WHO dapat sumubok ng ibang hakbang sa pagsupil ng paninigarilyo

ni Chit Luna @Brand Zone | February 6, 2024

Nanawagan ang mga eksperto sa mga delegado ng World Health Organization (WHO) Framework Convention on Tobacco Control (FCTC) na sumubok ng ibang solusyon matapos mapatunayang hindi sapat ang kasalukuyang hakbang para sugpuin ang pandaigdigang suliranin sa paninigarilyo.

Sinabi ni Jeffrey Smith, isang senior fellow sa R Street Institute, isang US think tank, na ang kasalukuyang diskarte ng WHO FCTC, kabilang ang pagpataw ng mas mataas na buwis sa sigarilyo, pagbabawal sa advertising at paghihigpit sa paggamit ng mga alternatibong produkto, ay may limitadong epekto, lalo na sa Southeast Asia, kung saan nabibilang ang Pilipinas.

Aniya, hindi sapat ang mga hakbang na ito, lalo na sa Southeast Asia, kung saan ang mga patakarang itinataguyod ng FCTC ay hindi tugma sa pangangailangan ng mga bansa na may kanya kanyang pulitikal, kultural at pinansiyal na kalagayan.

Mahalaga ang pag-aaral ni Smith, ayon kay Dr. Lorenzo Mata, pangulo ng Quit For Good, isang NGO sa Pilipinas, lalo na’t ang mga delegado mula sa mahigit 180 bansa ay nasa Panama ngayon para dumalo sa ika-10 na Conference of the Parties (COP) ng WHO FCTC mula Pebrero 5-10.

Ayon sa mga public health advocates, dapat pag-aralan ng mga delegado ng COP 10 ang mga inobasyon na nakabatay sa agham, tulad ng tobacco harm reduction (THR), para matugunan ang pandaigdigang epidemya ng paninigarilyo at maiwasan ang milyun-milyong pagkamatay taun-taon.

Sinabi ni Dr. Mata na ayon sa pananaliksik, ang mga alternatibo tulad ng electronic nicotine delivery systems (ENDS) at heated tobacco ay "tiyak na hindi gaanong nakakapinsala" kumpara sa tradisyonal na mga sigarilyo.

Sumang-ayon din si Dr. Mata sa sinabi ni Smith na hindi sapat ang kasalukuyang pagsisikap ng WHO FCTC para ma-solusyunan ang problema ng paninigarilyo.

Sa kanyang artikulo na pinamagatang "The Impact of Cultural Pressures on Tobacco Harm Reduction Efforts in Southeast Asia," ibinunyag ni Smith na mahigit 8 milyong tao ang namamatay taun-taon mula sa mga sakit na nauugnay sa paninigarilyo, kabilang ang 1.6 million buhay na nawawala sa paninigarilyo sa Southeast Asia bawat taon.

Ang mga delegado mula sa mahigit 180 bansa ay inaasahang tatalakay ng mahahalagang paksa, kabilang ang pagkakaroon ng mga makabago at umuusbong na mga produktong tabako at nikotina.

Naniniwala sina Dr. Mata at Smith na ang THR, na naghihikayat sa paglipat sa hindi gaanong mapanganib na mga alternatibo tulad ng ENDS at heated tobacco, ay maaaring maging solusyon sa pagbawas ng pagkamatay at sakit dahil sa paninigarilyo.

Ito ay base na din sa karanasan ng mga bansang tulad ng Sweden, United Kingdom at Japan na nakakita ng tagumpay sa THR.

Partikular dito ang Japan na nakaranas ng malaking pagbaba sa antas ng paninigarilyo mula 33 porsiyento ng populasyon noong 2000 sa 20 porsiyento noong 2020, at malaking bahagi nito ay dahil sa pagpapakilala ng heated tobacco sa merkado.

Sinabi ni Smith na ang Pilipinas, na lumagda sa kasunduan ng FCTC noong 2005, ay umayon din sa tobacco harm reduction nang lagdaan nito ang Vaporized Nicotine and Non-Nicotine Products Regulation Act o Vape Law noong 2022 na nagpapahintulot sa regulasyon ng mga produktong may pinababang panganib para protektahan ang kalusugan ng mga Pilipino.

Naniniwala ang mga eksperto na ang pagtanggap sa mga produktong ito ay maaaring makatulong sa pagbabawas ng kamatayan at pagkakasakit na nauugnay sa paninigarilyo.

Sinabi ni Smith na ang mga alternatibong ito ay nagpakita ng mas kaunting panganib na aabot hanggang 95 porsiyento kumpara sa mga tradisyonal na nasusunog na sigarilyo.

