Parbuster Ardina , papalo na sa AIG Open sa Scotland

ni Eddie M. Paez Jr. - @Sports | August 20, 2020

Lalarga na ngayong Huwebes si Pinay parbuster Dottie Ardina sa prestihiyosong AIG Women's Open 2020 na sisimulan sa palaruan ng Royal Troon ng Scotland.

Tatangkain nitong magmarka sa Europa kung papaano kuminang si Yuka Saso sa Japan noong weekend.

Bihirang makaeksena sa isa sa mga pinakamalaking global event ng women’s golf ang tatlong kulay ng Pilipinas at sa pagkakataong ito, si Ardina ang nakasungkit ng karapatan para lumahok sa paligsahang tinatawag ding British Open.

Nakuha ng 26-taong-gulang na Pinay, isang dating Symmetra Tour runner-up, ang upuan sa isa sa mga golf majors ng malupit na Ladies Professional Golf Association (LPGA) matapos nitong mairekord ang isang top-20 performance sa Marathon LPGA Classic Presented By Dana sa Sylvannia, Ohio. Sa naturang kompetisyon, sampung upuan papunta sa prestihiyosong bakbakan ang nakaabang sa mga manlalaro.

Nakasama ng Pinay mula sa Canlubang sina Maria Fassi (Mexico), Andrea Lee (USA), Emma Talley (USA), Kendall Dye (USA), Sophia Popov (Germany), Kelly Tan (Malaysia), Patty Tavatankit (Thailand), Peiyun Chien (Taiwan) at Lindy Duncan (USA) papasok sa AIG Women's Open.

Bitbit ni Ardina, kampeon ng 2020 Ballarat Golf tilt sa Australia, ang momentum ng unti-unti niyang pagbalik sa pangkameponatong porma matapos na kalawangin dahil sa pandemyang dulot ng coronavirus. Sa unang torneo niya mula sa community quarantine (Drive-On Championships sa Ohio), nasibak siya pagkatapos lang ng dalawang rounds. Sa Marathon Classic, tila malalaglag na naman ang dating jungolf star ng bansa pero unti-unting gumanda ang kartada niya (72-70-69-67) kaya naiposte niya ang isang 6-under-par 278 strokes na iskor at maiuwi ang halos PHP900,000 gantimpalang salapi.

Taong 2002 nang isang Pinay, si Jennifer Rosales, ang lumahok sa British Open at tumapos sa pang-apat na puwesto. Si Rosales din ay nakahablot ng pang-apat na baytang sa 2004 US Open. Si Hinaku Shibuno ng Japan ang nagkampeon sa torneo noong 2019.

US Tennis Open ayaw tantanan ng COVID-19

ni Eddie M. Paez Jr. - @Sports | August 19, 2020

Isang kalahok ang nakumpirmang positibo sa COVID-19 habang humaba na naman ang listahan ng mga ayaw nang humawak ng raketa sa makasaysayang U.S. Open dahil pa rin sa patuloy na pananalasa ng nakamamatay na coronavirus.

Dinapuan na ng virus si Kei Noshikori matapos ilabas ang resulta ng isang pagsusulit sa world no. 31 at olympic bronze medalist mula sa Japan. Paalis na ang Hapones sa kanyang tinitirhan sa Florida nang mabatid ang resulta. Sinabi niyang maganda naman ang kanyang pakiramdam bagamat nagpasya nang sumalang sa isoloation sa ngayon ang dating US Open runner-up.

Nakatakda itong sumabak sa isa pang pagsusuri bago matapos ang linggong ito. Depende sa resulta, maari pa itong magbago ng desisyon.

Samantala, anim na makikinang na mga pangalan sa women’s division ay nagpasyang huwag nang sumugal sa kompetisyong magsisimula sa huling araw ng buwang kasalukuyan.

Hindi na masasaksihan ang mga hampas sa bola nina defending champion Bianca Andreescu ng Canada, world no. 2 Simona Halep, 2019 semifinalist Belinda Bencic, Ukrainian Elina Svitolina, Netherlands ace Kiki Bertens at top Australian tennister Ashleigh Barty sa Flushing Meadows.

Ang Billy Jean King Tennis Center na dating pinagdarausan ng torneo ay minsan nang ginawang pagamutan para sa mga apektado ng pandemya.

Kagaya ni Andreescu, wala na rin sa eksena ng grandslam event na ito si 2019 king Rafael Nadal at natirang pa or ito para mamayagpag sa kalalakihan si Novak Djokovic.

Lumalaban pa ang 4 na Pinoy GM sa FIDE Olympiad

ni Eddie M. Paez Jr. - @Sports | August 17, 2020

Isang panalo kontra sa dalawang talo lang ang naisukbit ng Pilipinas sa kalagitnaan ng bakbakan kaya nanatili ito sa panglimang baitang sa Division 2 ng Group of Death na Pool “A” sa ginaganap na FIDE Online Chess Olympiad.

Dinaig ng bansa ang Belarus sa round 4 (4.5-1.5) pero hindi nito kinaya ang tikas ng Belgium (2.5-3.5; round 5) at ng Australia (2.0-4.0; round 6) kaya pagkatapos ng anim na yugto ay meron lang itong anim na puntos.

Nauna rito, nakulekta ng Pilipinas, may rating na 2144, ang mga panalo laban sa Kyrgyztan (rating: 1846), 6-0 at Southeast Asian rival Indonesia (rating: 2188), 3.5-2.5 bago tumiklop sa powerhouse Germany (rating: 2327), 1.0-5.0 sa unang tatlong yugto.

Tumatrangko sa pulutong ang Bulgaria (12.0 puntos) at Germany (12.0 puntos) habang nasa pangatlong at pang-apat na posisyon ang Australia (10.0 puntos) at Indonesia (8.0 puntos) ayon sa pagkakasunod-sunod.

Inaasahang hahataw sa huling tatlong rounds ang mga pambato ni GM Eugene Torre na sina Grandmaster Rogelio Barcenilla Jr., GM Mark Paragua, Woman GM Janelle Mae Frayna, International Master Daniel Quizon at Woman IM Kylen Joy Mordido para makapasok sa top 3 at makasikad paakyat sa Division 1.

Samantala, ang IPCA naman ni Pinoy FIDE Master Sander Severino (na sumampa sa Division 2 galing sa Division 3) ay nasa pampitong puwesto dahil sa natipong tatlong puntos sa sagupaan sa Pool B. Romania ang bumabandera sa pangkat.