Prime Minister ng UK mamimigay ng 1 milyong vape kapalit ng pagtigil sa sigarilyo*

ni Chit Luna @Brand Zone | July 27, 2023

Pinuri ng mga tagapagtaguyod ng pampublikong kalusugan sa Asya ang Prime Minister ng UK na si Rishi Sunak dahil sa pagendorso niya sa vaping bilang mas ligtas na alternatibo sa paninigarilyo at pagtatatag ng mga programa na naghihikayat sa mga nasa hustong gulang na pumili ng mas mabuti para sa kanilang kalusugan.

Sinabi ni Clarisse Virgino, kinatawan ng Pilipinas sa Coalition of Asia Pacific Tobacco Harm Reduction Advocates (CAPHRA), na si Prime Minister Sunak, isang pinuno ng malayang mundo, ay nagpahayag na ang vaping ay mas mahusay na alternatibo para sa mga taong ayaw tumigil sa paninigarilyo.

Sinang-ayunan nila si Prime Minister Sunak sa tamang pagprotekta sa kalusugan ng mga residente ng UK sa pamapagitan ng "swap to stop" program—isang makabagong pamamaraan para mamahagi ng isang milyong libreng vape sa mga naninigarilyo.

Sinabi ni Prime Minister Sunak na mayroong matibay na batayan ang programa para matulungan ang mga kasalukuyang naninigarilyo na nasa hustong gulang at lumipat tungo sa paggamit ng vape.

Ayon kay Dr. Lorenzo Mata, presidente ng advocacy group na Quit for Good, ang mga gumagawa ng patakaran sa buong mundo ay dapat makinig sa administrasyon ni Prime Minister Sunak na isinasaalang-alang ang agham sa pagsisikap nitong tugunan ang epidemya ng paninigarilyo sa UK.

Sa halip na i-demonize ang vaping, itinataguyod ito ng UK bilang isang proactive at innovative na paraan para mahikayat ang mga tao palayo sa paninigarilyo at bigyan sila ng mas magandang pagpipilian, sabi ni Dr. Mata.

Ang mga vape, heated tobacco products at nicotine pouch ay ilan sa mga makabagong alternatibo na naghahatid ng nikotina nang walang pagsunog sa tabako.

Base sa mga siyentipikong pag-aaral, ang pagsunog ng tabako ay nagdudulot ng humigit-kumulang 7000 kemikal na taglay ng usok ng sigarilyo. Sa kabilang banda, ang nikotina ay hindi ang sanhi ng mga sakit na nauugnay sa paninigarilyo, ayon sa pananaliksik.

Sinabi ni Dr. Mata na ang stratehiya ng UK "ay nagpapatunay na ang Pilipinas ay kumilos sa tamang direksyon nang ipasa nito ang Republic Act No. 11900, o ang Vaporized Nicotine and Non-nicotine Products Act upang i-regulate ang vape, heated tobacco at iba pang alternatibong produkto.

Nagbibigay ngayon ang UK ng mga libreng vape starter kit sa isang milyong naninigarilyo bilang bahagi ng pambansang kampanya upang bawasan ang paninigarilyo. Tinatayang isa sa limang naninigarilyo sa England ang makakatanggap ng kit.

Sinabi ni Virgino na ang progresibo at maka-agham na istratehiya na ito ay nagbibigay ng pinakamagandang pagkakataon upang wakasan ang paninigarilyo, matapos mabigo ang World Health Organization at ang Framework Convention on Tobacco Control sa misyon nito sa nakalipas na mga dekada.

Sa pamamagitan ng pagbibigay ng 1 milyong libreng vape, kinikilala ng UK ang papel ng tobacco harm reduction sa pagbabago sa buhay ng mga naninigarilyo. Umaasa ang administrasyon ni Prime Minister Sunak na ang ‘swap-to-stop’ scheme ay magpapabilis sa pagbaba ng paninigarilyo sa UK.

Binigyang-diin ni Sunak ang kahalagahan ng programang "swap to stop" upang mapabuti ang kalusugan ng publiko, na kinabibilangan ng pagtataguyod ng vaping bilang isang mas ligtas na alternatibo sa paninigarilyo at bahagi ito ng isang diskarte na naghihikayat sa mga nasa hustong gulang na gumawa ng matalinong pagpili sa halip na magpataw ng mga pagbabawal o magbigay sa kanila ng limitadong opsyon.

Sinabi ng mga consumer group at public health advocates sa Pilipinas na ang desisyon ng UK ay dapat gumising sa mga bansang patuloy na sumusunod sa hindi epektibong patakaran ng WHO.

Ayon kay Virgino, ang paninindigan ng gobyerno ng UK na pabor sa mga smoke-free alternatives ay ang pinakamalaking hamon sa mahigpit at pagbabawal na patakaran ng WHO na nakakaapekto sa mahigit isang bilyong naninigarilyo sa mundo.

Aniya, ang quit-or-die approach na inilalako ng WHO at tinatanggap ng mga pulitikong sarado ang pag-iisip ay magreresulta lamang sa hindi kinakailangang pagkamatay dahil sa paninigarilyo.