Inilarawan naman ni Dr. Mata ang Vape Law ng Pilipinas bilang isang modelo para sa ibang mga bansa na nagnanais bigyan ang mga naninigarilyo ng mas mainam na alternatibo.

Hinimok ni Dr. Mata ang FCTC na isaalang-alang ang prinsipyo ng tobacco harm reduction at "payagan ang mga naninigarilyo na magkaroon ng mas ligtas na mga alternatibo," na posibleng magsalba sa milyun-milyong buhay sa buong mundo.

"Pagkatapos naming magsagawa ng sariling pag-aaral, kami ay kumbinsido na ang paggamit ng vaporized nicotine at non-nicotine products ay tiyak na hindi gaanong nakakapinsala kaysa sa paninigarilyo. Ito ay maaaring ituring na isang praktikal na middle ground kung saan dapat nating dalhin ang nga kasalukuyang naninigarilyo, " dagdag niya.

"Ang Vape Law ay sumasalamin din sa posisyon ng gobyerno na ang mga makabagong produkto na walang usok, na napatunayan ng siyentipikong pananaliksik na hindi gaanong nakakapinsala kaysa sa tradisyonal na mga sigarilyo, ay dapat na i-regulate bilang opsyon para sa mga naninigarilyo na hindi titigil sa ibang paraan," sabi ni Dr. Mata.

Sa kanyang artikulo, nirepaso ni Smith ang produksyon/paggamit ng tabako, mga diskarte sa pagkontrol sa tabako na idinidikta ng FCTC at ang pagpapatupad ng mga diskarte sa THR sa Southeast Asia para ilarawan ang mga diskarteng sensitibo sa kultura at ang epekto nito sa pampublikong pang-unawa at kalusugan.

Nanawagan naman si Dr. Mata sa WHO FCTC na isama ang prinsipyo ng THR sa mga hakbang nito.

Sumang-ayon din si Dr. Mata sa pananaw ni Smith na kung ang WHO FCTC ay papayag lamang sa mga alternatibong produkto, milyun-milyong buhay ang maaaring mailigtas, at ang kalusugan ng publiko ay maaaring mapabuti sa buong mundo.

Mga magsasaka nanawagan sa gobyerno na proteksyunan ang kabuhayan sa WHO tobacco control conference

ni Chit Luna @Brand Zone | January 3, 2024

Kasunod ng pag-anunsyo ng limang taong roadmap ng Department of Agriculture (DA) para palawakin ang produksyon ng tabako sa bansa, nanawagan ang mga magsasaka ng tabako sa mga opisyal na ipagtanggol ang kanilang kabuhayan sa darating na kumperensya ng World Health Organization (WHO) para talakayin ang pandaigdigang kasunduan sa pagkontrol sa tabako.

Habang naghahanda ang mga delegado na magpulong para sa WHO Framework Convention on Tobacco Control (FCTC) Conference of the Parties (COP), nagpahayag ng pagkabahala ang mga magsasaka tungkol sa potensyal na epekto nito sa kanilang kabuhayan. Ang COP ay may mahalagang papel sa paghubog ng mga pandaigdigang patakaran sa tabako.

“Malalim ang pagkakaugnay ng ating buhay sa pagsasaka ng tabako. Ito ay isang paraan ng pamumuhay sa gitna ng malupit na hamong pang-ekonomiya. Sinusuportahan nito ang ating mga magsasaka, ang mga umaasa sa kanila at ang komunidad.

Sa roadmap ng DA na nagpapatunay sa pangmatagalang suporta nito para sa pagsasaka ng tabako, umaasa kami na isasapuso ng gobyerno ng Pilipinas ang pangakong iyan sa pagtatagumpay ng ating industriya sa darating na COP,” sabi ni Leonardo Montemayor, dating kalihim ng Department of Agriculture (DA) at board chairman ng Federation of Free Farmers (FFF).

Hinamon naman ni Philippine Tobacco Growers Association (PTGA) president Saturnino Distor ang delegasyon ng Pilipinas sa COP na epektibong isulong ang interes ng mga magsasaka sa pamamagitan ng pagsunod nito sa roadmap ng DA—ang Sustainable Tobacco Enhancement Program (STEP).

Ang STEP ay isang estratehiya ng DA para palakasin ang katutubong pagtatanim ng tabako partikular na sa Mindanao. “Kita naman sa STEP na may kinabuksan ang pagsasaka ng tabako dito sa Pilipinas. Lalo at meron na ngayong mas safe na alternatibong produktong may tabako tulad ng vapes at e-cigarettes.

