Golfer Go nagkampeon sa Hainan Open Tour

ni Eddie M. Paez Jr. @Sports | April 17, 2024

Isang malupit na eagle at dalawang birdies sa homestretch ang sinakyan ni Lloyd Jefferson Go ng Pilipinas upang tuldukan ang isang coast-to-coast na tagumpay sa Hainan Baoting Open Golf Tournament sa China kamakailan.

Ang unang kampeonato ni Go sa labas ng bansa bilang propesyunal ay impresibong panundot ng Cebuano sa kanyang panalo sa loob ng Pilipinas may tatlong linggo pa lang ang nakararaan. Nagiging solido na rin ang taon ng Pinoy matapos itong pumasok sa 2023 Asian Development Tour top 10.

Kabuuang 22-under-par 266 strokes ang naiposte ng Pinoy parbuster pagkatapos ng 4 na rounds. Galing ito sa kartadang 67-65-65-69 na nagresulta naman sa mapanghiyang anim na palong bentahe kontra sa sumegundang si Yanhan Zhou (272) ng China at 7 strokes laban kay Taiwanese Yi-Tseng Huang (273).

Bukod sa Pilipinas, China at Taiwan, nag-ambisyon ding magmarka pero nabigo sa paligsahan ang mga golfers mula sa Germany, South Korea, Singapore at Canada.

Sa pagpasok sa huling araw ng kompetisyon, prente sa pagkakaupo sa unahan ng pulutong ang Pinoy. Pero inalat si Go sa malaking bahagi ng round 4 nang tumama sa kanya ang bogey (hole 6) at triple bogey (hole 10). Dahil dito ay nabawasan nang husto ang dating 8 strokes na agwat. Sa puntong ito, nakita ang kalibre ng tunay na kampeon at bumalikwas ang pambato ng Pilipinas nang umusok ito sa pang-14 (eagle), -16 (birdie) at -18 (birdie) na mga butas.

Pagkatapos ng apat na araw ng paghataw sa mga fairways ng Shangda International Golf Club,  ipinagkaloob kay Go ang halagang CNY 170,000 bilang kampeon habang CNY 110,000 at CNY 63,000 naman ang ibinulsa nina Zhou at Huang ayon sa pagkakasunod-sunod dahil sa kanilang pagpasok sa podium.

Malixi 2nd place sa Junior Invt'l Tour Sa S. Carolina

ni Eddie M. Paez Jr. @Sports | April 1, 2024

Napanalunan ni Pinay parbuster Rianne Mikhaella Malixi ang pangalawang puwesto sa katatapos na Junior Invitationals Tournament sa palaruan ng  Sage Golf Club sa Graniteville, South Carolina.

Isinalpak ni Malixi, 16-taong-gulang, ang kabuuang iskor na 3-under-par 213 strokes upang makuha ang runner-up honors sa likod ng 207 ni Asterisk Talley ng USA.

Mabagal ang naging simula ni Malixi sa tatlong araw na kaganapan dahil sa 73-71 na mga marka. Pero malaking tulong sa kampanya ng pangunahing lady parbuster ng Pilipinas ang hataw niya sa huling araw kung saan ikinalat nito ang birdies sa pang- 4, -6, -8 at -10 na mga butas upang makontra ang tanging bogey sa hole 7.

Tatlong palo sa likod ni Malixi ang trio nina Ella Galitsky (Thailand) , Jasmin Koo (USA) at Yana Wilson (USA) na nagsalu-salo sa huling upuan ng podium.

Nasa kasagsagan si Malixi ng kanyang paghahanda sa paglahok sa Augusta National Women's Amateur simula April 3  sa Augusta, Georgia. Malupit din ang kasalukuyang porma nito dahil nakaakyat na siya sa top 26 sa world amateur ranking matapos masadlak sa labas ng unang 50 amateur golfers. Malaki rin ang pag-asa nitong maging kinatawan ng bansa sa Paris Olympics base sa qualifying rules ng mga mangangasiwa ng golf sa prestihiyosong kompetisyon.

Sariwa rin siya sa mga impresibong resulta ngayong 2024. Matatandaang kamakailan lang ay pumanglima si Malixi sa Women Amateur Asia Pacific o WAAP (Pattaya, Thailand). Sumampa rin siya sa trono ng Australian Masters of the Amateurs at naging top 8 rin sa bakbakang tinaguriang Australian Amateurs. Nagrehistro rin si Malixi ng course record (63 strokes) sa WAAP. 

WGM Frayna, nileksiyunan si Canino sa Nat'l C'ships

ni Eddie M. Paez Jr. @Sports | March 24, 2024

Tinuruan ng leksyon ni Woman Grandmaster Janelle Mae Frayna ang dating solo lider na si Ruelle Canino upang pasiklabin ang kanyang pangkampeonatong paghahangad pagkatapos ng siyam na yugto ng Philippine National Women's Chess Championships sa Lungsod ng Malolos sa Bulacan.

Ang panalo ay pang-apat na sunod na ng tanging WGM ng Pilipinas pagkatapos ng mabagal na simulang apat na tabla at isang talo. Ito rin ay naging susi upang umangat ang rekord ng batikang si Frayna (Rating: 2234) sa 6.0 puntos at makaakyat sa pangatlong baytang. 

Sa kabila naman ng pagkatalo, nasa unahan pa rin ng mga kababaihang woodpushers ang nanonorpresang si Canino. Ang 15-taong-gulang na aspirante ay may kabuuang 7.0 puntos mula sa siyam na salang sa board at may magandang tsansa pa rin sa korona na nagkakahalaga ng P85,000 gayudin sa paghablot ng upuan bilang kinatawan ng bansa sa Asian Indoor & Martial Arts Games (Nobyembre, Bangkok, Thailand) at FIDE World Chess Olympiad (Setyembre, Budapest, Hungary) bago matapos ang taon.

Pero tinatayang magiging isang gitgitang pagtatapos ang mangyayari sa paligsahang binansagan ding Battle of the Woman Masters dahil bukod kay pre-tournament favorite Frayna at dehadong si Canino, nasa eksena pa rin si Woman International Master Jan Jodilyn Fronda (Rating: 2053) na kasosyo naman sa liderato si Canino (Rating: 1902) bunga na rin ng naipong 7.0 puntos.

Hindi na inaasahang makakahabol pa sa karera para sa korona ang mga bumubuntot na sina WIM Kylen Joy Mordido (5.5 puntos) at Woman FIDE Master Shania Mae Mendoza (5.0 puntos) na nakasalampak na lang sa pang-apat at panglimang puwesto ayon sa pagkakasunod-sunod.