Dimayuga, naghari sa Seletar Golf Singapore

ni Eddie M. Paez Jr. @Sports | July 14, 2024

Photo: Carlo Biado / FB

Naputol ang matinding tagtuyot na nararanasan ng Pilipinas sa kasaysayan ng Southeast Asian Amateur Golf Team Championships nang dominahin nito ang event noong Biyernes sa Seletar Golf and Country Club ng Singapore.

Tinapos ng bansa ang ika-61 edisyon ng paligsahan sa pamamagitan ng iskor na 17-under-par 847 strokes upang ilampaso ang sumegundang Vietnam at tumerserang Thailand. Sampung palo ang naging agwat ng kampeon sa runner-up at 12 hataw naman kontra sa mga Thais.

Taong 2013 pa nang huling mangibabaw ang Pilipinas sa paligsahang kilala rin sa tawag na Putra Cup. Kasama noon sa koponan si Rico Hoey na ngayon ay kumakampanya na sa Professional Golf Association (PGA) Tour.

Naging angkla ng bansa sa pagsampa sa trono ang 22-taong-gulang na si Enrique Dimayuga na siya namang nanguna sa bakbakang pang-indibidwal kaya nairehistro ng Pilipinas ang maangas na twinkill. Isang eagle at pitong birdies sa unang 15 butas ng huling round ang pinakawalan ng Pinoy bago ito pinabagal ng tatlong magkakasunod na bogeys. 

Nagtabla sina Dimayuga at Singaporean Ryan Ang pagkatapos ng apat na araw ng tagisan ng husay sa golf course. Bagamat kapwa sila may 277, napunta sa Pinoy ang korona dahil nakaungos ito sa countback.

Bahagi rin ng matagumpay na koponan ng bansa sina Carl Corpus, Shinichi Suzuki at Abe Rosal. Nagbabaga ang mga paghataw ng bola ng golf ni Dimayuga sa kasalukuyan.

Matatandaang ilang araw pa lang ang nakakalipas nang putulin din ng 20-taong parbuster ang pagkauhaw ng Pilipinas sa titulo sa makasaysayang Singapore Open Amateur Championships nang pangharian nito ang pang-76 edisyon ng paligsahan sa Orchid Country Club. Apat na strokes naman ang naging lamang niya sa pinakamalapit na karibal.

Biado lusot sa q'finals ng Maldives 10-Ball Open

ni Eddie M. Paez Jr. @Sports | June 30, 2024

Photo: Carlo Biado / FB

Dinaig ni 2017 World 9-Ball titlist Biado sa round of 32 ang kababayang si Johann Chua, 10-8, bago pinutol ang pag-aambisyon ni Kuwaiti Badar Alawadhi noong Last 16 sa iskor na 10-4 upang mapanatili ang pangkampeonatong paghahangad sa paligsahan.

Ngunit nabigong sumabay kay "Black Tiger" Biado ang anim na iba pang pambato ng Pilipinas matapos silang masipa palabas ng torneo dahil sa pagyuko sa magkakaibang mga katunggali.

Bukod kay "Bad Koi" Chua, laglag sa kangkungan sina Michael Baoanan, Sean Mark Malayan, Jonas Magpantay, Jeffrey Ignacio at Bernie Regalario. Si "Silent Killer" Magpantay ay nakatuntong lang sa round-of-16 samantalang ang iba ay hanggang sa Last 32 nakasampa.

Dahil dito, nakasalalay na lang kay Biado ang tsansa ng bansa na kuminang sa paligsahang kinikilala ng World Pool Billiards Association (WPA). Ang susunod na haharapin ng kasalukuyang World 10-Ball champion at WPA no. 10 sa kanyang paglalakbay sa Maldives ay si Mario He na parte naman ng Team Austria na naging kampeon na rin sa World Cup of Pool.

Bukod kina Biado at He, nasa eksena pa rin para sa korona sina Estonian Dennis Grabe, Griyegong si Alexander Kazakis, Polish Konrad Juszczyszyn at defending titlist Pin Yi Ko na mula naman sa powerhouse Taiwan.   

7 Pinoy swak sa round-of-32 ng Maldives 10-ball open

ni Eddie M. Paez Jr. @Sports | June 29, 2024

Photo: Maldives Pool Billiard Association / FB

Magiting na humakbang ang pitong mga bilyarista ng Pilipinas sa round-of-32 ng umiigting nang tagisan ng husay sa 2024 Maldives 10-Ball Open sa Lungsod ng Male kahapon ng madaling araw (oras sa MNL).

Ang pulutong ng mga Pinoy na nakatayo pa at nananatiling may tsansa sa korona ay binubuo nina Michael Baoanan, Sean Mark Malayan, Jonas Magpantay, Jeffrey Ignacio, Bernie Regalario, World 10-Ball king Carlo Biado at si 2023 Maldives Open runner-up Johann Chua.

Itinaob nina "Dark Phoenix" Baoanan (Hui Chan Lu, 10-5), Malayan (Ahmed Shiwaz, 10-1), "Silent Killer" Magpantay (Abdulla Salem Alenezi, 10-5), "Cobra" Ignacio (Lin Ta-li, 10-6), "Li'l Prince" Regalario (Ping Han Ko, 10-7) at "Bad Koi" Chua (Kelvin Zarekani, 10-4) ang kani-kanyang mga karibal para maiposte ang kalmanteng mga panalo. 

Nasa Final 32 rin si "Black Tiger" Biado kahit hindi ito sumalang sa unang yugto ng knockout stage dahil sa pagiging isa sa mga seeded cue artists sa tunggaliang may basbas ng World Pool Billiards Association.

Pero tiyak na daraan na sa butas ng karayom pagkatapos nito dahil mas mabibigat ang kanilang susunod na magiging mga ka-engkwentro. Duwelong Baoanan-Wu Kun Lin, Pin Yi Ko-Malayan, Magpantay-Dennis Grabe, Ignacio-Ping Chung Ko, Regalario-Mario He at Biado-Chua ang naikasa. 

Buhay din at nasa eksena pa ang mga bituing sina Fedor Gorst (USA), Aloysius Yapp (Singapore), Miezko Fortunski (Poland), John Morra (Canada), Sanjin Pehlivanovic (Yugoslavia) at Alexander Kazakis (Greece).