Saso, 5th place sa Japan Ladies Golf Tour sa Chiba

ni Eddie M. Paez Jr. - @Sports | July 1, 2020

Siguradong kilala na ng mga apisyunado ng golf sa Japan ang Fil-Japanese na si Yuka Saso matapos niyang pakawalan ang isang mainit na performance sa huling 18 holes at pumanglima sa prestihiyosong Japan Ladies Professional Golf Association (JLPGA) - 2020 Earth Mondamine Cup sa palaruan ng Camellia Hills Country Club sa Chiba, Japan.

Nagpakawala si Saso ng birdies sa pang -2, -4,-8, -15 at -17 na mga butas laban sa isang bogey sa hole no. 6 para sa isang umuusok na 68 strokes (34 sa front nine at 34 rin sa back nine) sa final round sa 6,622 yardang golf course.

Pagkatapos ng 72 holes, isinuko ni Saso, sinabitan ng dalawang gintong medalya sa huling Asian Games noong siya ay amateur pa, ng labing-anim na birdies upang kontrahin ang limang bogeys at isang double -bogey para sa kabuuang iskor na 9-under-par 211 strokes (66-74-71-68). Mayroon din siyang naisumiteng 50 even pars pagkatapos ng apat na araw ng pagpalo.

Pinakamainit na round ng 19-taong-gulang na Fil-Japanese sa torneo ay ang kanyang bogey-less opening round na 66 strokes sa una niyang sabak sa malupit na tour sa Asya.

Ang kanyang iskor nung unang dalawang rounds din ay naging matibay na armas ni Saso para hindi siya mapabilang sa mga manlalarong hindi na pinayagang pumalo sa weekend play dahil sa masyadong mataas na iskor.

Kasosyo sa panglimang baitang ng Japan Ladies Tour rookie na si Saso ang apat na iba pang lady golfers: Erika Hara, Nozawa Mao, Osato Momoko at Saigo Mao.

Dalawang strokes lang ang lamang kay Saso ng mga nangunang sina Love Suzuki (277/68-70-71-68) at Watanabe Ayake (277/69-69-71-68).

Maliban sa mainit na debut sa Japan Tour, si Saso ay may malaki ring pag-asa na makapaglaro sa Tokyo Olympics dahil nakakapit siya ngayon sa pang-50 baitang ng Olympic gold qualifying rankings. Sa naturang listahan, ang top-60 lang ang papayagang makapaglaro sa Olympics. Isa pang Pinay, si Dottie Ardina, ay nakasampa naman sa pang-51 baitang.

5 golfers, umayaw na dahil sa pananalasa ng COVID-19

ni Eddie M. Paez Jr. - @Sports | June 30, 2020

Namayani si world no. 6 Dustin Johnson ng USA sa Travellers Championships na ginanap sa Cromwell, Connecticut pero hindi ito ang naging usap-usapan sa unti-unting pagbalik ng Professional Golf Asociation (PGA) Tour sa limelight.

Sa halip, bukambibig ang patuloy na pamiminsala ng COVID-19 sa prestihiyosong golf tour matapos na umakyat sa tatlo ang bilang ng mga parbusters na naging COVID-19 positive samantalang sumampa naman sa lima ang mga manlalaro sa naturang kompetisyon na kumalas na sa paglalaro dahil sa coronavirus.

Nakumpirmang kinapitan na ng naturang virus si Denny McCarthy kaya ang Amerikanong golfer na ang pangatlong biktima sa torneo. Ang unang dalawang golfers na nasa kaparehong kalagayan ay sina Cameron Champ (nadiskubre matapos ang pre-tournament screening sa Travellers Championships) at Nick Watney (lumabas ang resulta habang naglalaro sa RBC Heritage).

Bukod kay Champ, wala na rin sa eksena sa palaruan ng TPC River Highlands sina Brooks Koepka, Webb Simpson, Graeme McDowell at Chase Kopeka ang pakikipagtunggali sa kompetisyon dahil sa mga rasong may kaugnayan sa nakamamatay na virus. Ang mga caddie nina Brooks Koepka at ni McDowell ay pareho ring naging COVID-19 positive.

Kasalukuyan na ring binabago ng pamunuan ng PGA Tour ang mga testing protocols nito para lalong makontrol ang paglaganap ng virus.

Sa kabilang dako, si Ken Comboy, nagsisilbing caddie ni Graeme McDowell sa PGA Tour pa rin, ay kumpirmado na ring apektado ng COVID-19. Dahil dito, nagdesisyon na rin si McDowell na kumalas mula sa tunggalian upang i-quarantine ang kanyang sarili mula sa kanyang pamilya sa Florida.

Sa Asya, nanumbalik na rin ang spectator-less na Japan Ladies Professional Golf Association sa mga palaruan. Kasama sa mga kalahok ang Pinay na si Yuka Saso. Sa Pinas naman, tahimik pa ang mga golf courses.

Paragua, kampeon sa Online Battle of Grandmasters

ni Eddie M. Paez Jr. - @Sports | June 30, 2020

Nagparamdam ng kanilang angas ang mga chessers na nakabase sa Estados Unidos nang hablutin ni GM Mark Paragua ang korona at maging podium finisher naman si GM Oliver Barbosa sa pagtatapos ng Battle of Grandmasters Online Rapid Chess Tournament.

Hindi naman nagpaiwan sa tikas si GM Rogelio Antonio Jr. matapos itong pumangalawa sa kabila ng pagiging "senior woodpusher" nito at si GM John Paul Gomez na nakisosyo sa pangatlong puwesto sa torneong ginanap sa pamamagitan ng lichess portal.

Dahil sa tagumpay, nanatiling nagbabaga ang mga sulong ng Pinoy chesser na nakabase sa New York dahil noong unang hati ng Hunyo ay itinanghal din itong kampeon sa Philippine Bullet Chess Championships.

Sa Battle of GMs na ginanap upang ipagdiwang ang kaarawan ni Prospero Pichay at nilimitahan lang sa paglahok ng 16 na piling woodpushers, sumabak sa hamon ng apat na magkakaibang karibal ang dating World Under-14 Rapid Chess titlist na si Paragua at nagtagumpay para maibulsa ang champion’s purse na nagkakahalaga ng P25,000.

Unang nalampasan ni Paragua, batikan ng maraming Chess Olympiads suot ang tatlong kulay ng Pilipinas, si Woman Grandmaster Janelle Mae Frayna sa kanilang sariling serye bago niya dinaig si GM Richard Bitoon sa final 8 na bakbakan ng kompetisyong nilapatan ng “10-minuto, 10-segundo” na time control. Sa semifinals, ginawang tuntungan ng Bulakenyong si Paragua papunta sa championship play-off si Barbosa, na naninirahan na rin sa New York, kung saan nakasagupa niya si Antonio. Dito, sinikwatan niya ng panalo si Antonio sa unang laro bago nakipaghatian ng puntos sa pangalawang laban upang mangibabaw sa serye, 1.5-0.5. Sa kabila ng pagkatalo, nag-uwi ng P15,000 si Antonio.

Sa isa sa mga inaabangang duwelo, dinaig ni FIDE Master Sander Severino, isang multiple gold medalist sa Asian Paralympics at bagong hirang na world champion nang maghari ito sa IPCA (International Physically Disabled Chess Association) World tilt, ang unang grandmaster ng Asya na si Eugene Torrre. Ngunit hindi nakalagpas sa quarterfinals si Severino.