21,433 sa TikTok.Marami umano sa mga post na ito ang nagpapanggap bilang legitimate recruitment agencies.

Sa makabagong panahon, ang internet ay naging isang mahalagang kasangkapan sa paghahanap ng trabaho, lalo na sa mga naghahangad magtrabaho sa ibang bansa. 

Ang mabilis na access sa online platforms at job portals ay nagbibigay-daan sa mga bagong oportunidad, ngunit kasabay nito, lumaganap din ang mga hindi kanais-nais na gawain, gaya ng mga job scam. 

Ang alok na mataas na sahod at maginhawang trabaho sa ibang bansa ay ilan sa mga paraan kung paano manloko ang ilang mga indibidwal at organisasyon.Isang karaniwang taktika ng mga scammer ay ang pag-publish ng mga job listings na mukhang lehitimo at kapani-paniwala, ngunit may hidden agenda. Minsan, hihingin nila ang personal na impormasyon, bayad para sa visa processing, o kaya naman, bibigyan ng mga kontrata na hindi naman pala valid. 

Bilang mga naghahanap ng oportunidad, mahalaga na maging mapanuri at mag-ingat sa mga online job offer. Sa pag-iwas sa mga online job scam, makatitiyak tayo sa pag-abot ng mas magagandang oportunidad at hindi pagkatalo.