Ang kahalagahan ng pagiging miyembro sa SSS

@Buti na lang may SSS | September 6, 2020

Dear SSS,

Magandang araw! Ako ay construction worker na taga-Pasig City. Nais kong itanong kung ano ba ang Social Security System? At bakit ito mahalaga sa mangggawa? Salamat! – Elias

Sagot

Mabuting balita, Elias!

Napapanahon ang iyong katanungan sapagkat kasalukuyang ipinagdiriwang ng Social Security System (SSS) ang ika-63 na anibersaryo nito. Kaya mahalagang matalakay ang kahalagahan ng pagiging miyembro ng SSS lalo na sa mga manggagawang tulad mo mula sa pribadong sektor.

Para sa iyong kaalaman, ang SSS ay naitatag noong Setyembre 1, 1957 sa bisa ng Republic Act No. 1161 o ang Social Security Act of 1954. Nilalayon ng batas na bigyan ng proteksiyon ang mga manggagawa sa pribadong sektor maging mga propesyunal at nasa informal sector. Bilang tugon dito, itinatag ang SSS upang pangasiwaan ang pensiyon at magkaloob ng social security benefits sa mga miyembro nito.

Ang paghuhulog sa SSS ay isang paraan ng pag-iipon para sa iyong pagreretiro. Ito rin ay maituturing na paghahanda sa oras ng pangangailangan o times of contingencies.

Bilang miyembro, maaari kang makakuha ng benepisyo para sa pagkakasakit, panganganak, pagkabalda, pagreretiro, pagkamatay, pagpapalibing at pagkawala ng trabaho. Kinakailangan lamang na nakatugon ka sa mga kuwalipikasyon sa bawat benepisyo.

May kasabihan tayo na “once a member, always a member” dahil pang-habambuhay ang pagiging miyembro sa SSS. Kahit nakapagbayad lamang ng isang hulog ang isang miyembro at hindi na ito naipagpatuloy ay mananatili pa rin siyang miyembro ng SSS. Kahit pa mahabang panahon na siyang hindi nakapaghulog ay hindi mapo-forfeit o mawawala ang naihulog niya at mananatiling nasa rekord niya ang mga naihulog niya.

Kahit sa panahon na wala kang naihulog sa SSS, maaari ka pa ring makakuha ng mga benepisyo hangga’t natutugunan mo ang lahat ng kondisyon sa alinmang benepisyo. Sa katunayan, kahit isa lamang ang iyong naihulog na kontribusyon ay kuwalipikadong tumanggap ang iyong mga benepisaryo ng benepisyo ng pagpapalibing o funeral benefit kung ikaw ay hindi inaasahang pumanaw.

Bukod sa mga nabanggit na benepisyo, nagkakaloob din ang SSS ng iba’t ibang pautang sa mga miyembro at pensiyunado tulad ng Salary Loan para sa mga miyembro at Pension Loan Program para naman sa mga pensiyunado. Nagbibigay din ang SSS ng iba pang tulong pinansiyal sa mga miyembro at pensiyunado nito na naapektuhan ng mga kalamidad tulad ng Calamity Loan Assistance Program at Direct House Repair and/or Improvement Loan para sa mga miyembro at three-month advance pension para sa mga pensiyunado. Kinakailangan lang na nakatugon ka sa mga kondisyon sa ilalim ng alinamang pautang mula sa SSS.

Kaya, malaki ang bentahe ng isang manggagawa na patuloy na naghuhulog sa SSS hanggang sa siya ay magretiro. Sa panahon ng pangangailangan o pagreretiro ay aanihin niya ang naiimpok niya sa SSS bilang pensiyon o benepisyo.

Ang SSS ay patuloy na mananatiling kabalikat ng bawat manggagawang Pilipino hanggang sa mga susunod na panahon.

Buti na lang, may SSS!

