GM Paragua, best performer; India at Russia, nagkampeon

ni Eddie M. Paez Jr. - @Sports | September 2, 2020

Idineklarang co-champions ang India at Russia sa isang maigting na labanang nauwi sa hindi inaasahang pagtatapos ng pinakaunang FIDE Online Chess Olympiad.

Sa best-of-three championship duel ng dalawang powerhouse na koponan, nauwi sa gitgitang 3.0-3.0 na tabla ang unang match. Russia ang nagkumahog para maitabla ang unang salpukan.

Opensiba naman ang India sa pangalawang match. Ang diskarte naman ng kinatawan ng Asya ay itabla ang mga top boards bago humataw sa lower boards kung saan sila lyamado. Sa kasamaang palad, naputulan ng koneksyon ang mga manlalaro ng India kaya ipinoste ang isang 4.5-1.5 na panalo.

Nagprotesta ang India at dagli namang nagsiyasat ang Appeals Committee. Napag-alamang malawakan ang pagkakaputol ng internet at may substansya ang protesta ng India. Dahil dito, nagdesisyon ang nagsasaayos na FIDE na gawing co-champions ang Russia at India. Si FIDE President Arkady Dvorkovich pa ang opisyal na nagpahayag ng desisyon.

Sosyo naman sa pagiging tersera ang mga semifinalists na Poland at tropang USA ni Grandmaster Wesley So. Ang world chess power na China, kampeon sa huling standard Chess Olympiad sa Batumi ay hindi man lang nakapasok sa final 4.

Ang Philippine Team o Agila naman ay nagsimulang kumamada ng mga panalo sa Division 2 ng torneo pero hindi nakapasok sa top 3 ng Pool A kaya naging miron na lang. Pero naging best performer naman ng Division 2 Pool A sa board 1 si GM Mark Paragua.

Sa kabilang dako, umangat naman galing sa Division 3 patungong Division 2 ang tropang International Physically Disabled Chess Association o IPCA ni Pinoy FIDE Master Sander Severino pero hindi napabilang sa unang tatlo finishers sa Pool nila kaya nagwakas na rin ang kanilang paglalakbay.

Muling nakahablot ng korona si Saso sa Nitori Golf Tour

ni Eddie M. Paez Jr. - @Sports | September 1, 2020

Pinatunayan ni Fil-Japanese Yuka Saso na hindi tsamba ang kanyang mainit na arangkada sa Japan Ladies Professional Golf Association o JLPGA matapos niyang hablutin ang korona ng 2020 Nitori Ladies Golf Tournament sa Otaru, Hokkaido.

Isinumite ni Saso, may-ari ng pilak na medalya sa Youth Olympic Games (Argentina), ang isang 13-under-par 275 na iskor sa pagsasara ng apat na rounds ng bakbakan sa palaruan ng Otaru Country Club sa Hokkaido tungo sa trono. Dalawang palo ang naging layo niya sa pumangalawang sa Haponesang si Sakura Koiwai.

Ang troika nina Kana Mikashima, Ji Hee Lee at Mayu Hamada ay kumain ng alikabok at kumartada lang ng 285, sampung strokes sa likod nina Saso at Koiwai para sa pagsososyo sa pangatlong puwesto.

Bukod sa pabuyang JPY 36,000,000 na natanggap dahil sa pagiging kampeon, nagpatuloy ang paghahasik ng takot ng 19-anyos na golf phenom sa Asya dahil Ito na ang pangalawang sunod na kampeonato ni Saso sa malupit na golf tour sa Asya sa kabila ng pagiging rookie.

Kamakailan ay hinirang na reyna ang Asian Games double gold medalist sa NEC Karuizawa 72 Golf Tournament. Apat na strokes ang naging agwat niya sa kanyang pinakamalapit na karibal. Ang champion’s purse ni Saso ay JPY 14,400,000.

Sa kanyang unang torneo naman (Earth Mondamine Cup sa Chiba, Japan) umeksena siya bilang panglimang finisher. Dalawang palo lang ang naging agwat sa kanya ng mga nanguna. May naibulsang JPY 8,640,000 ang 19-taong-gulang na tubong Bulacan.

Bago nagsimula ang bakbakang Nitori, pumapangalawa na si Saso sa karera para sa Mercedes Benz Player of the Year. Sa hagarang ito, meron na siyang 276.80 puntos at gantimpalang salapi na JPY 23,040,000. Tanging nasa harap niya ang tumatrangkong si Ayake Watanabe na may 307 puntos at may naiuwi nang JPY 43,720,000 bilang pabuya. At dahil sa panalo, inaasahang ang rookie lady parbuster na ang mangunguna.

GM So, hindi nagalusan pero US nakasingit sa Online Olympiad Semis

ni Eddie M. Paez Jr. - @Sports | August 31, 2020

Hindi nagalusan sa semifinals si Pinoy Grandmaster Wesley So matapos nitong daigin si Russian GM Alexander Grischuk, 1.5 - 0.5, sa labanan sa board 1 sa semifinals ng pinakaunang FIDE Online Chess Olympiad.

Maigting na draw ang naging resulta ng unang salpukang So-Grischuk pero sa pangalawang paghaharap ay hindi na pinaporma ni So, 26-taong-gulang at kasalukuyang World Fischer Random Chess champion, ang tatlong beses na world blitz champion mula sa Russia.

Sa kabila nito, nabigong umusad sa finals ang tropang USA ng tubong Cavite na si So kontra sa Russia. Sa unang match, nakasingit ang huli, 3.5-2.5, bago nakatabla sa pangalawang match, 3.0-3.0. Pero sapat na ang resultang ito para mairehistro ang India - Russia na championship duel.

Winasak ng India ang Poland, 4.0-2.0, sa kabilang hati ng duelong semis. Bago ang pagyuko sa Russia, ibinasura ng USA ang Ukraine sa quarterfinals, 2.0-0.0. Sa naturang serye, dalawang Ukrainian GMs (dating world rapid chess ruler Vassily Ivanchuk ay Anton Korobov) ang pinisak ni So sa board 1.

Ang world chess power na China, kampeon sa huling standard Chess Olympiad sa Batumi ay laglag na sa kompetisyon. Ang Philippine Team o Agila naman ay nagsimulang kumamada ng mga panalo sa Division 2 ng torneo pero hindi nakapasok sa top 3 ng Pool A kaya naging miron na lang. Pero naging best performer naman ng Pool sa board 1 si GM Mark Paragua.

Sa kabilang dako, umangat naman galing sa Division 3 patungong Division 2 ang tropang International Physically Disabled Chess Association o IPCA ni Pinoy FIDE Master Sander Severino pero hindi napabilang sa unang tatlo finishers sa Pool nila kaya nagwakas na rin ang kanilang paglalakbay.