Online Chess: Pinoy Banjo tinalo si GM Kamsky, napikon ang kano

ni Eddie M. Paez Jr. - @Sports | July 27, 2020

“Mandaraya!” Ito naman umano ang akusasyong ipinukol ni Grandmaster Gata Kamsky ng U.S.A kay GM Rogelio “Banjo” Barcenilla Jr. ng Pilipinas matapos hindi matanggap ng elite woodpusher ang kanyang dalawang magkasunod na pagkatalo sa kamay ng Pinoy sa kanilang online na duwelo.

Sa isang online post ng kabiyak ni Banjo na si Lilibeth, sinabi nitong, “Hubby practicing today by joining bullet online tournaments in preparation for Online Chess Olympiad next week! Beating Super GM Kamsky 2-0 and can’t accept results calling my hubby Cheater cheater!!! Tsk tsk tsk!!! idinagdag pa niyang nakalimutan daw ni Kamsky na lahat ay may pangil.

Dagli namang nagpakita ng suporta ang chess aficionados sa bansa nang tawagin nila si Kamsky na “loser”, “poor loser” at “sourgraping”. Sinabi pa ng isa na nawala ang kanyang respeto sa 46-taong-gulang at dating Soviet na si Kamsky.

Magandang senyales ito para sa paghahanda ng RP team na sasabak sa online chess olympiad dahil naiposte ni Barcenilla ang tagumpay tangan nang dalawang beses ang itim na piyesa.

Samantala, sa ginaganap na pinakaunang FIDE Online Chess Olympiad, tumatrangko sa Pool “A” ng pinakamababang grupo (“Base Division”) ang Myanmar at Fiji bitbit ang tig-aanim na puntos. Isang puntos naman sa likod nila ang Oman at Pakistan. Nagsosolo sa panglimang puwesto ang Brunei Darussalam (4.0 puntos). Ang mga koponan naman ng Lebanon, Bahrain at Qatar ang mga namamayagpag sa Pool “B” dahil sa rekord na 6.0 puntos habang nag-iisa sa unahan ng Pool “C” ang Cyprus dala ang walang mantsang kartada.

Puntirya ng mga bansang nabanggit na makahakbang patungo sa Division 4. Sa kabilang dako, hindi pa naglalaro ang pangkat nina IPCA world king FIDE Master Sander Serverino sa “Division 3” at ang Philippine Team na kabilang sa mga swak sa “Division 2”.

De Luna, tumumbok na sa Predator Online semis

ni Eddie M. Paez Jr. - @Sports | July 26, 2020

Isang higanteng manunumbok na naman ang naungusan ni Jeffrey “The Bull” De Luna matapos daigin ng Pinoy si Albin Ouschan ng Austria, 2-1, upang mahablot ang huling upuan sa semifinals ng umuusok nang Predator One Pool 10 Online Challenge.

Dikdikan ang labanan ng duwelong Pinoy-Austrian at sa unang sargo ay bahagyang nakaangat si Ouschan sa iskor na 60-55. Sa pangalawang banggaan, tablang 60-60 ang naiposte kaya nauwi sa tiebreaker na napagwagian ni De Luna.

Dahil sa 1-1 na sitwasyon, kinailangan ng winner-take-all match. Sa puntong ito, napunta uli sa 60-60 na iskor kaya nagkaroon na naman ng tiebreaker na napanalunan ni De Luna, 40-25, kaya ito nakapasok sa semis.

Pero wala pang ilang oras ang lumilipas nang ipaulit ng mga organizers ang huling laro dahil sa “patterned racking” ni De Luna. Umalma ang Pinoy at nagdesisyon ang tagapangasiwa na si Ouschan sa halip na si De Luna ang papasukin sa semifinals.

Nabalewala ang magandang performance ng Pinoy dahil sa delubyo. Nauna rito, pinadapa niya si dating World Pool Association no. 1 Jayson Shaw ng Scotland sa gitgitan ding iskor, 2-1.

inilampaso rin ni De Luna, World Cup of Pool rin ER-up katuwang si Carlo Biado, si Naser Al-Mujaibel ng Kuwait, 2-0. Hindi pinaporma ng 36-anyos na Pinoy si Al-Mujaibel sa tulong ng 60-53 at 60-31 na mga rekord.

Talent ng Pinoy, ‘wa epek sa online games kung mahina ang internet

ni Eddie M. Paez Jr. / MC - @Sports | July 24, 2020

Handa ang Team Philippines para harapin ang pinakamahuhusay na chess player sa mundo at maging bahagi ng kasaysayan sa gaganaping FIDE Chess Olympiad Online Championship na idinaraos ngayon. Sinabi ni National Chess Federation of the Philippines (NCFP) Executive Director Atty. Cliburn Orbe na preparado na ang koponan, ngunit mas kinakailangan nila ang mas malakas na Internet at high-end equipment upang higit na makasabay sa laban. “Sa talent, wala tayong masasabi sa team natin. Individually, ready sila, concerned lang namin yung mga equipment nila siyempre yung Internet connection. Alam naman natin na dahil sa pandemic mas tumaas ang bilang ng gumagamit ng internet,” sambit ni Orbe sa Tabloids Organization in Philippine Sports (TOPS) ‘Usapang Sports’ via zoom at livestream sa Youtube at Facebook ng Sports on Air kahapon. Iginiit ni Orbe na marami nang insidenteng nabalewala ang partisipasyon ng Pinoy players sa online chess game dahil naputol ang internet connection. “May player nga tayo sa isang malaking online match na maganda ang simula pero hindi na nakatapos dahil nawala yung internet connection. So malaki pa rin ang role ng Philippine Sports Commission at ng Smart,” ayon kay Orbe.

Sinabi ni Orbe na nagpadala na sila ng request letter kay PSC Chairman William Ramirez para sa supply ng bagong laptop, habang nakikipag-ugnayan na rin sila sa SMART-PLDT para sa mas siguradong internet connection. Ayon naman kay Asia’s first GM Eugene Torre, coach ng PH Team, na hindi pahuhuli ang Pinoy sa online chess at sa pangunguna ni GM Joey Antonio, malaki ang tsansa ng koponan sa laban. “Just yesterday, nagkampeon si Joey (Antonio) sa Asian Seniors online meet, kaya yung preparation niya mataas talaga. As always si Joey ay isa sa best player natin at sa Asia siya ang top senior player,” sambit ni Torre.

Kabilang din sa Team Philippines sina GM Mark Paragua, GM Darwin Laylo at Woman IM Catherine Secopito at Bernadette Galas, Michael Concio at Jerlyn Mae San Diego. Kasama ng Team Philippines sa Division 2 ang Germany, Romania, Turkey, Greece, Spain, Italy, England, Hungary, Israel, Belarus, Sweden, Croatia, Indonesia, Serbia, Bulgaria, Slovenia, Slovakia, Colombia, Ecuador, North Macedonia, Latvia, Switzerland, Norway, Argentina, Austria, Bangladesh, Australia, Moldova, Iceland, Montenegro, Turkmenistan, Kyrgyzstan, Estonia at Netherlands. “Seeded tayo sa Division 2 kaya sa August 15 pa ang laban ng team kaya mahaba pa ang preparasyon,” sambit ni Orbe.