Gomez, umentra na sa round-of-16 ng World Pool

ni ATD \ Eddie M. Paez, Jr. - @Sports | June 10, 2021

Habang tumatagal ay lalong bumabangis sa tumbukan si Pinoy cue master Roberto Gomez.

Tila walang iniisip na pandemya dulot ng coronavirus (COVID-19) si Gomez dahil naka-pokus ito sa kanyang kampanya.

Swak sa round-of-16 si 42-year-old Gomez matapos nitong sargohin ang 11-7 panalo laban kay Aloysius Yapp ng Singapore nang magharap sa last 32 ng prestihiyosong World Pool Championship sa Marshall Arena, Milton Keynes, kahapon. Bago pinayuko ni Gomez si Yapp sa event na ipinatutupad ang double-elimination format ay kinalos muna nito si Muhammed Daydat ng Africa, 11-2 sa last 64.

Makakalaban ni Gomez sa susunod na phase sa tournament na nakalaan ang $50,000 premyo sa magkakampeon ay ang tigasin sa USA na si Skyler Woodward. Para dumiretso sa quartefinals, kailangan manalo si Gomez sa kanyang laban at mananatili ang tsansa nitong makuha ang korona.

Samantala, maliban kay Gomez, kasali rin si Pinoy Jeff De Luna sa nasabing event pero napatalsik na ito sa torneo matapos lumasap ng dalawang sunod na kabiguan.

May isa pang Pinoy na kasali, ito'y si Jeffrey De Luna pero maaga itong napatalsik sa torneo matapos makalasap ng dalawang sunod na kabiguan.

Si Woodward ng U.S.A. ay may mataas na kumpiyansa matapos na pauwiin si 2019 World 9-Ball Championships winner Fedor Gorst ng Russia, 11-8. Nauna rito, naungusan ni Gomez, minsan naging kampeon ng Derby City Classic Bigfoot Challenge, si Swiss bet Stewart Colclough, 9-8, at si 2016 world 9-ball championship winner Albin Ouschan ng Austria, 9-7, sa preliminaries ng kaganapang isinasaayos ng World Pool Billiards Association (WPA) at umakit ng matitinding manunumbok mula sa maraming bahagi ng daigdig.

Kung magtatagumpay sa paligsahan, mapapabilang ang tubong Zamboanga na cue artist sa mga Pinoy world champions na sina Efren “Bata” Reyes (8-Ball/2004, 9-Ball/1999), Alejandro “The Lion” Pagulayan (9-Ball/2004), Ronnie “The Volcano” Alcano (8-Ball/2007, 9-Ball/2006), Francisco “Django” Bustamante (9-Ball/2009), Dennis “Robocop” Orcullo (8-Ball/2011) at Carlo “The Black Tiger” Biado (9-Ball/2017).

Hindi ito ang unang salang ni Gomez sa kompetisyon. Minsan na siyang pumangalawa sa prestihiyosong pagtitipon, mahigit isang dekada na ang nakararaan.

Amoy Olympic Gold ang performance ni Golfer Saso

ni Eddie M. Paez Jr. - @Sports | June 06, 2021

Sumibad pataas ang pag-asa ng bansa na posibleng mapuputol na ang tagtuyot ng Pilipinas para sa isang Olympic gold medal matapos na hablutin ni Fil-Japanese Yuka Saso ang solong pangunguna sa isang major event ng Ladies Professional Golf Association (LPGA) na kasalukuyang nilalahukan ng mga pinakamalulupit na lady parbusters mula sa iba’t-ibang parte ng daigdig.

Pinakawalan ni Saso, dating Youth Olympic Games silver medalist, ang anim na birdies sa round 2 upang mapawi ang epekto ng dalawang bogeys at isumite ang kartadang 69-67 pagkatapos ng dalawang araw ng kompetisyon. Ito ay sapat na para pangunahan ang mga pro golfers ng LPGA bitbit ang kabuuang iskor na 6-under-par 136 strokes.