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

SSS Annual Confirmation of Pensioners (ACOP) Program, nananatiling suspendido

@Buti na lang may SSS | August 30, 2020

Dear SSS,

Pensioner ang nanay ko sa SSS at kami ay nakatira sa Polomolok, South Cotabato. Ang depository bank niya ay matatagpuan naman sa General Santos City. Mula August 19, naka-lockdown ang munisipalidad namin dahil sa COVID-19. Ano ang maipapayo ninyo hinggil ACOP ng nanay ko? – Rosannie

***

Dear SSS,

Ang nanay ko ay 80 taong gulang na at kasalukuyang tumatanggap ng pension ng namayapa kong tatay. Bawat taon ay kinakailangan niyang magpunta sa SSS branch para mag-comply sa ACOP. Dahil may pandemya, anong opsiyon ang maaari niyang gawin para makapag-ACOP reporting month na niya ngayong Setyembre? – Cherry

Sagot

Mabuting balita, Rosannie at Cherry! Sa kasalukuyan, pansamantalang sinuspinde ng SSS ang pagtupad ng lahat ng ating mga pensiyunado sa Annual Confirmation of Pensioners Program o ACOP. Mula Pebrero 2020, hindi muna kailangang pumunta ng inyong mga nanay sa alinmang SSS branch o sa kanyang depository bank upang mag-comply dito.

Ito’y bunsod na rin ng ating kinahaharap na pandemya kung saan prayoridad ng SSS ang mapangalagaan ang kalusugan at kaligtasan ng ating mga pensiyunado, higit lalo ang mga senior citizens na pinagbabawalang lumabas bilang health protocol ng gobyerno.

Ginagawa ito ng SSS mula pa noong 2012 upang malaman kung ang mga pensiyunado at kanilang benepisaryo ay sila pa rin ang kasalukuyang tumatanggap at nakikinabang ng mga kaukulang benepisyo mula sa SSS. Kaya naman, napakahalagang sila ay sumunod sa taunang pag-report sa mga sangay ng SSS higit lalo na ang ating mga total disability at death benefit pensioners, maging ang mga retiree-pensioners na naninirahan sa ibang bansa sa pamamagitan naman ng Skype.

Habang umiiral ang community quarantine sa bansa ay mananatili itong suspendido kaya naman hindi obligado ang mga nanay ninyong magtungo sa sangay ng SSS o sa kanilang depository bank bilang pagtugon sa ACOP. Patuloy pa rin silang makatatanggap ng kanilang buwanang pensiyon kahit hindi nakapag-report sa SSS sa birth month nila o sa birth month ng namayapang miyembro ng SSS.

Samantala, Rosannie and Cheryl, kapag tinanggal na ang ipinapatupad na community quarantine sa bansa, bibigyan pa ang mga pensiyunado ng karagdagang 60-araw na palugit upang makatugon sa ACOP. Kung hindi sila nakatugon sa takdang panahon, doon pa lamang sususpindehin ng SSS ang kanilang buwanang pensiyon.

Samantala, ang mga pensiyunado na suspendido na ang mga pensiyon bago pa man magpatupad ng community quarantine bago ang Pebrero 2020, ay bibigyan ng online option upang makatugon sa ACOP. Ang nasabing mga pensiyunado ay maaaring mag-file nito sa pamamagitan ng pag-sumite ng pinunuang ACOP form na maaaring i-download sa SSS website (www.sss.gov.ph) o pamamagitan ng drop-box system na matatagpuan sa mga sangay ng SSS.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Ano ba ang batayan ng computation ng SSS pension?

@Buti na lang may SSS | August 23, 2020

Dear SSS,

Magandang araw! Nais kong malaman kung paano ba kino-compute ang pensiyon na ibinibigay ng SSS? - Alexis

Sagot

Marami tayong miyembro ng SSS ang may ganyang katanungan higit lalo na ang ating mga miyembrong malapit ng magretiro. Nakasalalay ang halaga ng pensiyon sa naibayad na kontribusyon ng miyembro at sa bilang ng taon na aktibo itong naghuhulog.

