Mga bansa sa ASEAN hinamong magkaisa para labanan ang puslit na tabako

ni Chit Luna @News | Feb. 21, 2025

Photo File: Rodney Van Doreen - Tobacco Reporter / FP

Hinamon ng mga internasyonal na eksperto na magkaisa ang mga miyembro ng ASEAN para harapin ang lumalalang krisis ng ipinagbabawal na kalakalan ng tabako na sumisira sa kalusugan ng publiko, nagpapalakas sa organisadong krimen at umaagaw ng bilyun-bilyong kita mula sa gobyerno.

Ipinaliwanag ni Rodney Van Dooren, isang illicit trade expert ng Philip Morris International (PMI) sa ikalawang International Tobacco Summit ng National Tobacco Administration (NTA) ang kahalagahan ng pakikipagtulungan sa pagitan ng mga bansang ASEAN para epektibong labanan ang pagpupuslit ng tabako.

Sinabi ni Van Dooren na samantalang ang Pilipinas ay gumagawa ng mahusay na hakbang sa pagpapatigil ng ipinagbabawal na operasyon ng tabako, ito ay nangangailangan ng patuloy na pansin mula sa pamahalaan.

Aniya, maraming mga ipinagbabawal na produkto ng tabako ay nagmumula sa ibang mga bansa sa ASEAN tulad ng Vietnam at gayundin sa India at China.

Nagbigay si Van Dooren ng mga rekomendasyon para pigilan ang ipinagbabawal na kalakalan ng tabako, kabilang ang pagsunod sa mga regulasyon sa merkado, pagsasama-sama ng mga regulasyon sa mga bansang dinadaanan ng kalakalan, paggamit ng mga internasyonal na kasunduan sa kalakalan at pagpapalawak ng kooperasyon.

Sinabi niya na ang pag-export na walang kaukulang import ay dapat maging trigger ng internasyonal na kooperasyon.

Binigyang-diin din niya ang pangangailangang gamitin ang mga umiiral na platform tulad ng World Customs Organization (WCO) at World Trade Organization (WTO) para mapadali ang pagpapatupad na kaukulang regulasyon.

Ang Pilipinas, sabi ni Van Dooren, ay nagpatupad ng ilang mga hakbang para matugunan ang isyu, kabilang ang whitelist na inilabas ng Bureau of Internal Revenue ng mga aprubadong tagagawa, importer, exporter at may-ari ng tatak para mapahusay ang pagpapatupad.

Kabilang din dito ang pansamantalang pagbabawal sa online na pagbebenta ng e-cigarette at pagsusog sa Anti-Agri Smuggling Bill para isama ang mga produktong tabako.

Sa kabila ng mga pagsisikap na ito, lumalala ang ipinagbabawal na kalakalan dahil sa mataas na demand at malaking agwat sa presyo sa pagitan ng ligal at iligal na mga produktong tabako.

Sinabi ni Van Dooren na kapag may demand, nagkakaroon din ng supply sa merkado.

Sinuportahan ni Rohan Pike, isang Australian security expert, ang pananaw na ito. Sa isang panayam noong Mayo 2024 sa ABC News, sinabi ni Pike na ang mataas na presyo ng tabako sa Australia ay nagdulot ng black market na pinangunahan ng mga organisadong grupo ng krimen.

Aniya, ang numero unong driver ng problema ay ang napakalaking agwat sa presyo ng tabako, at kahit na ang mga mamamayang masunurin sa batas ay bumaling sa ipinagbabawal na produkto kapag ang presyo ay umabot sa matinding antas.

Binigyang-diin din ni Pike na ang pag-kumpiska sa mga iligal na produkto ay hindi sapat para malutas ang ipinagbabawal na problema sa kalakalan.

Sinabi naman ni NTA administrator Belinda Sanchez na kailangan magkaroon ng isang sama-samang diskarte sa pagharap sa ipinagbabawal na kalakalan.

Aniya, ang pagtaas ng ipinagbabawal na kalakalan sa tabako ay isang lumalagong alalahanin, na nagpapahina sa kabuhayan ng hindi mabilang na mga indibidwal.

