Orcullo, sumungkit ng 15Th Crown sa Ohio

ni Eddie M. Paez Jr. - @Sports | November 13, 2021

Hinablot ni dating World 8-Ball champion Dennis Orcullo ng Pilipinas ang pang-15 korona ngayong 2021 matapos makaakyat sa trono ng Action Palace Open Pool Tournament sa Michael’s Billiards sa Fairfield, Ohio.

Nakatakdang sumargo sina US Open king Carlo Biado at Oklahoma 9-Ball titlist Roland Garcia sa Abu Dhabi Open sa Power Break Billiards Hall ng United Arab Emirates. Halagang AED 20,000 ang naghihintay sa mangingibabaw sa event.

Nagsilbing angkla sa Ohio ang manlalarong kilala sa alyas na “Robocop” sa mga pool aficionados sa isang 1-3 na pagsasara nang pumangatlo ang minsan nang naging World 9-Ball Championships runner-up na si Roberto Gomez ng Zamboanga.

Pitong karibal ang nag-ambisyong humarang kay Orcullo pero lahat sila ay nganga sa dulo dahil sa husay ng 42-anyos na manunumbok. Ang ubod ng linis na 7-0 panalo-talo na rekord ang naging pasaporte niya sa pag-upo sa trono.

Napabilang sa mga biktima ni Orcullo sina Michael Brown (3-2), Shane Mcminn (3-2), Troy Jones (3-0), Dee Adkins (3-0), at si Woodward sa tulong ng kambal na 3-1 sa finals. Nasingitan ni “Superman” Gomez ng panalo sina Josh Lewis (3-2), Nathan Childress (3-1), McMinn (3-1), John Gabriel (3-1), Adkins (3-2), Josh Roberts (3-2) at Billy Thorpe (3-2) bago siya sumalpok at napauwi ni Woodward (2-3).

Fil-Jap Saso, sasabak sa U.S. Pelicans C'Ships

ni Eddie M. Paez Jr. - @Sports | November 7, 2021

Sasalang si Fil-Japanese Yuka Saso sa LPGA Pelican Women's Championships sa Nobyembre 11 hanggang 14 sa Belleair, Florida at umaasa ang Pinoy sports fans sa Pilipinas na makakasikwat pa ng karagdagang karangalan para sa bansa ang dalaga bago tuluyang pumalo sa mundo ng professional golf bilang kinatawan na ng Japan.

Matagumpay namang nakapasok si Carl Jano Corpus sa weekend play ng Asia Pacific Amateur Golf Championships sa Dubai. Ngunit ang kartada ng Pinoy na 1-under-par ay nagtulak sa kanya palabas ng top 10 kaya kailangan pa nitong humataw sa natitirang mga butas sa kompetisyon.

Kamakailan ay napabalitang pagsapit ng 22-anyos ay pipiliin na ni Saso ang pagiging Japanese citizen. Ito ay magiging pangalawang panghihinayangan ng mga sports buff ng Pilipinas. Ang una ay nang tumawid ng pederasyon mula sa Pilipinas papunta sa USA ang ngayon ay FIDE World Random Fischer Chess champion na si Grandmaster Wesley So.

Sa ngayon ay sumasabak si Saso, reyna ng prestihiyosong U.S. Open at may-ari ng dalawang gintong medalya mula sa Asian Games, sa Japan LPGA major event na Toto Open. Nakaupo siya sa pulutong ng mga umaalagwa sa torneong nasa penultimate round na bitbit ang 6-under-par 211 na kartada. Ito ay pitong palo ang layo sa trangko na idinaraos sa 6,616 yardang Seta Golf Club ng Shiga, Japan.

Sa bakbakang Pelican kung saan $1,750,000 ang kabuuang pabuya para sa mga magpopodium kabilang sa mga magiging karibal ni Saso sina Rolex World no.1 Jim Young Ko ng South Korea, Tokyo Olympic gold medalist Nelly Korda mula sa USA, LPGA Rookie of the Year, ANA Majors winner at Thai ace Patty Tavatannakit, Rolex World no. 4 South Korean Sei Young Kim.

Pagkatapos sa Toto Japan Open at Pelican ay papalo uli siya sa US sa LPGA season ender na CME Group Tour Championships sa Naples, Florida sa Nobyembre 18-21.

GM So, 3-time US Chess champion na

ni Eddie M. Paez Jr. - @Sports | October 22, 2021

Ipinako ni U.S. Grandmaster Wesley So ang pangatlong titulo sa kasaysayan ng U.S. Chess Championships kahapon matapos na maungusan sa play-offs sina GM Sam Sevian at dating world challenger GM Fabiano Caruana sa pagtatapos ng 2021 edisyon ng face-to-face na prestihiyosong paligsahan sa Saint Louis.

Pagkatapos ng 11-yugtong round robin, pare-parehong nakaipon ang troika ng tig-aanim at kalahating puntos para pansamantalang pagsosyohan ang unang baytang.

Dahil dito, kinailangang magrambulan ng tatlo para malaman kung sino ang magiging kampeon. Unang nakasikwat ng panalo si So laban kay Italian-American Caruana bago winasak ang hamon ni Sevian para sa korona. Si speed chess demon GM Hikaru Nakamura ay hindi lumahok sa tunggalian.

“I thought the tournament was pretty much over by yesterday, Fabiano almost won three games in a row,” pahayag ng nagagalak na si So matapos mauwi sa playoff ang event.

Bukod sa tagumpay ngayong taong ito na nagkakahalaga ng $50,000, ang 28-taong-gulang na dating hari ng ahedres sa Pilipinas mula sa Cavite na sumuporta rin sa Professional Chess Association of the Philippines (PCAP) 2nd Conference ay namayagpag sa torneo noong 2017 at 2020. Sina Caruana at Sevian ay nagbulsa ng $30,000 bawat isa bilang pabuya sa pagiging runners-up.

Makislap ang nagiging paglalakbay ni So, kasalukuyang FIDE World Random Fischer Chess champion, ngayong panahong patuloy na umaatake ang pandemya. Kamakailan ay hinirang siyang 2021 Grand Chess Tour titlist. Naitakas din ni So ang pangalawang puwesto sa isang nakahihilong pagtatapos ng Champions Showdown: Chess 9LX sa Saint Louis, Missouri kung saan kamuntik pang maghari si dating world champion at ngayon ay 58-anyos nang si Garry Kasparov.