May mahalagang papel na ginagampanan ang credited years of service (CYS) o ang bilang at haba ng taon ng paghuhulog ng miyembro gayundin ang kanyang monthly salary credit (MSC) o ang antas ng suweldo ng kabuuang kinikita ng miyembro sa loob ng isang buwan. Tandaan na ang MSC ang batayan ng halagang matatanggap ng miyembro sa pagkuha niya ng mga benepisyo at pautang sa SSS.

May tatlong (3) pormula rin o pamamaraan ng computation na sinusunod ang SSS upang malaman ang halaga ng benepisyo na maaaring tanggaping ng kuwalipikadong miyembro. Ito ay alinsunod itinakda ng Republic Act (RA) 11199 o ang Social Security Act of 2018.

Nakasaad sa Section 12 ng RA 11199, may tatlong kaparaanan sa pagtukoy sa maging buwanang pensiyon ng miyembro. Makikita sa ibaba ang mga kaparaanang ito kasama na ang Php1,000 additional benefit na ipinatupad simula noong Enero 2017 sa lahat ng mga pensiyunado ng SSS, retirement, death o total disability man itobi:

1. PHP300 + 20% ng average monthly salary credit (AMSC) + 2% ng AMSC sa bawat credited year of service (CYS) na labis sa 10 taon + PHP1,000

2. 40% ng AMSC + PHP1,000

3. Kung ang CYS ng miyembro ay sa mula 10 hanggang 19 na taon, PHP1,200 + PHP1,000

Kung ang CYS ng miyembro ay mula 20 taon pataas, PHP2,400 + PHP1,000

Samantala, ang may pinakamataas na halaga sa tatlong ito ang siyang ibinibigay na pensiyon sa isang miyembro o benepisaryo. Narito ang halimbawa ng isang miyembro ng SSS na mag-reretiro:

CYS

Credited Years of Service (CYS): 16.083

(bilang ng taon na may hulog ang miyembro)

AMSC

Average Monthly Salary Credit (AMSC): PHP6,401.670

(average ng salary levels kung saan ibinase ang mga kontribusyon sa loob ng huling limang taon bago ang pagreretiro ng miyembro)

Unang Paraan

PHP300 + (20% ng AMSC) + (CYS ­ 10) × (2% ng AMSC) + PHP1,000

300 + 1,280.334 + (16.083 ­ 10) × (2% ng 6,401.670) + 1,000

300 + 1,280.334 + (6.083) × (128.0334) + 1,000

1,580.334 + 778.8271722 + 1,000

PHP3,356.16

Ikalawang Paraan

40% ng AMSC + PHP1,000

40% x 6,401.670 + 1,000

PHP3,560.67

Ikatlong Paraan

PHP1,200 + PHP1,000

PHP2,200

Sa tatlong paraang ito, ang may pinakamataas na halaga ng inyong pensiyon ay batay sa ikalawang paraan o PHP3,560.67. Ito ang halaga ng pensiyon na matatanggap ng miyembro o benepisaryo bawat buwan, kung kaya’t ito ang ibibigay ng SSS. Noong Enero 2017, nagpatupad ang SSS ng P1,000 additional benefit sa pensyon kaya ang magiging halaga ng pensiyon ay P3,560.67.

Habang tumataas ang inihuhulog ng miyembro at humahaba ang paghuhulog nito ay tumataas din ang halaga ng pensiyon na maaari niyang matanggap sa kanyang pagreretiro. Ngunit kailangan nating isipin na bukod sa SSS pension, kinakailangang ang miyembro ay may sariling ipon din dahil ayon sa mandato ng SSS, ang SSS pension ay suporta lamang. Sa panahon ng ating kalakasan at pagkita ng pera mula sa ating mga hanapbuhay, kinakailangan tayong matutong magsubi para sa kinabukasan natin at ng ating pamilya.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.