Ayon sa datos ng NTA, ang ipinagbabawal na kalakalan ay may masamang epekto sa kabuhayan ng 2.2 milyong Pilipino, kabilang ang mahigit 430,000 magsasaka at manggagawang bukid na umaasa sa industriya.

Heated tobacco, vape makapagliligtas sa milyun-milyong naninigarilyo, ayon sa eksperto

ni Chit Luna @News | Feb. 18, 2025

Ang mga produktong walang usok tulad ng heated tobacco at vape na naghahatid ng nikotina nang walang pagsunog sa tabako ay maaaring magligtas sa buhay ng milyun-milyong naninigarilyo na hindi makahinto, ayon sa isang kilalang Israeli cardiologist.

Ayon kay Prof. Reuven Zimlichman, direktor ng The Brunner Cardiovascular Research Institute sa Tel-Aviv University sa Israel, napakahirap huminto sa paninigarilyo dahil ang tabako ay naglalaman ng nikotina na lubhang nakakahumaling.

Aniya, hindi nikotina ang nagdudulot ng malubhang epekto sa kalusugan ng mga gumagamit ng tabako, kundi ang libu-libong kemikal na dulot ng pagsunog sa tabako.

Nasa Pilipinas si Zimlichman para magsilbi bilang resource speaker sa 46th Philippine Neurological Association (PNA) annual convention na ginanap noong Nobyembre 26 hanggang 29, 2024 sa Conrad Manila sa Pasay City.

Sinabi ni Zimlichman na halos kalahati or 49 porsiyento ng mga naninigarilyo na may coronary artery disease ay patuloy na naninigarilyo, samantalang 57 porsiyento ng mga na-stroke ay patuloy pa din naninigarilyo.

Halos 72 porsiyento ang patuloy na naninigarilyo matapos ma-diagnose na may peripheral artery disease or pagaliit ng daluyan ng dugo.

Aniya, habang nakakahumaling ang nikotina, hindi ito nakakasama sa katawan and hindi ito carcinogenic na nagdudulot ng sakit sa puso o sakit sa daluyan ng dugo.

Kung mayroong isang alternatibong paraan para matugunan ang pananabik ng mga naninigarilyo nang hindi nagsusunog ng tabako, ito ay malinaw na isang opsyon na dapat isaalang-alang, sabi ni Zimlichman.

Naniniwala si Zimlichman na ang heated tobacco at vape ay mga anyo ng tobacco harm reduction at inobasyon na may potensyal na magligtas ng milyun-milyong buhay.

Ang tobacco harm reduction ay isang diskarte sa pampublikong kalusugan na naglalayong magbigay ng hindi gaanong nakakapinsalang mga alternatibo sa mga taong ayaw huminto sa paninigarilyo nang mag-isa o sa kasalukuyang mga naaprubahang pamamaraan.

Ang heated tobacco ay binubuo ng baterya ng lithium na nagpapainit sa tabako nang sapat lamang para maglabas ng aerosol na naglalaman ng nikotina ngunit hindi nasusunog ang tabako.

Dahil ang tabako ay pinaiinit lamang at hindi sinusunog, ito ay walang usok. Ang antas ng mapaminsala at potensyal na nakakapinsalang kemikal ay luhang mas mababa kumpara sa usok ng sigarilyo.

Sinabi ni Zimlichman na ang heated tobacco ay nag-aalok ng pinakamahusay na pagkakataon para sa mga na naninigarilyo na huminto.

Samantala, ang vape o e-cigarette ay mayroon ding lithium battery na nagpapainit sa e-liquid na karaniwang naglalaman ng nicotine, propylene glycol, vegetable glycerin at mga pampalasa.

Kino-convert ng e-cigarette ang e-liquid sa isang vapor na nilalanghap ng gumagamit. Ito ang dahilan kung bakit ang paggamit ng e-cigarette ay kilala bilang vaping.

Ang e-cigarette ay hindi nagsusunog ng tabako at hindi gumagawa ng tar o carbon monoxide, dalawa sa mga pinakanakapipinsalang elemento sa usok ng tabako.

