Tulfo nanawagan ng imbestigasyon sa pagbebenta ng ilegal na vape sa Lazada, Shopee at Tiktok

ni Chit Luna @News | Nov. 29, 2024

Sen. Raffy Tulfo - FB

Nanawagan si Senador Raffy Tulfo ng imbestigasyon sa iregular na pagbebenta ng vape products sa Lazada, Shopee, Tiktok at iba pang social media platforms at online market places, gayundin ang paglaganap ng mga pekeng produkto sa Internet.

Inihain ni Tulfo ang Resolution No. 1232 noong Nob. 13, 2024 para imbestigahan ng Senado ang pagbebenta ng mga iligal na vape at mga pekeng produkto sa social media at e-marketplaces na tahasang lumalabag sa Republic Act 11967 o ang Internet Transactions Act of 2023.

Ang RA 11967 ay isang bagong batas na naglalayong protektahan ang mga mamimili at nagbebenta sa pamamagitan ng pagtatakda ng malinaw na tuntunin para sa mga online na transaksyon.

Kabilang dito ang pagbebenta, pamamahagi at pag-advertise ng mga produkto at serbisyo. Ito ay nagtatakda ng epektibong regulasyon sa e-commerce para protektahan ang karapatan at privacy ng mga consumer, i-secure ang mga transaksyon sa internet, itaguyod ang intelektwal na ari-arian, tiyakin ang pamantayan ng mga produkto at siguraduhin ang kaligtasan nila.

Inilabas naman ang Department of Trade (DTI) ng Administrative Order No. 24-03, Series of 2024, noong Hulyo 16, 2024, na sumususpindi sa online na pagbebenta, pamamahagi at pag-advertise ng mga produkto at device ng vape, maliban kung sumunod ang nagbebenta sa pag-verify sa edad ng mga bumibili.

Sinabi ni Tulfo na sa kabila ng administrative order, patuloy na naibebenta ang vape products sa pamamagitan ng e-commerce platforms gaya ng Lazada at Shopee sa kabataan.

Habang ang ilang nagbebenta ay may verification process, ito ay madaling naiiwasan, at ang mga produkto ay madaling ma-access kahit ng mga menor de edad, sabi niya.

Binanggit ni Tulfo ang online platform na Tiktok kung saan wala aniyang verification feature na naka-install sa iba't ibang sellers' account. Ang ilan ay nilalampasan ang verification process sa pamamagitan ng pag-post ng instruction sa pamamagitan ng private message. Aniya, ginagawa nitong walang silbi at walang saysay ang direktiba ng DTI.

Bukod sa hindi regular na pagbebenta ng mga vape, ilang mga online na nagbebenta ay aktibong lumalabag sa mga alituntunin at patakaran ng komunidad.

Sinabi niya na ang mga produktong ito ay madaling ma-access ng mga bata o indibidwal na wala pang 18 taong gulang dahil sa kakulangan ng sapat na mga disclaimer at maling mga label.

Bukod sa mga regulated items na ibinebenta na lumalabag sa DTI regulations at online platform community guidelines, ang pagbebenta ng peke, copycat o substandard na mga produkto ay patuloy na lumalaganap sa mga online selling platforms, ayon kay Tulfo.

Sinabi ni Tulfo na ang Pilipinas ay binansagan bilang sentro ng Asia sa online shopping scam at ang ilegal na aktibidad lalo na sa kapaskuhan kung saan sinasamantala ng mga scammer.

Napansin din niya ang pagbebenta ng mga viral na produkto tulad ng "Labubu" doll, kung saan nag-aalok ang mga nagbebenta ng parehong orihinal at knock-off na bersyon sa presyo na nakakagulat.

Aniya, ang pagbebenta ng mga produkto ito ay pinalalakas ng mali at mapanlinlang na advertising, na tahasang nilalabag ang mga probisyon ng Republic Act 7394 o Consumer Act of the Philippines.

Sinabi ni Tulfo na ang gobyerno, sa pamamagitan ng Department of Trade and Industry (DTI) at iba pang kaukulang ahensya, ay may pananagutan na protektahan ang mga mamimili mula sa mga mapanlinlang na gawain at tiyakin na lahat ng produktong ibinebenta online ay sumusunod sa batas at regulasyon.