Ayon sa mga pagaaral at siyensya, itong mga makabagong produkto ay mas mabuti kumpara sa sigarilyo. Dito papunta ang industriya kaya’t may pag-asa kaming magtutuloy-tuloy lang ang pagsasaka ng tabako satin,” sabi ni Distor.

Ang WHO FCTC ay isang internasyonal na kasunduan para sa pagkontrol sa tabako na pinamamahalaan ng COP na binubuo ng mga kinatawan mula sa iba’t ibang bansa na lumagda sa kasunduan. Magpupulong ang mga kinatawan sa Panama sa Pebrero 5 hanggang 10 upang idaos ang ika-10 kumperensya nito at talakayin ang pagpapatupad ng kasunduan.

Ang COP 10 ay naglalayong talakayin ang mga isyu na nakakaapekto sa regulasyon ng tabako at pandaigdigang kalusugan ng publiko, na may partikular na pagtuon mga mgakabago at umuusbong na mga produktong tabako at nikotina.

Ang WHO FCTC, gayunpaman, ay binatikos ng mga internasyonal na eksperto sa kalusugan ng publiko dahil sa lubhang mahigpit na mga patakaran nito laban sa mga bagong produktong tabako at sa pagbalewala nito sa “harm reduction strategies” na kabilang sa mga pangunahing haligi ng pagkontrol sa tabako..

Sinabi ni Distor na ang pagtatanim ng tabako ang bumubuhay sa milyon-milyong magsasaka at sa kanilang mga pamilya kasama na ang mga mangagawang kabilang sa industriyang ito. “Hindi madaling mag-iba ng pananim dahil sa malaking kapital na kailangang ilabas para sa panibagong imprastraktura. Kung nanganganib ang kinabuksan ng alternatibong produkto, paano na ang kinabuksan naming mga magsasaka?

Kaya umaapila kami na mapanindigan ang mga polisiya na may malasakit at maka-tao,” aniya. Sa layuning iangat ang sektor ng tabako at tiyakin ang pagpapatuloy ng industriya ng tabako sa bansa, inilunsad kamakailan ng National Tobacco Administration (NTA) ng DA ang STEP.

Sa paglulunsad nito, sinabi ni DA Undersecretary Deogracias Victor Savellano na malaki ang maitutulong ng industriya sa lokal na ekonomiya habang tinitiyak na mapanatili ang kabuhayan ng mga magsasaka ng tabako.

Binigyang-diin din ni Savellano ang potensyal sa pag-export ng katutubong tabako na may kapasidad na palakasin ang foreign exchange ng Pilipinas. Ayon sa NTA, ang sektor ng tabako ay may mahalagang papel sa pagpapanatili ng kabuhayan ng mahigit 2.1 milyong manggagawang Pilipino at may malaking kontribusyon sa kita ng gobyerno, na kumulekta ng P160 bilyon na excise tax noong 2022.

Mga eksperto nagmungkahi ng magkaibang regulasyon sa sigarilyo at makabagong produkto

ni Chit Luna @Brand Zone | January 23, 2024

Dapat magkaroon ng makaibang regulasyon para sa sigarilyo at makabagong produkto tulad ng vape, heated tobacco at oral nicotine products na maaaring makatulong sa pagresolba ng pandaigdigang suliranin sa paninigarilyo, ayon sa mga dalubhasa.

Sinabi ni Prof. David Sweanor, tagapangulo ng advisory board ng Center for Health Law, Policy at Ethics sa University of Ottawa, na ang regulasyon sa vapes, heated tobacco, oral nicotine products at iba pang alternatibong walang usok ay hindi dapat maging kasing higpit kumpara sa mga tradisyunal na sigarilyo na ginagamitan ng apoy.

Ito ay dahil ang taunang pagsusuri ng Office for Health Improvement and Disparities sa UK, ay patuloy na nagpapakita na ang mga bagong produktong nikotina ay nagdadala ng mas mababang panganib kaysa sa paninigarilyo.

Si Prof. Sweanor ang unang abogado sa mundo na tumutok sa mga patakaran upang mabawasan ang pinsala mula sa paninigarilyo. Aniya, kung magkasing-higpit ang regulasyon na ipapataw sa sigarilyo at bagong produkto, mas kaunting mga tao ang maaaring magtangkang lumipat mula sa sigarilyo. Sinabi niya na ang ganitong regulasyon ay nagbibigay sa sigarilyo ng kalamangan sa merkado.

“Such regulations give the incumbent deadly products a marketplace advantage and reinforce misinformation about cigarettes being no more hazardous than smoke-free alternatives,” ayon kay Prof. Sweanor.

