SSS membership, hindi maaaring i-withdraw

@Buti na lang may SSS | August 16, 2020

Dear SSS,

Magandang araw! Nais kong malaman kung maaari bang i-withdraw ang pagiging miyembro sa SSS? – Alona

Sagot

Mabuting araw, Alona! Hindi maaaring bawiin ang SSS membership sapagkat pang-habambuhay ang pagiging miyembro sa SSS. May kasabihan tayo na “once a member, always a member.” Kahit nakapagbayad lamang ng isang hulog ang miyembro at hindi na ito naipagpatuloy ay siya’y mananatiling miyembro ng SSS. Katunayan, kahit isa lamang ang naihulog niyang kontribusyon ay makatatanggap na siya ng benepisyo tulad ng pagpapalibing o funeral benefit. Ngunit mas maganda kung tuluy-tuloy ang iyong paghuhulog dahil kaakibat ng responsibilidad na ito bilang miyembro ay ang sakop na proteksiyon sa iyo maging sa iyong pamilya.

Gayunman, ang miyembro na nawalan ng trabaho o tumigil na bilang overseas Filipino worker, non-working spouse, self-employed at voluntary member ay may opsyon pa ring ipagpatuloy ang pagbabayad ng kanyang kontribusyon sa SSS bilang voluntary member upang lubos niyang mapakinabangan sa oras ng kanyang pangangailangan ang pitong (7) benepisyong tulad ng pagkakasakit, panganganak, pagkabalda, pagreretiro, pagpapalibing, pagkamatay at pagkawala ng trabaho.

Kahit sa mga panahong walang hulog ang miyembro, maaari pa ring makakuha ng mga benepisyo at pautang na ibinigay ng SSS hangga’t natutugunan ng miyembro ang lahat ng kondisyon upang maging kuwalipikado sa alinmang benepisyo o mga pautang na programa nito.

Alona, hinihikayat ka namin na ipagpatuloy ang paghuhulog sa SSS sapagkat ito ay isang paraan ng iyong pag-iipon sa panahon ng iyong pagreretiro. Kung may pagkakataon din, sa panahon ng iyong kalakasan at pagkita ng pera, mas makabubuting mag-impok ng pansarili bukod pa sa paghuhulog ng kontribusyon mo sa SSS. Tandaan na ang kontribusyon na inihuhulog mo ngayon sa SSS ay babalik sa iyo bilang pensiyon sa katapusan ng produktibong taon ng inyong buhay.

Kaya nga’t sa nakalipas na 62 taon at sa mga susunod pang henerasyon, ang SSS ay mananatiling kabalikat ng bawat manggagawang Pilipino.

Mabuti na lang, may SSS!

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Bakit mas mababa ang pensiyon sa SSS kumpara sa GSIS?

@Buti na lang may SSS | August 9, 2020

Magandang araw! Napansin ko na mas malaki ang tinatanggap na pensiyon ng mga retiradong government employee kumpara sa mga manggagawang nasa pribadong sektor. Nais ko lamang malaman kung ano ang pagkakaiba ng SSS at GSIS? Salamat. - Shawn

Sagot

Nais naming linawin na ang pensiyong tinatanggap ng isang pensiyunado sa SSS ay naaayon sa naihulog niya at sa haba ng paghuhulog niya sa SSS. Malaki ang pagkakaiba ng paghuhulog sa SSS kung ihahambing sa paghuhulog sa ng mga kawani ng pamahalaan sa GSIS.

Ang SSS ay idinisenyo ayon sa defined benefit scheme. Sa ilalim ng sistemang ito, ang SSS ay nagbibigay ng mga benepisyo tulad ng sickness at maternity benefit maging ang pensiyon na kinukuwenta batay sa kabuuang bilang ng naihulog na kontribusyon ng miyembro at ang haba o panahon ng kanyang paghihulog na tinatawag na credited years of service (CYS).

Samantala, napakahalaga ng kanyang monthly salary credit (MSC) o ang salary level kung saan ibinabase ang halaga ng buwanang kontribusyon ng miyembro dahil ang MSC ang basehan ng lahat ng komputasyon ng benepisyo at loan ng isang miyembro ng SSS.

Sa ilalim ng defined benefit scheme ng SSS, ang bawat manggagawa na nagiging miyembro ng SSS ay siguradong makatatanggap ng kaukulang benepisyo mula sa SSS. Sa kasalukuyan ay mayroong pitong uri ng benepisyo itong ibinibigay sanhi ng pagkakasakit, panganganak, pagkabalda, pagreretiro, pagpapalibing, pagkamatay at pagkawala ng trabaho o unemployment.

Makaiba ang contribution rate sa pagitan ng SSS at GSIS. Sa ngayon, ang contribution rate sa SSS ay 12% lamang samantalang, 21% ang contribution rate sa Government Service Insurance System (GSIS). Kung susuriin natin, halos dalawang beses ang laki ng contribution rate ng nasa pamahalaan kumpara sa mga nasa pribadong sektor. Ibig sabihin, halos doble ang inihuhulog ng mga kawani ng pamahalan kumpara sa inihuhulog ng mga nasa pribadong sektor. Sa Asya, isa ang SSS sa may pinakamababang sinisingil na contribution rate para sa pension fund nito.