Pinaigting ng Department of Trade and Industry at Bureau of Internal Revenue ang kanilang kampanya laban sa pagbebenta ng substandard at hindi rehistradong vape products. Sinabi ng BIR na mahigit 400 na nagbebenta ng vape products ay hindi rehistrado o nagtataglay ng revenue stamps.

IQOS nilampasan ang Marlboro bilang no.1 brand

ni Chit Luna @News | Oct. 18, 2024

Neuchatel, Switzerland – Nilampasan ng IQOS ang kita ng Marlboro, isang dekada matapos ipakilala sa merkado ang heated tobacco product ng Philip Morris International (PMI) noong 2014.

Sa unang pagkakataon sa kasaysayan, ang mga smoke-free products ay nalampasan ang sigarilyo, ayon kay Jacek Olczak, CEO ng PMI, sa isang pagtitipon noong Oktubre 9, 2024 sa Neuchatel, Switzerland.

Ipinakilala ng PMI, sa pamamagitan ng PMFTC Inc., ang IQOS sa Pilipinas noong 2020. Kasama na ngayon sa linya ng produkto ang pinakabagong bersyon, ang IQOS Iluma at ang consumable heat sticks na TEREA.

Ang mas murang BONDS by IQOS, at ang consumable heat sticks na BLENDS ay inilunsad noong 2022. Samantala, ang ZYN, isang oral nicotine pouch, ay dinala sa bansa noong 2023.

Nangako ang PMI noong 2014 na abutin ang smoke-free vision nito sa pamamagitan ng pagpapalit ng mga sigarilyo ng mas mahusay na mga alternatibo. Ipinakilala ng kumpanya ang IQOS sa Milan, Italy at Nagoya, Japan noon ding taon. Ang IQOS ay mabibili na ngayon sa 90 bansa at ginagamit ng 30.8 milyong tao sa buong mundo.

Ayon sa pinakabagong ulat ng PMI, 38 porsiyento ng kabuuang netong kita nito ay nagmumula sa smoke-free products tulad ng IQOS. Gumagamit ang IQOS ng patented induction technology para mapainit ang tabako sa halip na sunugin ito. Dahil hindi sinusunog ang tabako, ito ay walang usok at sa halip ay gumagawa ng aerosol na naglalaman ng nikotina.

Hindi din ito nagdudulot ng abo. Sinabi ni Olczak na hindi kailanman itinuring ng PMI ang IQOS bilang karagdagang produktong sigarilyo, kundi kapalit mismo ng sigarilyo. Aniya, hindi makatuwiran na ipagpatuloy ng kumpanya na tumuon sa isang produkto na maraming negatibo samantalang mayroong mas mabuting alternatibo.

Sinabi niya na sa daan-daang milyong dolyar na ginagastos ng PMI sa research and development, 99 porsiyento dito ang nakatuon sa mga bagong produkto. Ayon kay Tommaso Di Giovanni, vice president ng PMI para sa internasyonal na komunikasyon, gumastos ang kumpanya ng higit sa $12.5 bilyon at nagbigay trabaho sa higit 1,500 mga inhinyero, siyentipiko, technician, at kawani para sa patuloy na pagbuo ng mga produktong walang usok.

Sa pagsisikap nitong magbigay ng mas mahusay na alternatibo sa 1.1 bilyong naninigarilyo sa buong mundo, kinikilala ng PMI na ang mga tao ay may iba't ibang inaasahan para sa mga alternatibong produkto at iba't ibang pattern ng paggamit, sabi ni Olczak.

Sinabi naman ni Di Giovanni na ang mga bansa, NGOs at lahat kabilang ang mga manggagamot, awtoridad sa kalusugan at akademya ay may papel na dapat gampanan para sa smoke-free future.

Sa isang eksklusibong panayan ng mga Pilipinong mamamahayag, kinilala ni Di Giovanni ang Pilipinas bilang isang pioneer sa pagpasa ng Vape Law. Aniya, ang Pilipinas ang una sa rehiyon na nagkaroon ng visionary approach sa pagkilala ng mga produktong walang usok.

Sinabi ni Olczak na hindi makakamit ng PMI ang smoke-free vision nito sa mga bansang nagbabawal sa mga smoke-free alternatives. Aniya, mabilis na bumababa ang benta ng sigarilyo sa mga bansang pinahihintulutan ang mga walang usok na alternatibo.