Kung mayroong mas mahusay na alternatibong magagamit, ang mga ito ay hindi dapat ipagkait sa mga naninigarilyo, sabi ni Virgino.

Ayon sa Department of Health and Social Care ng UK, ang programa nito ay napatunayang epektibo sa pagsubok sa mga komunidad, kaya itinaas ito sa pambansang antas.

Kasama rin sa plano ang pagbibigay ng mga insentibong pinansyal na aabot hangggang 400 UK pounds para sa mga buntis na babae na huminto sa paninigarilyo.

Napatunayang nakakatulong ang vaping sa pagpapahinto sa mga tao sa paninigarilyo sa UK, dahil ipinapakita ng pananaliksik na "ang mga naninigarilyo na gumagamit ng vape araw-araw ay tatlong beses na mas malamang na huminto sa paninigarilyo".

Ang mga hakbang ay bahagi rin ng plano ng gobyerno ng UK na makamit ang "smoke-free" status sa taong 2030.

Humigit-kumulang 5.4 milyong tao sa England ang kasalukuyang naninigarilyo, at ipinakita ng mga pag-aaral na dalawa sa tatlong naninigarilyo ang mamamatay dahil dito kung hindi sila titigil o lilipat sa mas ligtas na alternatibo.

Kasama rin sa programa ang pagbabawal ng pagbebenta ng vape sa mga menor de edad.

Sa kabila ng pagtutol ng WHO sa mga smoke-free alternatives, natuklasan ng isang WHO study group noong 2015 na ang mga produktong “less toxic o less addictive” ay maaaring maging bahagi ng isang komprehensibong istratehiya sa pagbabawas ng pagkamatay at sakit na nauugnay sa tabako.

De Lemos, pinalalayas na sa NBI

ni Chit Luna @Brand Zone | June 29, 2023

Matindi ang galit ni Pamplona, Negros Oriental Mayor Janice Degamo, biyuda ng pinatay na si Negros Occidental Governor Roel Degamo sa pagkakabulgar ng kaso ng drug suspect na si Jose Adrian Dera, a.k.a. Jad Dera, na nakakalabas-masok ng detention facility sa tulong umano ng National Bureau of Investigation (NBI) jail guards.

Ani Mayor Degamo, tuluyan na siyang nawalan ng tiwala sa NBI na pinamumunuan ni Director Medardo De Lemos na appointee ni Pangulong Bongbong Marcos.

Nainis din si Mayor Degamo nang malaman nitong hindi binigyan ng parusa ni De Lemos ang hepe ng NBI Security Management Service na ‘di pinangalanan.

Nabatid na lamang ni Mayor Degamo na inilipat lamang ito sa South Cotabato NBI Office kung saan umano may negosyo ito.

Ani Mayor Degamo, parang walang ideya ang NBI sa mga nangyayari lalo na sa pagbawi ng sinumpaang salaysay ng 10 suspek sa pagpatay sa asawang gobernador.

Dahilan para maghanap na ng ibang ahensya ng gobyerno si Mayor Degamo, sapagkat nawalan na umano ito ng tiwala sa NBI.

Bumaba na aniya ang tingin ng marami sa NBI dahil sa bilanggong sina Dera at Miranda na malayang labas-masok ng selda.

Matatandaan na isa si Dera sa kasamang akusado ni dating Senador Leila de Lima sa kaso ng droga.

Nabuko ang paglabas-masok ni Dera sa NBI Detention Center kung saan apat na beses umano siyang lumabas sa selda kasama ang NBI guards.

Ang pinakahuling paglabas ni Dera ay makaraang makita ito na kumakain sa restaurant ng isang 5-star hotel sa Makati. Natuklasan din na nagtungo umano si Dera sa Tagaytay, Subic, at isang resort sa Calatagan, Batangas. Siya ay escorted din umano ng NBI guards patungong Rizal kasama ang isang babae.

Nabuking ang paglabas-masok ni Dera sa NBI cell dahil kay Atty. Levito Baligod, abogado ng pamilya Degamo.

At sinabi pa nito na siya ang nagbigay ng impormasyon sa NBI-NCR at NBI Task Force Against Illegal Drugs ukol sa mga aktibidad ni Dera.

Malaking tanong din umano, kung saan napunta ang P25 milyong sinasabing suhol sa mga suspek para iurong ang kanilang testimonya.

Alam umano kaya ito ni De Lemos, sapagkat kalat na raw sa Bureau na kaibigan umano nito ang hepe ng Security Management Service na na-reassign lang sa Koronadal.

Ang ipinagtataka naman ng mga grupo ng mga abogado ay kung bakit hindi pa sinisibak si De Lemos dahil bukod sa expired na ang kanyang serbisyo bilang director ng Bureau gawa ng compulsory retirement sa edad na 65 ay wala umano itong order mula sa Department of Justice na nagsasabing extended siya.

Liban dito, nasasaad sa Memorandum mula sa opisina ni dating Pangulong Rodrigo Duterte na may petsang February 18, 2021 “the extension of service of government officials and employees who have reached the compulsory retirement age will no longer be allowed”.