Sinabi ng mga eksperto na ang usok mula sa nasusunog na tabako, at hindi nikotina, ang nagdudulot ng mga pangunahing problema sa kalusugan na nauugnay sa sigarilyo.

Sa paglipat sa mga smoke-free alternatives tulad ng heated tobacco, vape o oral nicotine, ang pinsala ay lubhang nabawasan, sabi nila.

Ayon kay Prof. Sweanor, ang paglanghap ng usok ang nagdudulot ng pandaigdigang pandemya, at ang mga alternatibong walang usok ay mas mahusay na alternatibo sa sigarilyo.

“Empowering and facilitating the move to smoke-free products for people who smoke cigarettes would lead to one of the greatest advances in the history of global public health," dagdag niya.

Sumangayon si Dr. Jamie Hartmann-Boyce, senior research fellow sa Health Behaviors sa University of Oxford, na habang ang nikotina ay nakakahumaling, hindi ito nagdudulot ng pinsala mula sa paninigarilyo.

Aniya, ang ebidensiya ay nagpapakita na ang mga e-cigarette na may nikotina ay maaaring makatulong sa mga tao na huminto sa paninigarilyo, at sila ay hindi nakakapinsala tulad ng paninigarilyo.

Binatikos naman ni Prof. Peter Hajek, direktor ng Tobacco Dependence Research Unit sa Queen Mary University of London, ang World Health Organization (WHO) dahil sa mahigpit nitong paninindigan laban sa vaping. Ito ay humahadlang sa paglipat ng mga naninigarilyo sa mas ligtas na mga alternatibo, aniya.

Sinabi ni Prof. Hajek na ang posisyon ng WHO ay taliwas sa mga progresibong patakaran na pinagtibay ng mga bansa tulad ng Sweden, Norway, New Zealand at Japan, na nakarehistro ng pinakamalaking pagbaba sa antas ng paninigarilyo sa nakaraang dekada.

Aniya, ang paggamit ng sigarilyo ay nabawasan ng halos kalahati sa loob lamang ng ilang taon sa mga bansang ito.

Pinaalalahanan naman ni Prof. Sweanor ang ilang bansa na nagpataw ng mataas na buwis sa mga produktong nikotina. Ito ay tulad ng pagbibigay ng parehong parusa para sa pagmamaneho habang matino at habang lasing, dagdag niya.

"The bottom line is that we have known for decades that the reason people die from smoking is because of inhaling smoke, not from nicotine. We know that the countries that have had the biggest declines in cigarette smoking in recent times are countries that are essentially ignoring the advice of the World Health Organization—places that have allowed substitutes to replace cigarettes," sabi ni Prof. Sweanor.

Pinuna ng mga eksperto ang WHO Framework Convention on Tobacco Control (FCTC), ang pandaidigang tratado para sa pagkontrol ng tabako, dahil sa kawalan nito ng transparency at nanawagan para sa rebisyon nito para isama ang prinsipyo ng tobacco harm reduction (THR) na sumusuporta sa mga naninigarilyo na lumipat sa mas ligtas na mga alternatibo.

Ang mga kinatawan mula sa mga bansang lumagda sa WHO FCTC ay magpupulong sa Panama para sa ika-10 Conference of the Parties (COP) sa taong ito, matapos kanselahin ang pulong noong Nobyembre 2023, para talakayin ang mga pangunahing paksa tulad ng kung paano tratuhin ang “novel” o makabagong produktong nikotina.

Sinabi ni Dr. Riccardo Polosa, propesor ng Internal Medicine sa Unibersidad ng Catania at tagapagtatag ng Center of Excellence for the Acceleration of Harm Reduction (CoEHAR) sa Italy, na ang kasalukuyang mga patakaran sa pagkontrol ng tabako ay nangangailangan ng pagbabago.

Aniya, higit sa pagtataguyod ng mga aksyon tulad ng pagtaas ng mga buwis sa tabako and pagpapatupad ng mga pampublikong pagbabawal sa paninigarilyo, dapat ding isaalang-alang ng WHO ang tobacco harm reduction sa pamamagitan ng pagsulong ng mga makabagong produkto para sa mga nasa hustong gulang.

Ipinapatupad na ito ng mga bansang tulad ng Japan, Norway, Sweden, England at Iceland, aniya.

Sinabi naman ni Prof. Hajek na ang mga sakit na nauugnay sa paninigarilyo tulad ng sakit sa puso at sakit sa baga ay mawawala sa kalaunan kung ang mga naninigarilyo ay bibigyan ng pagkakataon na lumipat sa may mas maliit na panganib na mga produktong nikotina.