Mahalaga din na ating suriin ang pinagbabatayan ng contribution rate o ang monthly salary credit (MSC). Lubhang mas mababa ang MSC sa SSS kaysa sa GSIS. Ang MSC sa SSS ay batay sa 2,000 hanggang sa maximum na 20,000 salary credit, samantalang ang MSC sa GSIS ay ibinabatay sa kabuuang suweldo ng manggagawa. Malaki ang kinalaman ng contribution rate at MSC sa pensyon na maaaring tatanggapin ng isang miyembro.

Halimbawa, ang isang manggagawa sa pribadong sektor ay kumikita ng P20, 000 kada buwan. Ang kanyang kontribusyon sa SSS kada ay P2, 400. Samantala, ang isang kawani ng pamahalaan na kumikita ng parehong halaga kada buwan ay naghuhulog sa GSIS ng P4, 200 bilang kanyang kontribusyon. Patunay lamang ito na mas malaki ang kontribusyon sa GSIS na sa hinaharap ay kaakibat na mas malaki ding pensyon ang matatanggap ng miyembro nito.

Bunga nito, mas malaki ang naihuhulog at naiipon ng mga naglilingkod sa pamahalaan para sa kanilang pagreretiro. Dapat nating isaisip na kung mas malaki ang iyong inimpok ay mas malaki rin ang balik nito sa ‘yo.

Kaya Shawn, upang magkaroon ka ng mas mataas na pensiyon, dapat mas malaki rin ang naihuhulog mo na kontribusyon para sa iyong pagreretiro. Dapat din tandaan na ang kontribusyon sa SSS ay isang paraan ng pag-iimpok at hindi dagdag-gastusin dahil babalik din ito sa ‘yo bilang pensiyon sa panahon ng iyong pagreretiro.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Kaalaman sa benepisyo sa pagkakasakit o sickness benefit ng miyembro ng SSS, alamin!

@Buti na lang may SSS | August 2, 2020

Magandang araw! Na-confine ako noong May 25 hanggang June 2, 2020 sa isang ospital sa Valenzuela at naputulan ako ng tatlong daliri sa kanang paa. Binigyan ako ng 90 araw ng doktor ko bilang recuperating days ko ngunit ang inapruban ng SSS ay 30 araw lamang. Sa ngayon ay halos 60 araw na akong hindi nakakapasok. Ano ang maaari kong gawin dahil 30 araw lang ang sickness benefit ko? – Gilbert

Sagot

Mabuting araw, Gilbert! Ang sickness benefit o ang benepisyo sa pagkakasakit ay cash allowance na ibinabayad sa miyembro para sa bawat araw na hindi siya makapagtrabaho dahil sa sakit o pagkapinsala ng katawan.

Upang makuwalipika sa nasabing benepisyo, dapat nagkasakit ka ng hindi kukulangin sa apat na araw at may hindi bababa sa tatlong (3) buwanang kontribusyon sa loob ng huling 12 buwan bago ang semestre ng iyong pagkakasakit o pagkapinsala ng katawan. Sa iyong kaso, ang semestre ng iyong pagkakasakit ay mula Enero hanggang Hunyo 2020. Hindi natin isasama sa bilang ng komputasyon ang mga hulog mo sa panahong ito dahil kailangang bumilang tayo ng 12 buwan pabalik mula Enero hanggang Disyembre 2019. Kung may hulog ka rito na tatlong buwan, kuwalipikado ka sa sickness benefit.

Kung empleyadong tulad mo, kailangang naipagbigay-alam mo ito sa iyong employer sa loob ng limang araw at siya naman sa SSS sa loob din ng limang araw upang ikaw ay mabayaran ng benepisyong ito. Kailangan naman dito ang pagpasa ng Sickness Notification Form na maaaring i-download sa SSS website, www.sss.gov.ph.

Dapat nagamit na rin niya ang lahat ng kanyang kasalukuyang company sick leaves.

Kung ang miyembro naman ay self-employed o voluntary member, ang direktang aabisuhan niya ay ang SSS.

Ang halaga ng sickness benefit ay batay sa bilang ng araw na naaprubahan ng SSS. Makikita ang aprubadong bilang ng araw sa Sickness Notification Form na ibabalik ng SSS. Ang bilang naman ng aprubadong araw ay nakadepende sa pagsusuri ng doktor ng SSS kaya may pagkakataong hindi ito tugma sa bilang ng araw na inirekomenda ng personal na doktor ng miyembro.

Maaari ka ulit mag-file ng sickness benefits kung hindi ka patuloy makapagtrabaho bunga ng iyong karamdaman. Sa loob ng isang taon, maaaring mapagkalooban ang isang miyembro ng sickness benefit na katumbas ng hanggang 120 araw. Gayunman, kung mauubos mo ang 120 days at patuloy na hindi ka pa rin makapagtrabaho, makalipas ang 240 araw ay maaari ka ng mag-apply sa ilalim ng disability benefit.

Ang benepisyo sa pagkabalda naman ay ibinabayad sa isang miyembro na nawalan ng kakayahang magtrabaho o ang kanyang kakayahang kumita ay nabawasan dahil sa isang kapansanan na sanhi ng karamdaman o pagkapinsala.

Isasailalim ka sa pagsusuri ng mga doktor ng SSS upang malaman kung ang iyong pagkabalda ay kuwalipikadong mabigyan ng nasabing benepisyo. Ilan sa halimbawa nito ay ang pagkaputol ng daliri, kamay, braso, binti na may kaukulang bilang ng buwan ng pagtanggap ng benepisyo ng miyembro. Maaaring mabigyan ka ng disability pension o lump sum amount depende sa bilang ng iyong hulog sa SSS.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.