Paglipat sa HTP maaring magbawas ng polusyon

ni Chit Luna @News | September 20, 2024

Isang pag-aaral ang nagmungkahi na ang paglipat mula sa paninigarilyo patungo sa paggamit ng heated tobacco product (HTP) ay maaaring makabawas ng polusyon sa loob ng bahay at kaugnay na mga sakit.

Ayon sa pag-aaral na "Heated Tobacco Products: Potentials of Harm Reduction, Improvement of Indoor Air Quality and the Need for Further Studies," ang aerosol mula sa tobacco harm reduction products tulad ng HTP ay hindi katulad ng usok mula sa sigarilyo at hindi nagdudulot ng parehong panganib.

Sinabi ng pag-aaral na malinaw ang konklusyon na hindi usok ang aerosol dahil naglalaman lamang ito ng maliit na bahagi ng mga mapanganib at potensyal na mapanganib na mga compound na matatagpuan sa usok ng sigarilyo.

Inilathala sa SciEnggJ, ang opisyal na journal ng Philippine-American Academy of Science & Engineering o PAASE, ang pag-aaral ay isinulat ni Aldwin A. Camance, isang chemical engineer at masugid na tagapagtaguyod ng climate change mitigation at sumulat ng mahigit 50 environmental impact assessments. Siya rin ay isang senior technical consultant sa Prism Express Consulting.

Ang lahat ng kalkulasyon ay nagtatantya ng pagbawas sa posibleng pagkamatay at insidente ng kanser dahil sa paglipat sa HTP, ayon sa pag-aaral ni Camance.

Sinabi ng Nicotine Consumers Union of the Philippines (NCUP) na ang konklusyon ng pag-aaral ay nagpapatunay na ang nikotina ay hindi ang problema, kundi ang paraan ng pagkonsumo nito sa pamamagitan ng pagsunog.

Sa pamamagitan ng paggamit ng mga walang usok na pamamaraan tulad ng HTP, ang mga tao ay maaaring patuloy na masiyahan sa nikotina habang potensyal na binabawasan ang polusyon o pinsala sa loob o labas ng bahay, ayon kay Anton Israel, presidente ng NCUP.

Sinabi ni Camance na ang polusyon sa hangin at usok ng sigarilyo ay kabilang sa nangungunang limang sanhi ng pagkamatay sa Pilipinas. Dahil maraming oras ang ginugugol ng mga Pilipino sa loob ng bahay, ang paglipat sa HTP ay maaaring potensyal na mabawasan ang panganib ng mga sakit na ito, ayon sa kanyang pag-aaral.

Ang HTP ay isang bagong paraan ng paghahatid ng nikotina na idinisenyo bilang mas mainam na alternatibo sa tradisyonal na sigarilyo.

Ang isang kilalang brand ng HTP sa Pilipinas ay IQOS, na ipinakilala sa merkado noong 2020. Pinaiinit nito, nang hindi sinusunog, ang espesyal na idinisenyong mga stick ng tabako na tinatawag na TEREA para maghatid ng nikotina nang walang usok at abo.

Sinuri ng papel ni Camance ang 282 pag-aaral, pananaliksik, libro at salaysay na may kaugnayan sa paggamit ng HTP. Karamihan sa mga pag-aaral na ito ay nagmula sa database ng PubMed at ScienceDirect.

Ang mga pag-aaral na ito ay nagpapakita ng pagkabawas ng mapanganib na compound (HPHC) sa aerosol, at mas mababang konsentrasyon ng HPHCs sa loob ng bahay kapag gumagamit ng HTP, kumpara sa usok ng tabako.

Kinakitaan din ng makabuluhang pagsang-ayon na ang ganap na paglipat sa paggamit ng HTP mula sa paninigarilyo ay mas hindi nakakapinsala, ayon kay Camance.

Sa isang pag-aaral, nakitaan na ang mga biomarker dahil sa HPHCs ay lubhang mas mababa sa mga gumagamit ng HTP kumpara sa mga naninigarilyo. Gayunpaman, binigyang-diin ng pag-aaral ang pangangailangan para sa mas matagal na pagsubok para kumpirmahin ang mga natuklasan nito.

Sinabi ng pag-aaral na kung ang mga internasyonal na natuklasan tungkol sa potensyal na pagbabawas ng pinsala ng HTPs ay totoo, ang paglipat mula sa mga sigarilyo patungo sa HTP ay maaaring maging isang mahalagang bahagi ng malawakang programa para mabawasan ang mga sakit sa Pilipinas.