IM's Quizon, Miciano at Fide Master Literatus, malakas

ni Eddie M. Paez Jr. - @Sports | May 03, 2021

Pinangunahan nina untitled Merben Roque, International Master Daniel Quizon, IM John Marvin Miciano, Michael Concio Jr. at FIDE Master Austin Jacob Literatus ang atake ng mga Pinoy chessers sa World Cup 2021 Qualifying Tournament - Zone 3.3 Open Championship na ginaganap sa pamamagitan ng hybrid format base sa panuntunan inilatag ng world governing body ng ahedres.

Samantala, sa PSC-NCFP Mindanao Leg elimination, pulos panalo at tabla ang naging dekorasyon ng rekord ni Samson Chin Lim upang iposte ang walong puntos mula sa siyam na rounds at itakbo ang korona sa men’s division. Walong puntos din ang naging pasaporte ni Rowelyn Joy Acedo upang tanghaling reyna na pagtitipon.

Dinaig ni 12th seed Roque (rating: 2330) si Malaysian bet Jie Anderson Em Ang (no.38, rating: 1910), hindi nakaporma si John Jerish Velarde (no.39, rating: 1896) sa kababayang si Quizon (no. 13, rating: 2319), tinalo ni Miciano (no. 14, rating: 2316) si AIM Sebastien Sian Che Chua (no.40, rating: 1815) ng Malaysia, wagi si Concio (no. 16, rating: 2297) kay Edwin Wai Choong Lam (Malaysia, ni. 42, rating: 1787) habang humugot ng buong puntos si Literatus (no.23, rating: 2180) sa kapwa Pinoy na si John Gabriel Umayan (no.49, rating: 1524).

Umiskor din ng panalo para sa tatlong kulay ng bansa sina Michael Gotel (rating:2238) at Kimuel Aaron Lorenzo (rating: 1769) ngunit nahatak sa isang sorpresang hatian ng puntos si 5th seed Grandmaster Darwin Laylo (rating: 2434) nang makaharap niya si 31st ranked Tze Shan Rohan Navaratnam (rating:2071) ng Malaysia.

Ang pinakamalaking upset sa torneo ay nasaksihan sa unang board nang maungusan si GM Susanto Megaranto (rating: 2550) ng Indonesia ni Thai CM Prin Lao Hawirapap (rating: 2125) na pang-27 lamang sa pre-tournament seedings.

Alvarez, umentra sa semis ng Virtual Ghost Tour

ni Eddie M. Paez Jr. - @Sports | May 02, 2021

Tinumbok ni Elijah Alvarez ang pinakamalaking tira niya sa pandaigdigang entablado sa larangan ng bilyar nang makapasok ang binatilyong Pinoy sa semifinals ng Arcadia Virtual Ghost (VG) Battle of the Sexes Billiards Tournament na ginaganap online.

Kilala sa taguring “Wonderboy” sa pool circle, nakalusot sa matinding hamon mula sa pangatlong grupo ng qualifying stage si Alvarez kaya ito humakbang sa knockout rounds. Sa grupong nabanggit, nakasama niyang nag-ambisyon sina Yuli Hiraguchi ng Japan, Polish ace Konrad Juszczyszyn at ang pambato ng Czech Republic na si Yvonne Ullman Hybler. Pero hindi tinakasan ng tikas si Alvarez at nakuha pang daigin si Poison VG 10-Ball 2.0 Virtual Tournament champion Juszczyszyn kaya nakausap ito sa susunod na yugto. Naging kinatawan sa knockout rounds ng grupo sina Alvarez at Hiraguchi.

Sa knockout rounds, nakakuha ng bye si Alvarez bilang insentibo sa pagiging 2nd placer ng qualifiers kaya naghintay lang siya ng makakatunggaling manggagaling sa Round-of-16.

Sa quarterfinals, itinakda ang paghaharap nina Alvarez at Margaret Fefilova. Ang huli ay napasok sa final 8 ng kompetisyon matapos daigin si Hiraguchi. Pumabor ang pagkakataon para sa Pinoy nang ideklarang winner by forfeiture si Alvarez laban kay Fefilova.

Haharapin ni “Wonderboy” ang Amerikanong si Tyler Styler sa semifinals. Si Pia Filler ng Germany ang ginawang tuntungan ni Styler patungo sa huling apat na bilyarista.

Isa pang Pinoy, si Poison VG 10-Ball 2.0 Virtual Tournament runner-up Aivhan Maluto, nakabase sa United Arab Emirates, ang sumabak din sa kompetisyon at nakaabot sa “isang talo, uwi na” na bahagi ng paligsahan pero hindi na nakaahon sa gitgitang nangyari sa Round-of-16.

Dahil sa pagiging semifinalist, sigurado nang magbubulsa si Alvarez ng pabuyang $1,200 ngunit tiyak na sasargo pa ito nang husto para makapasok sa championship round at tuluyang makagawa ng marka sa world stage.

Pinay golfers, may tsansa sa Olympics

ni Eddie M. Paez Jr. - @Sports | April 29, 2021

Tila hinihintay na ng Tokyo Olympics ang pagdating ng mga pamosong Pinay golfers na sina Yuka Saso at Bianca Pagdanganan matapos na mapanatili nila ang kani-kanyang puwesto sa listahan ng mga parbusters na kwalipikadong maglaro sa prestihiyosong pagtitipon dalawang buwan mahigit na lang ang natitira.

Base sa listahang ipinalabas ng International Golf Federation o IGF nitong Lunes, pasok ang dalawang Pinay parbusters sa talaan ng mga manlalarong puwedeng lumahok sa sports spectacle na karaniwan nang ginaganap tuwing apat na taon ngunit hindi natuloy noong 2020 dahil sa pandemya.

Sa Olympic Golf Ranking na nakabase sa Official World Golf Ranking, ang 19-anyos na si Saso ay matibay na nakakapit sa pang-22 na baytang samantalang ang 23-anyos na si Pagdanganan ay nakaupo sa pang-43 na posisyon.

Solido ang kanilang mga kinalalagyan base sa regulasyon ng organizers kung saan ang unang 60 lady golfers pagkatapos ng Hunyo 2021 ay kwalipikadong pumalo sa Olympiada. Kasama rin sa panuntunan na limitado sa apat na manlalaro ang puwedeng kumatawan sa isang bansa kung ang mga ito ay pulos nasa top 15. Kung nasa pang-16 hanggang 60, limitado lang sa dalawa kada bansa ang pinapayagang maglaro.

Kung mapapanatili o mahihigitan pa nina Saso at Pagdanganan ang kanilang posisyon, may karagdagang mga Olympians ang bansa na may seryosong tsansa sa pinakaaasam na medalya.

Si Saso ay sariwa sa isang top 10 wind-up sa isang torneo ng prestihiyosong Ladies Professional Golf Association (LPGA) Tour. Sa Lotte Championship na ginanap sa Kapolei Golf Course ng Hawaii, pumang-anim ang double gold medalist sa huling Asian Games. Si Pagdanganan ay may 2 ginto noong 2019 Manila SEA Games, ang siyang itinuturing na longest hitter ng LPGA.