“Out of delicadeza, NBI Director Atty. Medardo De Lemos dapat ka nang mag-resign,” panawagan ng mga grupo ng mga abogado sa iba’t ibang sektor sa bansa at ng pamilya Degamo.

Grupo ng mga konsyumer naalarma sa pagbebenta ng puslit na sigarilyo at vapes

ni Chit Luna @Brand Zone | June 16, 2023

Isang grupo ng mga konsyumer ang naalarma sa paglaganap ng mga puslit na sigarilyo at hindi rehistradong vapes na maaaring makapinsala sa kalusugan.

Sinabi ni Antonio Israel, presidente ng Nicotine Consumers Union of the Philippines (NCUP), na ang mga hindi rehistrado at kontrabandong produkto ay patuloy na nakakarating sa merkado dahil sa tinatawag na illicit trade o ipinagbabawal na kalakalan.

Ayon kay Israel, ang kanyang grupo ay sumusuporta sa mga produktong may mas mababang dulot na pinsala kaysa sa sigarilyo, subalit nababalewala ang kanilang pagsisikap dahil sa ipinagbabawal na kalakalan ng tabako.

Ang illicit trade, aniya, ay nagbubukas ng pintuan sa mga potensyal na hindi kontrolado at talagang mapanganib na mga produkto.

“We have staunchly advocated for harm reduction strategies to save smokers’ lives. But those efforts are undermined by illicit tobacco trade because it opens doors to potentially unregulated and downright dangerous products,” ayon kay Israel.

Binanggit ito ni Israel bilang reaksyon sa pahayag ni Bureau of Internal Revenue (BIR) Commissioner Romeo Lumagui tungkol sa masamang epekto ng mga puslit na sigarilyo at hindi rehistradong vapes na kumalat na din sa mga e-commerce platforms.

Sa kanyang mensahe sa ginanap kamakailan na Anti-Illicit Trade Summit sa Shangri-La The Fort sa Taguig City, ibinunyag ni Lumagui na ginagamit ng mga sindikato ng krimen sa buong mundo ang kita mula sa iligal na kalakalan para pondohan ang mga iligal na aktibidad tulad ng human at drug trafficking, money laundering, cybercrime at armed robbery.

Inilalagay din nito ang mga internasyonal at lokal na komunidad sa malaking panganib sa seguridad, ayon kay Lumagui.

Sinuportahan ito ni Israel na nagsabing ang problema ng ipinagbabawal na kalakalan ng tabako ay humahadlang din sa kanilang layunin na suportahan ang mga alternatibo sa tradisyonal na paninigarilyo tulad ng mga lehitimong vapes at heated tobacco.

Binigyang-diin niya ang kahalagahan ng pagtuturo sa publiko tungkol sa panganib na nauugnay sa mga peke at hindi kinokontrol na mga produkto.

Isa si Israel sa mga nangungunang convenors ng “EKIS sa Smuggling”—isang kilusan sa Internet na naglalayong turuan ang mga retailer at consumer sa mga panganib ng pagbili at pagbebenta ng ipinagbabawal at pekeng produktong tabako.

Ang EKIS ay itinatag upang itaas ang kamalayan ng mga mamamayan sa lumalaking banta ng illicit trade sa Internet.

Hinimok ni Israel ang mga nagtitinda at mga konsyumer na maging mapagbantay, mag-ingat at bumili lamang mula sa mga pinagkakatiwalaan at awtorisadong mapagkukunan ng mga produkto.

Sinabi ng Israel na ang edukasyon sa mga konsyumer ay makakatulong nang malaki sa patuloy na pagkakaroon ng mas ligtas na mga alternatibo sa sigarilyo.

Sinuportahan din ni Israel ang BIR sa pangunguna ni Lumagui sa dedikasyon nito na labanan ang ipinagbabawal na kalakalan ng tabako. Sinabi niya na saludo ang NCUP sa BIR sa kanilang pangako na habulin ang mga bawal na mangangalakal ng mga sigarilyo at vapes.

Kailangang magkaroon ng proactive na hakbang mula sa pamahalaan upang matiyak ang kaligtasan ng mga mamimili, dagdag niya.

Ayon kay Israel, hindi alam ng marami na kahit na ang pagbili ng isang pekeng stick ng sigarilyo o hindi rehistradong vape sa Shopee o Lazada ay may masamang epekto na nakakaapekto sa ekonomiya at kalusugan ng publiko.

Kinumpirma ni Lumagui na ang ipinagbabawal na kalakalan ay nakaapekto sa ekonomiya ng buong mundo. Sa Pilipinas, aniya, ang problema sa ipinagbabawal na kalakalan ng sigarilyo ang dahilan kung bakit nagkaroon ang BIR ng 20 porsiyentong kakulangan sa target nitong excise tax collection.

Inamin ni Lumagui na ang problema sa smuggled goods ay humantong na din sa digital space. Ito aniya ang dahilan kung bakit nakatuon ang BIR sa pagpapaigting ng laban sa ipinagbabawal na pangangalakal ng mga hindi rehistradong sigarilyo, vapes at heated tobacco na patuloy na ibinebenta sa mga pangunahing online shopping platforms tulad ng Lazada, Shopee at Facebook Marketplace.