Nahihiyang tumanggap ng tulong sa super-bait na pamilya ng BF

Dear Roma Amor - @Life & Style | October 16, 2020

Dear Roma,

Ako si Isha, 25, at may 4 yrs. boyfriend. Masasabi kong suwerte ako sa BF ko dahil napakabait niya, gayundin ang kanyang pamilya. Ngayong pandemic, panay ang offer ng parents niya na magpadala ng groceries o tulong-pinansiyal sa pamilya namin. Ilang beses na ako tumanggi dahil nakakasurvive pa naman kami, pero mapilit talaga ang parents niya. Sa totoo lang, nakakahiya kasi dahil kahit bago pa ang pandemic, marami na silang naitulong sa amin, lalo na sa akin. Kamakailan lang, nagpaabot din sila ng tulong nang operahan ang aking Papa.

Roma, nahihiya talaga ako dahil ako ‘yung tipo ng tao na ayaw tumanaw ng utang na loob. Wala akong masasabi sa kabaitan nila dahil alam kong genuine ‘yun, pero may paraan ba para tumanggi? –Isha

Isha,

Kung tutuusin, sobrang suwerte mo dahil mayroon kang partner na mabait, gayundin ang kanyang pamilya. Siguro nga, minsan, nakakahiya ring tumanggap ng tulong dahil baka mauwi sa utang na loob. Pero kung alam mong genuine ito at hindi naman aabot sa ganu’ng punto, mas okay na tanggapin ito kesa tanggihan.

Ngayong may pandemya, hindi tayo dapat tumanggi sa anumang ibinibigay sa atin. Ituring natin itong blessing, lalo na kung hindi natin ito hiniling. God bless!

Maliit ang suweldo at feeling hopeless makahanap ng part-time job, takot sumubok ng negosyo

Dear Roma Amor - @Life & Style | October 8, 2020

Dear Roma,

Ako si Van, 28, at full-time employee. Bago ang pandemic, okay naman ang kita ko kahit minimum wage earner ako. Kumbaga, nakakasurvive sa araw-araw at nakakapagbayad naman ng bills. Kaso nang magsimula ang lockdown, ako ang tumayong breadwinner dahil natigil sa trabaho ang aking parents at kapatid, kaya ang ending, akin ang lahat ng gastusin.

Dahil sa pandemic, nabawasan ang araw ng pasok ko which means, bawas din ang suweldo. Ang problema, hindi naman nababawasan ang gastusin, lalo na sa pagkain at nadagdagan pa nang magkasakit ang aking ama.

Sumubok naman akong maghanap ng part-time job, pero mahirap talaga. Takot din akong magnegosyo dahil wala akong masyadong alam. Gayundin, kaunting pera na lang ang meron ako at baka mawala pa ‘pag isinugal ko ito sa negosyo. Tingin mo, dapat ko na ba itong subukan para may dagdag na pagkakakitaan at pantustos?

Van,

Totoo ang sinasabi nilang parang sugal ang pagne-negosyo dahil hindi mo alam kung kikita ito o hindi. Pero ‘ika nga, paano mo malalaman kung hindi susubukan? Kung hindi ka pa confident magnegosyo, bakit hindi mo ito pag-aralan? Hindi mo naman kailangan mag-aral sa iskul kundi sa pamamagitan ng internet. Ngayong may pandemic, napakaraming nagkaroon ng sariling negosyo, puwede kang humingi ng tips o advice sa kanila. Mula sa kanilang experience, tiyak na may matututunan ka. Gayundin, maraming mga articles o content sa internet na makatutulong sa iyo, kaunting tiyaga lang. Subukan mo lang dahil wala namang mawawala. Good luck!

Buntis na wa’ work sa Maynila, kinukulit pa na magpadala ng sustento sa pamilya

Dear Roma Amor - @Life & Style | October 1, 2020

Dear Roma,

Ako si Angelica, 25, at may asawa na. Nasa Manila ako ngayon at may maselang pagbubuntis. Parehas kaming unemployed ng mister ko dahil kailangan niya akong bantayan kasi wala akong kasama sa bahay. Uuwi sana kami sa probinsiya kung walang pandemic, pero mas gusto niyang dito na lang ako manganak.

Nakakasama ng loob dahil pinararamdam ng pamilya ko na masamang anak ako. Kinukulit ako ng kaptid ko na magpadala sa kanila dahil sampung buwan na akong walang padala kasi wala naman akong maibibigay. Nakaasa lang kami sa ipon ng mister ko, hindi tulad nila na may pinagkakakitaan naman kahit papaano.

Ang sakit lang kasi kung anu-ano’ng masasamang salita ‘yung sinasabi nila sa akin.

Hindi naman ako madamot dahil bago ako nag-asawa, masasabi kong nakatulong naman ako sa kanila, pero ngayon, hindi talaga kaya dahil marami rin kaming gastusin para sa check-up, bills at pagkain.

Masama bang unahin ang sarili kong pamilya? Sobrang stressed na ako dahil gusto ko rin namang tumulong, pero wala akong maibigay. Meron akong kaunting ipon para sa sarili ko, pero maliit na halaga lang ‘yun at gusto nilang bawasan ko para makapagpadala naman daw ako sa kanila. Ano bang dapat kong gawin? –Angelica

Angelica,

Nakakalungkot dahil kailangan mo ‘yang pagdaanan. Sa totoo lang, hindi ka naman na responsable sa iyong mga magulang ngayong may sarili ka nang pamilya. Kung anuman ang naitulong mo sa kanila noong dalaga ka, sapat na ‘yun, at ‘di ka na nila dapat bigyan pa ng obligasyon ngayon. Hindi masama na unahin ang sarili mong pamilya dahil ‘yun naman ang dapat. Gayundin, oks lang tumulong, pero kung wala talaga, dapat mong ipaunawa sa kanila ang sitwasyon mo. Ipaliwanag mo na ‘di madaling mabuhay nang walang trabaho at nagsisikap din kayong makaraos sa araw-araw. Kung hindi pa rin nila maunawaan, mas mabuting dedmahin na lang sila. Ganyan talaga ang buhay, may mga toxic na pamilya na dapat nang dedmahin para makapamuhay nang payapa. Kaya mo ‘yan, sis. Good luck!