Binanggit din niya ang resulta ng isang pag-aaral sa South Korea noong 2021, na nagpakita na ang paglipat sa mga produktong walang usok ay nauugnay sa 23 porsiyento pagbaba sa panganib ng cardiovascular disease.

Ang pagbaba sa panganib ng cardiovascular disease sa mga switcher ay kadalasang naiugnay sa heated tobacco.

Dati ay hindi naniniwala sa tobacco harm reduction si Zimlichman, siubalit nagbago ang kaynyang posisyon pagkatapos suriin ang mga siyentipikong ebidensya.

Pagkatapos ng mahigit 50 taon ng pagpapatupad ng mga tradisyonal na estratehiya sa pagkontrol sa tabako, walang nagbago, sabi ni Zimlichman. Sa kasalukuyan ay may tinatayang isang bilyong naninigarilyo sa buong mundo, at 8 milyong tao ang namamatay sa mga sakit na nauugnay sa paninigarilyo bawat taon.

Sinabi ni Zimlichman na ang mga pamahalaan, mga regulatory agencies at ang medikal na komunidad ay kailangang maging bukas sa mga bagong ideya tulad ng tobacco harm reduction.

Kinilala ni Zimlichman ang pagbabago sa Sweden, Japan, at UK na nagkaroon ng pagbabawas sa antas ng paninigarilyo, pagkakasakit at pagkamatay dahil sa smoke-free products.

Nakilala ang Sweden sa buong mundo dahil sa malawakang paggamit nito ng snus at nicotine pouches, kasabay ng mga programang pang-edukasyon sa publiko, na nagresulta sa malaking pagbawas ng bilang ng naninigarilyo sa bansa.

Ayon sa Smoke-Free Sweden, isang kampanyang humihimok sa ibang bansa na sundan ang modelo ng Sweden sa tobacco harm reduction, ang insidente ng kanser sa Sweden ay 41% na mas mababa kaysa sa karaniwang antas sa Europa, at ito rin ang may pinakamababang porsyento ng mga sakit na may kaugnayan sa tabako sa buong EU.

Nanawagan din si Zimlichman sa mga Pilipinong doktor na may mga pasyenteng may cardiovascular disease at naninigarilyo. Aniya, dapat bigyan ng mga doctor ang kanilang pasyente ng pagkakataon na lumipat sa heated tobacco o vape.

Kung mas malala ang sakit sa cardiovascular ng pasyente, mas maraming benepisyo ang maaari nilang makuha mula sa paglipat, dagdag ni Zimlichman.

PTI: Karanasan ng karatig-bansa maaaring batayan sa pagtatag ng koleksyon ng buwis sa tabako

ni Chit Luna @News | Jan. 22, 2025

Photo File: Koko Nograles

Ipinahayag ng Philippine Tobacco Institute (PTI) ang suporta nito sa isang panukalang batas na inihain sa Kongreso na mapigilan ang lumalalang iligal na kalakalan ng tabako na nagdudulot ng pagbaba ng koleksyon ng buwis.

Tinukoy nila ang karanasan ng mga kalapit na bansa na pansamantalang sinuspinde ang taunang pagtaas ng excise tax sa tabako upang maisaayos ang merkado.

“By pausing the annual excise tax increases, the prices of legitimate products such as cigarettes can stabilize and decrease the incentive for consumers to purchase illicit smuggled products,” ayon kay PTI President Jericho “Koko” B. Nograles sa isang pagdinig ng Senate Ways and Means Committee na tumatalakay sa isyu ng iligal na bentahan ng tabako.

Binanggit ni Senate Ways and Means Committee Chairman, Senador Sherwin Gatchalian, na kailangang pigilan ang lumalaking merkado ng iligal na sigarilyo, na aniya ay nagdudulot ng isang “lose-lose situation” para sa Pilipinas.

Dahil sa laganap na iligal na sigarilyo at pagbaba ng koleksyon mula sa excise tax, inihain ng mga lider ng Kamara ang House Bill (HB) 11279 upang pansamantalang itigil ang pagtaas ng excise tax sa tabako. Layunin nitong palakasin ang pagpapatupad ng mga batas laban sa iligal na kalakalan.

