Pandaraya sa FIDE Online Chess Olympiad, ibinulgar

ni Eddie M. Paez Jr. - @Sports | August 7, 2020

Kinalos ng FIDE ang mga manlalarong sinasabing nasangkot sa paglabag sa mga tuntunin ng ginaganap na FIDE Online 2020 Olympiad.

Sa isang pahayag ng governing body ng ahedres sa buong mundo, binanggit ng FIDE na, "The Online Olympiad Fair Play Panel has identified four cases in which there are sufficient grounds to believe the Fair Play Regulations have been violated."

Kasama rin sa naturang pahayag na pinamagatang "FIDE Statement on anti-cheating cases at Online Olympiad", ipinahayag na ang lahat ng resulta ng mga nasangkot na woodpushers ay itinuring nang pagkatalo . Bukod dito, hindi na sila pinapayagan pang maglaro sa kompetisyon.

Apat na manlalaro mula sa Mali (Base Division), Brunei Darussalam (Division 4), Hongkong (Division 4) at Nicaragua (Division 4) ang nasangkot ngunit hindi na pinangalanan bagamat ipinaalam na sa mga tournament officials at team captains ang pangyayari.

"Online Olympiad Fair Play Panel has identified four cases in which there are sufficient grounds to believe that fair play regulations were violated. Mali, Brunei Hongkong, Nicaragua."

Samantala, umpisa na ang bakbakan para sa pangkat ng International Physically Disabled Chess Association (IPCA) na pinamumunuan ni Pinoy world champion at FIDE Master Sander Severino.

Nasa Pool B ang IPCA at makakasagupa sa isang round-robin na tuntunin simula ngayong Biyernes (Agosto 07) ang Angola, Portugal, Bostwana, Chinese-Taipei, Sri Lanka, Nigeria, Tajikistan, United Arab Emirates at Scotland. Ang top 3 finishers sa naturang pangkat ay aabante sa Division 2 kung saan nakatambay ang Pilipinas bilang isa sa mga seeded entries.

Lagim ng COVID-19: atras ang US open tennis; boxing coach, patay

ni Eddie M. Paez Jr. - @Sports | August 5, 2020

Nakalatag pa rin sa malaking bahagi ng daigdig ng palakasan ang lagim ng coronavirus pandemic matapos umatras sa paglalaro ang dalawang tennisters sa U.S. Open at matapos na itumba ang isang boxing coach.

Unang nagdesisyong hindi na lalaro sa pamosong grandslam event na masasaksihan sa makasaysayang Arthur Ashe Stadium si Ashleigh Barty ng Australia na sinundan ni World Tennis Association (WTA) no. 40 Nick Kyrgios.

“Let’s take a breathe here and remember what is important, which is health and safety as a community.” pahayag ni Kyrgios. Idinagdag din nito na wala siyang problema sa mga organizers na prestihiyosong event o sa mga manlalarong sasabak dito basta kikilos ang mga ito ayon sa mga patakarang pangkaligtasan.

Nauna rito, isang tennis tour (binansagang “Adria Tour”), ang isinagawa pero dinapuan ng COVID-19 ang ilan sa mga kalahok. Kabilang na rito ang pinakamalupit na tennis player sa buong mundo na si Novak Djokovic, ang kanyang maybahay at si world no. 3 Grigor Dimitrov. Hindi na tinapos ang pagsasagawa ng event.

Samantala, nagbigay-pugay ang Russian Boxing Federation o RBF sa mga naiambag ni Alexander Nikolaev sa isports. Ang Ruso ay pumanaw sa Yekaterinburg dahil sa COVID-19 na pandemya kamakailan. Sumailalim sa kanyang patnubay ang ilang mga boksingerong Ruso na namayagpag sa Europe. Mayroon din siyang pinapangasiwaang boxing club sa Kamenks-Uralsky bago siya namaalam.

May outbreak ng COVID-19 sa golf, athletics at car race

ni Eddie M. Paez Jr. - @Sports | August 3, 2020

Hindi nagmemenor ang atake ng pandemyang coronavirus at patuloy na nangongolekta ng mga biktima sa daigdig ng Ladies Professional Golf, World Athletics at Formula One.

Sa LPGA Tour kung saan tatlong Pinay parbusters ang sumabak, nakumpirmang positibo sa COVID-19 si Marina Alex kasama ang isang caddie base sa resulta ng pre-tournament testing. Asymptomatic ang LPGA Tour member pero ngayon ay naka-quarantine na.

Isa pang lady golfer, si Gaby Lopez ay nabiktima rin ng virus at ngayon nasa self-isolation na habang nakikipagtulungan sa mga opisyales para sa contact-tracing.

Hindi naman naapektuhan ang mga Pinay na sina Bianca Pagdanganan, Clariss Guce at Dottie Ardina bagamat matamlay ang kanilang mga iskor sa LPGA Drive On Championships sa Toledo, Ohio. Nasa pang 32 na baytang si Pagdanganan (3 over par) habang si Guce ay nakaupo sa pang-43 na puwesto (4 over par) pagkatapos ng penultimate round. Nakalusot sila sa salaan at ngayon ay nakapasok sila sa last round. Si Ardina ay nasibak dahil sa lumobong iskor (+12).

Sa track and field naman, quarantine din ang magiging buhay ni Wayde Niekerk ng South Africa matapos itong maging positibo sa COVID-19. Si Niekerk ang kasalukuyang world record holder ng 400 meters at nakabase sa Gemona, Italy kung saan siya nag-eensayo.

Pinigilan din ng virus ang mga aktibidad ni Sergio Perez, isang Formula One driver mula sa Mexico, dahil sa positibong resulta. Hindi pinapasok sa Silverstone circuit ang Mehikanong kumakatawan sa Racing Point.

Sa isang pahayag ng Formula One at ng Federation Internationale de l'Automboile or FIA, sinabi nilang, "Perez has entered self-quarantine in accordance with the instructions of relevant public health authorities, and will continue to follow the procedures by those authorities."