top of page
Search

ni Sis. Isabel del Mundo @Mga Kuwento ng Buhay at Pag-ibig | September 9, 2024



Kuwento ng Buhay at Pag-Ibig

Dear Sister Isabel,


Unang-una sa lahat, nawa ay nasa maayos kayong kalagayan kapiling ang inyong mga mahal sa buhay.


Uumpisahan ko ang pagbabahagi ng aking kuwento mula nang magtrabaho ako sa abroad. Sa Korea, kung saan ako nagtrabaho, ru’n ko nakita ang lalaking kapwa ko Pilipino. 


Isa siyang seaman, at nag-stop over ang barko nila sa Korea. Pero sa kasamaang palad, bigla na lamang siyang isinugod sa ospital dahil pumutok na umano ang sakit niyang appendicitis. Dahil wala siyang kaanak du’n, nakiusap siya sa akin na kung maaari ako muna ang magbantay sa kanya. 


Actually, kapitbahay ko siya sa ‘Pinas at mag-childhood sweetheart kami, pero iba ang nakatuluyan niya. 


Sa madaling salita, muli kaming pinagtagpo ng tadhana. Paglabas niya ng ospital, agad siyang pinauwi sa ‘Pinas, at nagkataon pang tapos na rin ang contract ko sa Korea. 


Pag-uwi namin sa ‘Pinas, todo-iwas ang ginawa ko sa kanya dahil isa na siyang pamilyadong lalaki. Pero, ayaw niya akong tantanan. Ang hirit pa niya sa akin ay puwede naman umano naming ilihim ang aming relasyon. 


Hirap na hirap na ako sa ginagawa kong pag-iwas sa kanya, dahil mahal ko rin siya, at para bang ‘di ko na kayang pigilan pa ang aking nararamdaman. 


Ang sabi pa niya, hindi raw sila kasal ng asawa niya, kaya ‘di raw masasabing isa akong kabit. 


Sister Isabel, inamin niya rin sa akin na ako ang tunay niyang mahal mula nu’ng kami’y mga bata pa. Natupad na raw niya lahat ng kanyang pangarap, at isa na lang ang hindi pa, iyon ay ang makasama ako habambuhay. 


Ano ang gagawin ko? Mahal na mahal ko rin siya. Sa katunayan, siya lang talaga ang hinihintay kong bumalik sa buhay ko. At ngayon nga'y naganap na, dapat ba akong pumayag sa gusto niya na ituloy ang relasyon namin? Hihintayin ko ang payo n’yo.


Nagpapasalamat, 

Josephine ng Tarlac


 

File Photo

Sa iyo, Josephine,


Sa biglang tingin ay parang napakahirap solusyunan ng problema mo, pero kung talagang susuriing mabuti, makikita natin na siya talaga ang destiny mo. Kaya kahit may kinakasama na siya, muli pa rin kayong pinagtagpo ng kapalaran. Dahil diyan, kahit ano’ng iwas mo, wala kang magagawa dahil kayo ang nakatakdang magsama habambuhay.


Ang pinakamabuti mong gawin, tutal hindi naman pala siya kasal at hindi naman talaga niya mahal ang kanyang kinakasama, huwag n’yong sikilin ang inyong damdamin, dahil anumang iwas ang gawin n’yo, wala pa rin kayong magagawa dahil kayo ang itinakda ng tadhana. 


Mahirap hadlangan ang tinatawag na destiny, at sabihin mo sa kanya na ‘wag na ‘wag niyang pababayaan ang kanyang pamilya, lalung-lalo na ang kanyang mga anak.

Sundin mo na ang tibok ng iyong puso, dahil kapalaran na mismo ang kumikilos upang muli kayong pagtagpuin. 


Sige na, huwag mo nang sikilin ang iyong damdamin, bagkus sundin mo na lang ang itinitibok ng iyong puso para matupad na rin ang pangarap n’yo.


Hangad ko ang kaligayahan mo sa piling ng lalaking pilit mong iniiwasan.


Sumasaiyo,

Sister Isabel del Mundo




 
 

ni Sis. Isabel del Mundo @Mga Kuwento ng Buhay at Pag-ibig | August 22, 2024



Kuwento ng Buhay at Pag-Ibig ni Sis. Isabel

Dear Sister Isabel,


Hindi ko alam kung paano ko uumpisahan ang kuwento ng aking buhay. Hindi ko na kasi alam kung sino ang kakampihan ko. Araw-araw na kasing nag-aaway ang kapatid at ang bayaw ko. Hanggang sa dumating na nga sa puntong nasaktan na ng bayaw ko ang kapatid ko.


Sa kanila ako nakikitira, dahil dalawa na lang kami, at ulila na rin kami sa magulang.

Sa tingin ko ay responsable at masipag naman ang bayaw ko. Habang ang kapatid ko naman ay isang tamad, at ‘di pa ginagampanan ang pagiging mabuti niyang asawa. 

Dakdak siya nang dakdak kahit na wala namang kabuluhan ang sinasabi niya. Kaya rin siguro nasasaktan ang asawa niya. Hindi ko naman mapagsabihan ang kapatid ko, dahil mas matanda siya sa akin. 


Pero alam mo ba, Sister Isabel? Awang-awa na ako sa asawa niya. Siguro ‘di na rin siya nakapagpigil, kaya naman nasaktan niya tuloy ‘yung kapatid ko. 


Mabuti na lang at ‘di lumaban ‘yung kapatid ko sa asawa niya. Ano ba ang dapat kong gawin upang mabago ko ang ugali ng kapatid ko? Para ‘di na rin siya saktan ng asawa niya at maging maganda na ang pagsasama nila. 