Noong 2020, sumali rin sa prestihiyosong kaganapan si Saso at nakuha niya ang pang-13 puwesto. Isang palo sa likod ng 19-taong-gulang na dalagitang Pinay ay si Lee Jeongeun (137) na nagsosolo sa pangalawang baytang habang magkasalo naman sa pangatlo at pang-apat na puwesto sina Megan Khang (138) at ang Amateur tinedyer na si Megha Canne (138). Nasa panglimang upuan si Shanshan Feng (139) ng China.

Kasama sa mga ginulat ni Saso sina South Korean Imbee Park, US bet Lexi Thompson at overnight leader Mel Reid ay kasalukuyang nakasalampak sa pang-anim hanggang pangsiyam na puwesto.

Galing si Saso, dating double gold medalist ng Asian Games, sa isang top 10 performance sa JLPGA Chukyo TV Bridgestone Ladies Open na ginanap sa Chukyo Golf Course ng Ishino, Aichi, Japan. Swak din kamakailan ang Fil-Japanese parbuster sa unang sampu ng LPGA Lotte Championships kamakailan sa Oahu, Hawaii.

Nagsisilbing bahagi ng paghahanda ni Saso para sa nabinbing Tokyo Olympics ang pagsali sa US Women’s Open. Kasalukuyang nasa pang-22 na puwesto ang Pinay parbuster sa listahan ng 60 manlalaro na papayagang sumali sa Olympics ngayong Hulyo. Inaasahang makakasama ni Saso sa Olympics si 2-time SEA Games gold medal winner Bianca Pagdanganan.

Super GM So, runner-up sa FTX Crypto Tour Cup

ni Eddie M. Paez Jr. - @Sports | June 05, 2021

Muling nakita ang mataas na antas ng husay ng tubong Cavite na si Grandmaster Wesley So sa online chess nang makuha niya ang runner-up honors sa $320,000 Meltwater Champions' Chess Tour: FTX Crypto Cup na nilahukan ng karamihan ay mga pinakamalulupit na chessers sa buong daigdig.

Hinatak niya sa isang gitgitang duwelo si world champion GM Magnus Carlsen ng Norway sa finals. Sa unang araw, kapwa kumuha ng 2 puntos sina So at Carlsen, isang resultang naulit sa pangalawang araw. Dahil dito, nauwi sa tatlong Armagedon matches ang sagupaan. Sa Game 1, nangibabaw si So pero nagwagi sa huling dalawang laro ang Norwegian kaya nito nakuha ang korona.

Nagsilbing resbak ni Carlsen ang korona kontra sa dating hari ng ahedres sa Pilipinas. Bago ang torneo, dalawang beses nang nagkampeon sa Tour si So. Sa parehong pagkakataon, sila ng Norwegian ang nagharap sa finals at dalawang beses niya itong nasingitan sa trono. Nang una (Skilling Open) ay nataong nagdiriwang si Carlsen ng kaarawan at noong pangalawa (Opera Euro Rapid) ay noong Araw ng mga Puso.

Sa buong Tour sina So at Carlsen lang ang may tigalawang korona. Ang karibalang Carlsen-So ay unang napunta sa centerstage noong magharap sila para sa korona ng pinakaunang World FIDE Fischer Random Chess Championships. Sa hindi inaasahang resulta, inilampaso ni So si Carlsen sa harap ng mga kababayang Norwegians.

Nakasampa sa finals ng Crypto Cup ang 2-time US Champion na si So matapos pumanglima sa qualifiers at matapos walisin sa knockout stage sina Maxime Vachiere Lagrave ng France at Ian Nepomniachtchi ng Russia. Nagsilbing “KJ” si So sa mga fans sa pagpasok niya sa championship match-up dahil umaasa ang marami na makikita nila ngayong Hunyo ang isang world championship preview sa pagitan nina Carlsen at Nepomniachtchi.