Fil-Jap Saso, top 10 na sa Earth Mondamine Cup

ni Eddie M. Paez Jr. - @Sports | June 28, 2020

Isang round na lang ang layo ni Yuka Saso ng Pilipinas sa isang impresibong debut sa prestihiyosong Japan Ladies Professional Golf Association matapos itong mapabilang sa unang sampung parbusters ng 2020 Earth Mondamine Cup sa 6,622 yardang palaruan ng Camellia Hills Counry Club sa Chiba, Japan.

Pagkatapos ng 54 holes, nakaipon si Saso, may-ari ng dalawang gintong medalya sa huling Asian Games noong siya ay amateur pa, ng labing-isang birdies upang kontrahin ang apat na bogeys at isang double -bogey para sa kabuuang iskor na 5-under-par 211 strokes (66-74-71). Mayroon din siyang naisumiteng 38 even pars pagkatapos ng tatlong araw ng pagpalo.

Pinakamakinang na round ng 19-taong-gulang na Fil-Japanese sa kasalukuyan ay ang kanyang bogey-less opening round na 66 strokes kaya nakaupo siya ngayon sa pang-sampung puwesto kasosyo ang anim na iba pang lady golfers sa malupit na tour sa Asya.

Ang kanyang iskor noong unang dalawang rounds din ay naging matibay na armas ni Saso para hindi siya mapabilang sa mga manlalarong hindi na pinayagang pumalo sa weekend play dahil sa masyadong mataas na iskor.

Anim na strokes ang lamang sa kanya ng tumatrangkong si Tanaka Mizuki (205/68-67-70).

Bukod dito, si Saso ay may malaki ring pag-asa na makapaglaro sa Tokyo Olympics dahil nakakapit siya ngayon sa pang-50 baytang ng olympic gold qualifying rankings. Sa naturang listahan, ang top-60 lang ang papayagang makapaglaro sa Olympics. Isa pang Pinay, si Dottie Ardina, ay nakasampa sa pang-51 baytang.

Battle of Grandmasters sa Online Rapid Chess Tourney

ni Eddie M. Paez Jr. - @Sports | June 28, 2020

Inaasahan ang pagkislap ng kalangitan ng ahedres sa Pilipinas ngayong Linggo, Hunyo 28, dahil sa pagsabak ng mga bituin ng bansa sa maigting na Battle of Grandmasters Online Rapid Chess Tournament.

Kasama sa mga pinakaprominenteng disipulo ng ahedres na lalahok sa paligsahang may cash pot na P100,000 at lalapatan ng “10-minuto, 10-segundong” time control sina GM Eugene Torre, FIDE Master Sander Severino, Woman GM Janelle Mae Frayna at US-based GM Mark Paraguay.

Bitbit sa kompetisyon ni Torre, senior chesser na tubong Iloilo, ang mga dekada ng karanasan sa ahedres kabilang na ang mga medalya sa prestihiyosong chess olympiads at ang pagiging pinakaunang Grandmaster ng Asya.

Si Severino, multiple gold medalist sa Asian Paralympics, sa kabilang dako ay isa nang world champion nang maghari ito sa IPCA (International Physically Disabled Chess Association) World tilt habang si Frayna ang pinakaunang WGM ng Pilipinas.

Mainit ang mga sulong ni US-based Paragua ngayong panahon ng pandemya at ang pinakahuling katunayan ay ang pamamayagpag niya kamakailan sa Philippine Bullet Chess Championships.

Kasama rin sa listahan ng mga sasabak sa tunggaliang lalaruin sa pamamagitan ng lichess portal sina GM Rogelio Antonio Jr., GM Julio Sadorra, GM Oliver Barbosa, GM Darwin Laylo, GM Rogelio Barcenilla Jr., GM Jayson Gonzales, GM Richard Bitoon, GM John Paul Gomez, IM Angelo Young, FM Narquingden Reyes at NM Giovanni Mejia.

Ilan sa mga tututukang laban sa unang round ng isang araw na torneong magkakaloob ng P25,000 sa magkakampeon, P15,000 sa sesegunda at P8,000 sa dalawang semifinalists na hindi na aabot sa finals ay yung bakbakang Torre - Severino, Antonio - Laylo at Paragua - Frayna.

Bustamante, wagi sa U.S. One Pocket Challenge of Champions

ni Eddie M. Paez Jr. - @Sports | June 27, 2020

Nangibabaw ang alamat ng bilyar mula sa Pilipinas na si Francisco "Django" Bustamante sa Challenge of Champions One Pocket sa tatlong araw na bakbakan sa palaruan ng Buffalo's Billiards ng Jefferson, Louisiana habang unti-unti nang nanunumbalik ang daigdig ng palakasan sa limelight sa kabila ng atake ng coronavirus.

Sa isang duwelong tumagal ng tatlong araw at may format na race-to-24, nakaharap ni Bustamante, minsan nang naghari sa World 9-Ball Championships, si Tony "T-Rex" Chohan. Naging mainit ang arangkada ng pambato ng Tarlac sa unang araw kaya nakatrangko agad siya, 7-1, pero nagising ang karibal na Amerikano kaya pagkatapos ng day 1 ay lamang pa si Chohan, 8-7.

Nakaresbak si Bustamante at nakaungos nang kaunti pagkatapos ng pangalawang araw ng pagtumbok, 16-14 kaya naplantsa ang isang dikdikang last day kung saan walang gustong maiwan kaya nauwi sa 8-8 ang iskor. Pero sa kabuuan, kay Bustamante napunta ang tagumpay sa serye, 24-22.

Ito na ang pangalawang paggitna sa tagumpay ng isang bilyaristang Pinoy sa gitna ng COVID-19 dahil noong nakaraang buwan, umangas ang manunumbok na si Roland Garcia nang tanghaling kampeon ang Pinoy sa 2020 Viking Cues Q City 9-Ball Tour Leg 1 na ginanap sa palaruan ng Break & Run Billiards sa Chesnee City, South Carolina,

USA.

Buwan pa ng Marso, ilang araw bago huminto ang buong mundo dahil sa COVID-19 nang mahablot ni Zorren James “Dodong Diamond” Aranas ang runner-up honors sa harap ng world class na oposisyon nang magsara ang $100,000 Diamond Las Vegas Open sa palaruan ng Rio Hotel Casino sa Las Vegas, Nevada.

Sa susunod na buwan, sagupaang Roberto "Superman" Gomez at Justin "The Iceberg" Bergman naman ang aabangan sa Racks On The Rocks sa West Peoria, Illinois.