Ang panukalang batas ay naglalayong suspindihin nang 1 taon ang taunang 5% na pagtaas ng buwis sa mga produktong tabako, heated tobacco products, vapor products, cigars, at sigarilyo.

Kabilang sa mga may-akda ng panukalang batas sina Deputy Speaker at Isabela 1st District Rep. Antonio “Tonypet” Albano, Deputy Speaker at Ilocos Sur 2nd District Rep. Kristine Singson Meehan, Ilocos Norte 2nd District Rep. Angelo Marcos Barba, Kabayan Party-list Rep. Ron Salo, Ifugao Lone District Rep. Solomon Chungalao, at PBA Party-list Rep. Margarita Nograles-Almario.

Ayon sa datos ng Food and Nutrition Research Institute (FNRI), bumaba ang koleksyon ng excise tax sa tabako mula PHP 176 bilyon noong 2021 hanggang PHP 130 bilyon noong 2024. Kasabay nito, tumaas naman ang adult smoking prevalence mula 19% noong 2021 hanggang 24.4% noong 2023.

Ibinahagi ni Nograles ang karanasan ng Singapore, na nagpatupad ng parehong moratorium sa loob ng 8 taon. Ito’y nagresulta sa pagpapatatag ng lehitimong merkado at pagtaas ng kita ng gobyerno.

Ayon sa isang pag-aaral na inilathala sa World Customs Journal ng mga ekonomistang sina Adrian Cooper at Daniel Witt, itinaas ng gobyerno ng Singapore ang excise duty tax sa sigarilyo mula SGD150 kada 1,000 sigarilyo patungong SGD352—ang pinakamataas sa Asya noong panahong iyon. Bagama’t tumaas ang kita sa una, bumaba ito ng 20% sa pagitan ng 2003 at 2006.

Dahil dito, lumakas ang iligal na kalakalan. Bilang tugon, pinanatili ng gobyerno ng Singapore ang excise tax sa antas ng 2005 at naglaan ng malaking pondo sa pagpapatupad ng batas. Ito’y nagdulot ng positibong resulta, kung saan bumawi ang volume ng duty-paid cigarettes pagkatapos ng 2006 at bumaba ang bahagi ng iligal na merkado mula 22% noong 2006 hanggang 15.9% noong 2010.

Ayon kay Gatchalian, “The reason we impose excise tax on tobacco products is so we can have better health outcomes. But smoking prevalence has now reversed. We’re now in a lose-lose situation because smoking prevalence is going up, tax collection is going down.”

Hinikayat ni Senador Gatchalian ang Department of Finance (DOF) na tugunan ang lumalaking banta ng iligal na kalakalan ng tabako. “If we don’t focus our attention on this, we’ll end up with a scenario where illicit trade might be bigger than legal activities,” aniya.

“From the standpoint of this committee, revenue is going down, but smoking prevalence is going up, so where are the cigarettes coming from?” tanong ni Gatchalian.

Ayon kay Bureau of Internal Revenue (BIR) Head Revenue Executive Assistant Don Galera, umabot lamang sa PHP 134 bilyon ang kabuuang koleksyon ng excise tax sa tabako noong nakaraang taon, malayo sa target ng ahensya na PHP 185 bilyon noong 2023.

Ipinunto ni Gatchalian ang patuloy na pagtaas ng nasasamsam na iligal na tabako sa kabila ng mas pinaigting na pagpapatupad ng batas. Iminungkahi niya ang pangangailangan ng bagong estratehiya upang tugunan ang iligal na kalakalan at matiyak ang matatag na daloy ng kita ng gobyerno.

“In my opinion, enforcement is not enough. We have to look at the other causes of illicit trade in our country. We cannot ignore the theory of incentives given the significant price difference between illicit cigarettes and legitimate ones,” aniya.

“We must recognize the harm this causes—not just in lost revenue but also on health risks, as these activities operate under the radar,” dagdag pa ni Gatchalian.