Malagkit ang tingin nina Gomez at de Luna sa World Cup title

ni Eddie M. Paez Jr. - @Sports | May 08, 2021

Magsisimula na ngayong linggo ang paglalakbay ng Pilipinas papunta sa makasaysayang pang-apat na korona sa prestihiyosong World Cup of Pool na masasaksihan sa Stadium MK ng Milton Keynes, England.

Nagkampeon ang bansa noong 2006 at 2009 dahil sa tikas ng mga Billiards Congress of America (BCA) Hall of Famers na sina Efren “Bata” Reyes at Francisco “Django” Bustamante. Taong 2013 naman nang maghari ang tambalang Dennis “Robocop” Orcullo at Lee Van “The Slayer” Corteza para sa Pilipinas.

Muntik nang mahablot ng mga Pinoy ang pang-apat na titulo noong 2019 nang pumangalawa sina Carlo “The Black Tiger” Biado at Jeffrey “The Bull” De Luna sa likod ng Albania na nagkampeon sa tulong nina Albin Ouschan at Mario He. Walang naganap na World Cup of Pool noong 2020 dahil sa pandemyang dulot ng COVID-19.

Ngayong 2021 edition, sasandalan ng bansa ang tambalan nina De Luna at ni Roberto “Superman” Gomez. Unang sasagupain ng dalawang Pinoy ang Great Britain “B” na binubuo nina Kelly Fisher at Allisilon Fisher. Si De Luna ay sariwa sa pangungulekta ng dalawang titulo sa U.S. pro circuit samantalang si Gomez, minsan nang naging runner-up sa World 9-Ball Championships bagamat hindi ito seeded sa main draw, ay naghari sa Midwest One Pocket Open Tournament sa Estados Unidos pa rin.

Maraming matitikas na nakaharang sa daraanan ng Pilipinas papunta sa trono. Una sa talaan ang 2017 at 2019 champions Austria nina Ouschan at He. Kasama rin ang pamatay na tambalan nina Skyler Woodward at Billy Thorpe para sa U.S.A. at ang pambato ng punong-abalang United Kingdom na sasandal sa tikas nina Jayson Shaw at Chris Melling.

Masama rin ang tingin sa 2019 runner-up na Pilipinas ng mga billiards icons ng Kuwait, Estonia, Hungary, Lithuania, Japan, Australia, Albania, Croatia, Bosnia & Herzegovina, Belgium, Denmark at Czech Republic.

Fide World Cup Qualifier IM's Quizon, Concio, angat

ni Eddie M. Paez Jr. - @Sports | May 07, 2021

Hinatak ng 16-anyos na si International Master Daniel Quizon sa tabla si Grandmaster Novendra Piasmoro ng Indonesia sa isang hindi inaasahang resulta upang mapanatili ang kanyang puwesto sa nangungunang grupo ng ginaganap na FIDE World Cup 2021 Qualifying Tournament - Asian Zonals 3.3.

Itinuturing na upset ang ipinoste ni Quizon (ranked 13, rating: 2319) kontra sa 2nd seed (may 2502 na rating) na Indonesian. Ito rin ang nagbigay sa binatilyo ng apat na puntos mula sa tatlong panalo at dalawang tabla pagkatapos ng 5 rounds.

Bukod dito, naging pasaporte niya para makahati sa liderato ang kapwa Pinoy na si IM Michael Concio Jr., IM Ervan Mohamad (Indonesia), Sean Winshand Cuhendi (Indonesia) at FIDE Master Jagadeesh Siddhart ( Singapore).

Napuwersa rin ni Concio, 16th seed at may rating na 2297, ang mas mataas sa seedings na si Mohamad sa hatian ng puntos noong round 5.

Kasama sa mga naging marka ni Quizon sa paligsahan ay nang talunin ng binatilyong Pinoy si 18th seed FIDE Master Pitra Andyka ng Indonesia. Kinailangan lang ni Quizon ng isang dosenang sulong sa hawak na puting piyesa para irehistro ang panalo.

Kalahating puntos sa likuran ng tumatrangkong grupo ang untitled Pinoy chesser na si Merben Roque, isang Malaysian, isang Singaporean at limang kinatawan ng malupit na koponan ng Indonesia. Tinalo ni Roque si Tian Yu Poh ng Malaysia sa panglimang yugto ng kaganapang magkakaloob ng gantimpalang salapi sa mapapabilang sa podium at tiket naman sa prestihiyosong FIDE World Cup sa unang dalawang disipulo ng ahedres pagkatapos ng 9 rounds.

IM Concio at Gotel, nanilat; IM Quizon, malupit sa FIDE QT

ni Eddie M. Paez Jr. - @Sports | May 04, 2021

Sinilat nina International Master Michael Concio Jr. at hindi tituladong si Michael Gotel ang mga pinapaborang katunggali mula sa Singapore at Indonesia ayon sa pagkakasunod-sunod samantalang nagwagi si IM Daniel Quizon kontra sa isang Thai upang manatili sila sa liderato at ibigay sa Pilipinas ang makinang na araw sa ginaganap na FIDE World Cup 2021 Qualifying Tournament - Asian Zonals 3.3.

Kinailangan lang ni Concio ang 31 sulong para magabayan sa tagumpay ang mga puting piyesa laban kay Singaporean IM Jingyao Tin. Ang binatilyong Pinoy, 16-anyos, ay seeded 16th lang dahil sa kanyang 2297 na rating habang si Tin, 20-anyos ay pangatlo sa mga paboritong manalo sa torneo bunga ng bitbit na 2482 na rating.

Ginulat ni Gotel, 48-anyos, may rating na 2238 at pang-21 lang sa seedings, si 8th ranked IM Jodi Azarya Setyaki, 22-anyos na may 2389 na rating mula sa Indonesia, pagkatapos ng 33 galaw gamit pa ang dehadong itim na piyesa.

Pinasuko rin ni Quizon, 17-anyos 13th seed at may rating na 2319, si CM Prin Laohawirapap ng Thailand pagkatapos ng 19 moves gamit din ang itim na piyesa para sa pangalawang sunod na panalo kagaya nina Concio at Gotel.

Kasosyo ng tatlong pag-asa ng Pilipinas sa paghawak ng trangko sina FIDE Master Pitra Andyka (18th seed, rating: 2276), IM Theolofus Yoseph Taher (4th seed, rating: 2455) at IM Mohamad Ervan (10th seed, rating: 2356) na pawang mga pambato sa Indonesia sa paligsahang ginaganap sa pamamagitan ng hybrid na format na inilatag ng world governing body na FIDE.