All-stars sa PCAP, uusad, Reinforced Cup sa Mayo

ni Eddie M. Paez Jr. - @Sports | April 21, 2021

Magiging abala na naman ang Professional Chess Association of the Philippines o PCAP ngayong Mayo dahil sa pag-usad ng All-Stars Games at ng Reinforced Conference na binansagan ding Wesley So Cup ng mga tagapangasiwa.

Sa All-Stars event ng pinakaunang professional chess league sa bahaging ito ng daigdig, magsasalpukan sa Mayo 2 ang koponan ng North at ng South. Ang komposisyon ay nakabase sa resulta ng botohan ng mga tagasubaybay, coach at manlalaro.

Tatampukan ng dayuhang chessers ang kada koponan sa PCAP Second Conference na itinataguyod ni dating Philippine chess king at ngayong ay Super GM Wesley So. And tubong Cavite na World Random Fischer Chess champion ay naglaan ng mga gantimpala para sa mga magpo-podium.

Samantala, sinorpresa ni Kim Kenneth Santos ang mga karibal tungo sa paghablot ng titulo sa pangunahing kategorya ng kalalakihan samantalang dinomina ni Ruelle Canino tulad ng inaasahan ang katulad na pangkat para sa mga dalagita upang pangunahan ang mga nagmarka sa National Age Group Chess Championship - Visayas Leg.

Kulelat sa pre-tournament ranking bukod pa sa pagiging unrated pero pinangunahan ni Santos ang mga performers sa Under - 20 Boys dala ang 5.5 puntos mula sa 7 rounds. Kasama sa mga sinilat niya sina 4th seed Wayne Ruiz sa panlimang yugto at si 10th ranked Jerico Santiaguel na hinatak nito sa isang hatian ng puntos.

Pumangalawa kay Santos si no. 5 Jave Mareck Peteros (5.0 puntos; tiebreak: 27.0) habang pumangatlo si no.1 Clyde Saraos (5.0 puntos; tiebreak: 25.5) sa bakbakang online chess. Hindi pinalad na makapasok sa podium kahit na may limang puntos din sina 18th seed Gene Kenneth Estrallado at no. 2 bet Jasper Faeldonia kaya 4th at 5th lang sila ayon sa pagkakasunod-sunod.

Sa kabilang dako, kumamada si Canino ng 4.5 puntos pagkatapos ng 5 rounds para itala ang runaway na tagumpay sa Under-20 Girls Division. Dalawang buong puntos ang agwat ng dalagita mula sa pinakamalapit na karibal.

Kasama rin sa listahan ng mga nagwagi sa kani-kanyang grupo sina Carl Daluz (Under 18 Boys); Christine Faith Tabungar (Under 18 Girls); Fletch Archer Arado (Under 16 Boys); Ruth Jamelin Lim ( Under 16 Girls) at iba pa.

Ambuang, Rivera at Santiaguel, nagpanganga sa Visayas Chess

ni Eddie M. Paez Jr. - @Sports | April 19, 2021

Ginulat ng trio nina Michael Jackson Ambuang, Joseph Lawrence Rivera at Jerico Santiaguel ang mga miron ng paspasang ahedres matapos nilang masingitan ang mga paborito sa podium Philippine Sports Commission - National Chess Federation of the Philippines Selection- Visayas Leg.

Pinatunayan naman ng 15-anyos na si Franchesca Largo na karapat-dapat sa kanya ang taguring "topseed" nang irekord niya ang 7.5 puntos para daigin ang 30 iba pang karibal para sa korona sa kababaihan. Hindi naman inaasahan ang pagkuha nina Princes Louise Oncita at Daniela Bianca Cruz ng sumunod na dalawang puwesto dahil sa pagiging lower-ranked entries nila.

Sumandal si Ambuang, no. 14 lang sa pre-tournament seedings dahil rating na 1957, sa pitong panalo, isang tabla at mataas na tiebreak points upang kontrahin ang nag-iisang talo at makaakyat sa trono ng kompetisyong nilahukan ng 87 iba pang disipulo ng chess sa kabisayaan.

Hinugutan ng 33-taong-gulang na kampeon ng mga panalo sina John Jhorel Solidum (round 1), Joselito Asi (round 2), Zeus Alexis Paglinawan (round 3), Ritchie James Abeleda (round 4), Santiaguel (round 5), Juncin Estrella (round 8) at Gene Kenneth Estrellado (round 9) samantalang nakipaghatian siya ng puntos kontra kay Rivera (round 6) para isumite ang kabuuang 7.5 puntos

Ito rin ang naging produksyon ng binatilyong disipulo ng ahedres na si Rivera ngunit naobliga itong makuntento sa pangalawang puwesto dahil sa mas mababang produksyon pagdating sa tiebreak. Tinapos ni Rivera, 18-anyos at mayroon lang rating na 1950 at pang 17 sa rankings bago nagsimula ang bakbakan, ang torneo na walang talo (anim na panalo at tatlong draws).

De Luna at Gomez, target ang 4th title sa World Cup of Pool

ni Eddie M. Paez Jr. - @Sports | April 16, 2021

Tutumbukin ng Pilipinas sa pamamagitan nina Jeffrey “The Bull” De Luna at Roberto “Superman” Gomez ang makasaysayang pang-apat na titulo sa prestihiyosong World Cup of Pool na nakatakdang magsimula sa bilyaran ng Milton Keynes, England ngayong Mayo 9 hanggang 14.

Sa halos isa’t-kalahating dekada ng maigting na bakbakan sa torneo, wala pang bansa ang nakakagawa nito pero ang mga cue artists ng Pilipinas ay kumakatok na sa pinto ng kasaysayan.

Taong 2006 nang magsanib-puwersa sa England sina Billairds Congress of America (BCA) Hall of Famers Efren “Bata” Reyes at Francisco “Django” Bustamante para ibigay sa Pilipinas ang una nitong titulo. Pilipinas rin ang inagural champion ng paligsahan. Nang muling ganapin ang paligsahan noong 2009, ang tandem na Reyes-Bustamante uli ang nagkampeon sa harap ng kanilang mga kababayan.

Pumasok sa eksena sa England sina Lee Van “The Slayer” Corteza at Dennis “Robocop” Orcullo noong 2013 para ibigay sa Pilipinas ang pangatlo nitong korona.

Noong 2019 nang huling ganapin ang paligsahan, nagkampeon sina Albin Ouschan at Mario He para sa Austria habang ang tikas nina De Luna at 2017 World 9-Ball king Carlo “The Black Tiger” Biado ay nagbigay ng runner-up honors para sa Pilipinas.

Ngayong 2021, masusubukan ang angas sa mesa ng puwersa nina The Bull at Superman. Si De Luna ay sariwa sa pagkopo ng dalawang korona sa Predator Sunshine State Tournament. Pang-apat na rin ito sa mga podium finishes na naiposte ng 37-taong-gulang na Pinoy ngayong 2021 sa panahon ng pandemya. Kamakailan ay pumangatlo siya sa Michael Montgomery Memorial 10-Ball Mini (Frisco, Texas) gayundin sa Rack N Grill 9-Ball Shootout (Augusta, Georgia). Noong Pebrero ay namayagpag si Gomez kontra sa 110 iba pang cue artists para makuha ang trono ng Midwest Open Billiards One Pocket sa Ohio.