May alam ba kayong orasyon para mapasunod ang isang tao? Sa palagay ko kasi ‘yun na lang ang puwede kong maitulong sa kanila. Hihintayin ko ang payo n’yo.


Nagpapasalamat,

Maritess ng Batangas


 

Sa iyo, Maritess,


Mabuti naman at may malasakit ka sa kapatid mo, at gusto mong maituwid ang pagkakamali niya. Sinubukan mo na ba siyang kausapin? Kung hindi pa, gawin mo na. Kausapin mo siya sa mahinahong pamamaraan. Oo nga’t mas nakakatanda siya sa iyo, pero mas matured ka naman kung mag-isip kaysa sa kanya. 


Kung hindi pa rin magbabago ang ugali niya, subukan mo siyang pakausapin sa kinatatakutan at ginagalang niyang tita o tito. Kung ganu’n pa rin, at ‘di pa rin siya nagbabago, sumangguni ka na sa psychologist. Baka may mental disorder na ang ate mo. Samahan mo na rin ng dasal, at humiling ka sa Diyos na baguhin na sana ng ate mo ang kanyang pag-uugali, upang makita na niya ang kanyang pagkakamali, at maging isang mabuting asawa.


Tungkol naman sa tanong mo kung may alam akong orasyon upang mapasunod ang isang tao, subukan mo siyang dasalan ng Sumasampalataya (I Believe in God ). Pagdating sa “ikawawala ng mga kasalanan,” huminto ka, at banggitin mo nang 7 beses ang full name ng ate mo, at isunod mo ang wish mo na sana mawala na ang pangit niyang pag-uugali na sana paglingkuran at mahalin na niya ang kanyang asawa. Gawin nawa niyang tungkulin ang pagiging isang mabuting asawa. Pagkatapos nu’n, isunod mo ang Ama Namin, Aba Ginoong Maria, at Luwalhati Sa Ama. 


Hanggang dito na lang, lakip nito ang aking dalangin na magbago na ang ugali ng ate mo, maging maligaya na sana ang pagsasama nila, hindi lamang ngayon kundi maging bukas at magpakailanman.

Sumasaiyo,

Sister Isabel del Mundo



Mga Kwento ng Buhay at Pag-Ibig

 
 

ni Sis. Isabel del Mundo @Mga Kuwento ng Buhay at Pag-ibig | August 15, 2024



Kuwento ng Buhay at Pag-Ibig ni Sis. Isabel


Dear Sister Isabel,


May matinding pagsubok akong kinakaharap ngayon, at alam kong kayo lang ang makakapagpalubag ng loob ko. 


Nagkaroon ako ng ka-chat sa Facebook. Isa siyang Muslim, at kalaunan ay naging magkaibigan kami. Pero, dumating sa puntong pinapunta niya ako sa kanilang bansa, at pinadalhan niya rin ako ng ticket para makaalis na agad. Siya rin ang nag-ayos ng mga papeles para makarating ako roon. 


Ang sabi niya, pakakasalan niya raw ako. Tuwang-tuwa naman ako dahil sa wakas ay may mapapangasawa na muli ako. 


Mayaman, at tinitingala siya sa lugar nila. Habang isa naman akong biyuda, at wala pang anak kaya naman malaya kong nagagawa ang mga desisyon ko sa buhay. 


Hindi nagtagal, nakarating na ako sa lugar nila. Pero laking gulat ko dahil may iba pa pala siyang asawa, at pangatlo na ako. Pinagsama-sama niya kami sa iisang bahay. Hindi niya sa akin sinabi na may iba pa pala siyang asawa. Kaya naman mula noon, naging sex slave niya na ako. Tingin niya sa akin ay kasangkapan na pagmamay-ari niya na kahit ano’ng oras ay puwede niyang ipagawa sa akin ang mga bagay na gusto niya. 


Hindi ko akalaing ganito ang mangyayari sa buhay ko. Ang mas malala pa, pinapagamit niya rin ako sa mga kaibigan niya. Hirap na hirap na ako sa kalagayan ko. 


Ano ba ang dapat kong gawin, Sister Isabel? Hihintayin ko ang payo n’yo. Nawa’y matulungan ninyo ako.

Nagpapasalamat,

Beth ng Cotabato


 

Sa iyo, Beth,


Lubhang nakakabahala ang problema mo. Wala ka bang contact sa mga kamag-anak mo sa ‘Pinas? Sikapin mong ipaalam sa kanila ang kalagayan mo para mai-report nila sa Philippine Embassy ang nangyayari sa iyo ngayon. 


Hindi makatarungan ang ginagawa sa iyo ng Muslim mong asawa. Kailangan siyang maparusahan. Gumawa ka ng paraan para ma-contact mo ang mga kamag-anak, o mga kaibigan mo na alam mong kikilos para matulungan ka. 


Mga Kwento ng Buhay at Pag-Ibig

Kung may mga kaibigan ka riyan, magpatulong ka sa kanila bago pa mahuli ang lahat. Dalangin ko na mahango ko sa ganyang kalagayan sa lalong madaling panahon. Huwag kang mawalan ng pag-asa. 


Magdasal at manalangin ka sa Diyos na makapangyarihan sa lahat. Habang may buhay, may pag-asa, pero huwag kang susuko. Malalampasan mo rin ang kalbaryong kinakaharap mo ngayon. 

Sumasaiyo,

Sister Isabel del Mundo



 
 
RECOMMENDED
bottom of page