Pinay archers, gold sa Recurve; Chua, gold, Biado silver sa 9-ball

ni Eddie M. Paez, Jr. / GA / MC - @Sports | May 19, 2022

Pumalaso pa ang Filipina archers ng gold medal nang talunin ang Vietnam sa women's team recurve event sa Hanoi National Sports Training Center sa pagpapatuloy ng 31st Southeast Asian Games.

Ginulantang ng koponan nina Pia Bidaure, Abby Bidaure, at Phoebe Amistoso ang host Vietnam, 5-4 sa finals para kunin ang unang medalya kahapon ng umaga.

Ito rin ang unang gold medal sa archery ng Pilipinas ngayong 31st SEAG sa Hanoi. Nakuha ng Myanmar ang bronze sa women's recurve sa 5-4 na panalo kontra Malaysia. Lumalagare pa sa bronze ang PHL men's team sa recurve habang si Pia Bidaure ay tatambal kay Jason Feliciano sa bronze medal match ng mixed recurve kontra Vietnam.

Samantala, si Johann Chua ang nakasungkit ng ika-2 gold medal para sa PHL Billiards sa itinakdang all-Filipino finals kontra Carlo Biado sa men's 9-ball pool singles event kahapon. Si Jefrey Roda naman ang silver medalist sa Billiards Men’s Snooker 6-Red Singles.

Tansong medalya naman ang nakuha sa sepak takraw nina Jason Huerte, Rheyjey Ortouste, Ronsted Gabayeron, Mark Joseph Gonzales at John John Bobier sa Men’s Regu event habang bronze din si Jason Balabal sa wrestling men's greco roman 97 kg event kahapon. Pilak na medalya ang sinungkit ni Jefferson Manatad sa wrestling men's greco roman 87 kg. at bronze medalist si Noel Norada sa men's greco roman 67 kg event.

Sakalam naman ang Pinay fencers team sa silver na sina Maxine Esteban, Justine Gail Tinio, Samantha Catantan, at Wilhelmina Lozada sa event ng foil team. Iuuwi naman ni Margarito Angana Jr., ang bronze sa men's Greco roman 60 kg sa wrestling. Nakahabol naman ng bronze si Jessie Geriane sa Swimming women's 199m backstroke.

Matapos namang maka-gold ni Chloe Isleta sa 200m backstroke ay naka-silver naman siya sa women's 100m backstroke. Silver medalist naman si Mark Harry Diones sa Athletic Men's Triple Jump. Bronze si Laila Delo sa taekwondo women's kyorugi 67kg.

Amit, 5th overall sa gold; Men's 9-ball, 'Pinas finalist

ni Eddie M. Paez, Jr. / GA - @Sports | May 18, 2022

Nanatili pa ring reyna si Pinay billiards icon Rubilen Amit sa 9-Ball Pool Singles sa rehiyon ng Southeast Asia.

Nasungkit ni Amit ang ika-2 niyang sunod na SEA Games gold medal sa women’s 9-ball nang talunin kahapon si Hui Ming Tan ng Singapore, 7-2, sa finals ng 31st Hanoi Games. Ito rin ang ika-5 niyang 9-Ball singles title sa biennial meet mula noong 2005, 2007, 2009, at 2019 edition ng games.

Iniangat din niya ang SEA Games medal collection sa 9 gold at 5 silver medals. Malakas ang naging simula ni Amit sa gold medal match sa 3-0 lead bagamat sinisikap makabalikwas ni Tan at pakabahin ang Pinay sa 2-0 counter para 2-3 deficit.

Pero inangkin ng defending champion ang 6th rack hanggang sa tapusin sa panalo ang laban at hindi na binigyan ng rack si Tan hanggang dulo.

Samantala, tumiyak ang PHL billiards team ng gold-silver finish sa men’s 9-Ball Pool Singles ng SEAG sa Vietnam sa nakatakdang paghaharap sa finals ng mga Pinoy na sina Carlo Biado at Johann Chua nang gapiin ang mga kasagupang Singaporean sa semifinals kahapon.

Nakaligtas si Biado kay Aloysius Yapp ng Singapore, 9-7, habang mas astig si Chua kontra Toh Lian Han, 9-3. Ang dalawang Pinoy ay nakabawi na mula sa kabiguan nina Dennis Orcollo at Warren Kiamco kontra Singaporeans din noong quarterfinals ng 9-Ball Pool sa 2019 edition sa Manila. Nakuha nina Yapp at Han ang bronze medals sa event noong 2019. Maghaharap sa Miyerkules sina Biado at Chua sa finals.

Gintong medalya pa rin ang puntirya ni 2019 International Billiards & Snooker Federation Men's Championships runner-up Jeffrey Roda dahil swak na siya sa championship round ng snooker event.

Unang naka-bronze ang tila rock star na alamat ng bilyar na si Efren 'Bata' Reyes dahil nakapasok na siya sa semis ng Carom event. Ang women's golf team ay may pag-asa pang makahirit ng tanso nang makapasok sila sa medal round.

Third gold ni Yulo sa rings, Mandal, naka-gold sa Sanda

ni Eddie M. Paez, Jr. / MC - @Sports | May 16, 2022

Bandang hapon matapos maka-gold uli si Agatha Wong, double celebration na nang maka-ginto rin si Arnel Mandal nang talunin si Laksmana Pandu Pratama ng Indonesia sa finals ng men’s 56kg sanda, 2-0 kahapon sa SEAG.

Uuwi ang Team Philippines na may 2 gold, 2 silver at ang isa mula kay Jones Inso sa men’s taijiquan (taolu) at bronze, at mula rin kay Inso sa taijijian. “Because of little time to train our athletes, our conservative estimate was two gold medals and we achieved it,” ani Wushu Federation of the Philippines president Freddie Jalasco.

Ikatlong gold medal ang nasungkit ni Carlos Yulo sa men's ring kagabi. Nanguna siya sa rings final sa 14.400 points. Silver medal si Vietnam's Nguyen Van Kanh (13.800) at Thanh Tung Le (13.500) .

Hindi na siya nakapasok sa podium ng pommel horse kasama ang kabayan na si Jan Timbang.

Samantala, apat na bowlers ang lalarga sa national team upang tuldukan ang 11-year gold medal drought sa aksiyon ngayong Lunes sa 31st Vietnam SEA Games sa Royal City Hanoi Bowling Lanes.

Aaksiyon sina Merwin Tan at Ivan Malig sa men’s play ng 9 a.m. habang sina Alexis Sy at Mades Arles ay lalarga sa distaff side simula ng 1 p.m.