'Superman' Gomez, kampeon sa Texas Open One Pocket

ni Eddie M. Paez Jr. - @Sports | September 6, 2022

Lumipad si "Pinoy Superman" Roberto Gomez patungo sa trono matapos walisin ang oposisyon sa Texas Open One Pocket na ginanap sa palaruan ng Skinny Bob's Billiards ng Roundclock, Texas.

Walang nakaporma sa tikas ni Gomez sa double-elimination na paligsahang nilahukan ng mga mababangis na one pocket warriors.

Pagkatapos ng opening round bye, nasingitan ng Pinoy sina Josh Robert (5-3), Billy Thorpe (5-4) at Venezuelan Jerry Calderon (5-2) kaya nakasampa siya sa hotseat. Dito, nakaharap niya si AZBilliards Moneyboard frontrunner Fedor Gorst ng Russia. Hindi rin umubra ang Ruso at nangibabaw ang angas sa pagtumbok ng 2007 World 9-Ball Championship runner-up na si Gomez sa iskor na 5-3.

Nang masipa sa losers' bracket si Calderon, kumayod ito hanggang makuha ang natitirang upuan sa finals ng kompetisyon. Dito, sinagasaan niya sina Billiards Congress of America Hall of Famer Alex Pagulayan (4-1), 2017 World 9-Baĺl 2nd placer Roland Garcia (4-2) at 2019 World 9-Ball king Gorst (4-2). Nakuntento sa huling upuan ng podium ang Rusong kilala rin sa pool circle bilang "The Machine" habang nakuha ni Calderon ang karapatan na makipagduwelo kay Gomez.

Bitbit ang twice-to-beat na bentahe, kumpiyansang dinaig ni Gomez, 43-taong-gulang at tubong Zamboanga, si Calderon, 5-3, para makandaduhan ang korona.

Dahil sa tagumpay, nananatili ang solidong kampanya ni Gomez sa Estados Unidos.

Kamakailan ay tinangay niya ang dalawang runner-up honors sa 2022 Hex.com Pro-Am Tournament sa CR's Sports Bar ng Coon River, Minnesota.

Jungolfer Arroyo, reyna sa Southern California Tour

ni Eddie M. Paez Jr. - @Sports | July 20, 2022

Naitakas ni Pinay jungolfer Monique Arroyo ang mga titulo ng dalawang paligsahan sa Southern California Junior Golf Tour ngayong Hulyo sa Long Beach, California.

Swak naman sa unang 10 performers si Kamilla Edriana Del Mundo sa Girls Under 6 bracket ng IMS Academy Junior World Championships sa Torrey Pines, California upang bahagyang maramdaman ang lakas ng Pilipinas sa pagtitipon. Pumangpito si Del Mundo sa pangkat pero bukod dito ay wala nang iba pang bahagi ng Team Pilipinas ang nagmarka sa karera sa indibidwal na karangalan.

Sa kabilang dako, nalampasan ni Justin Delos Santos ang hamon ng pagiging bagito sa pinakamatandang major golf event sa kasaysayan - ang British Open - nang kalmante nitong malusutan ang cutoff score para makatawid sa weekend play at tuluyàng magkapagbulsa ng pakonsuwelong $31,638 sa pagtatapos ng torneo. Nakakuha ng pasaporte ang Pinoy parbuster sa prestihiyosong kompetisyon matapos niyang pumang-apat sa isang torneo sa mabagsik na Japan Golf Tour.

Samantala, inalat sina Bianca Pagdanganan at Dottie Ardina sa kanilang pinakahuling sabak sa Ladies' Professional Golf Association matapos na maitsapuwera sa homestretch ng Dow Great Lakes Invitationals Midland, Michigan dahil sa lumobong iskor. Sumemplang sa pang-40 na baytang si Pagdanganan habang sadsad naman sa pang-45 na baytang si Ardina.

Hinirang na pinakamabangis si Arroyo sa Scholl Canyon Summer Championships na nasaksihan sa fairways ng Scholl Canyon Golf Club sa Glendale, California. Nagsumite ang pambato ng Pilipinas ng 62 sa 3,004 yardang palaruan. Malayong segunda si local pride Aya Ave dahil sa iskor nitong 69.

Diwa at Custodio, bronze sa Bowling World C'ships

ni Eddie M. Paez, Jr. - @Sports | July 2, 2022

Isinabit sa leeg nina Stephen Diwa at Marc Custodio ang tansong medalya na kumislap na parang ginto para sa Philippine contingent nang magwakas ang International Bowling Federation (IBF) World Championships sa Helsingborg, Sweden.

Nakapasok ang tambalan ng bansa sa semifinals ng men's doubles kaya nakandaduhan ng Pilipinas ang bronze na nagsilbing tanging medalya ng bansa sa malupit na kompetisyon.

"Congratulations U21 Team Philippines!", "Way to go!", "Congrats!", "Keep the fire burning!", "Next time Gold!" ang ilan sa mga tipikal na mga pagbati na nakita sa social media.

Hindi pinalad ang mga manlalaro ng bansa na magkamedalya sa men's at women's singles, women's doubles, men's team, women's team at mixed team events.

Inumpisahan nina Diwa at Custodio ang paglalakbay sa Men's Doubles sa pamamagitan ng pag-iskor ng 2230 pinfalls sa Squad 1 kung saan sumampa sila sa pang-anim na puwesto. Nang pagsama-samahin ang resulta sa apat na squads, nakasama sa magic 16 ang Pilipinas kaya sumibad ito sa mas maigting na yugto.

Sa 2-pangkat na matchplay stage, isinama ang mga Pinoy sa Group B. Pitong matches ang dinaanan nila at anim na panalo ang kanilang nakulekta. Kabilang dito ang pagdaig nila sa Australia (224-203), Sweden (254-192), Finland (195-152), Puerto Rico (238-229) at Netherlands (249-206).

Isang triple tie (6-1) ang nasaksihan sa pagitan ng Sweden, Netherlands at Pilipinas sa Group B para sa dalawang upuan sa semis. Sa tiebŕeaker, nanguna ang Sweden at bumuntot ang Pilipinas. Sa final 4, kinapos sina Diwa at Custodio sa init ng South Korea (269-205). Sa host napunta ang gold habang nakuntento ang South Korea sa silver.