Paalala sa mga employers, tiyaking bahagi ng PESONet ang bangko para iwas-hassle

@Buti na lang may SSS | October 18, 2020

Dear SSS,

Magandang araw! Ako ay negosyante sa Pasig City at mayroong 20 empleyado. Dahil sa kasalukuyang sitwasyon natin, nais kong itanong kung mayroon bang pamamaraan na makapag-remit ako ng kontribusyon ng aking mga empleyado na hindi ko na kinakailangang magtungo sa sangay ng SSS o sa bangko? – Sergio

Sagot

Mabuting balita, Ginoong Sergio! Pinalawak ng SSS ang mga kaparaanan upang magkapag-remit ng kontribusyon ang mga regular at household employer. Bahagi ng kampanyang ExpreSSS, maaari mo nang bayaran ang kontribusyon ng iyong mga empleyado gamit ang iba’t ibang online payment channels. Subalit, dapat nakarehistro ka sa My.SSS upang makakuha ka ng Payment Reference Number (PRN) na gagamitin mo sa pagre-remit ng kontribusyon gamit ang alinmang online payment facilities.

Maaaring mag-remit ng kontribusyon ang mga regular at household employer sa pamamagitan ng internet banking services ng mga bangko tulad ng DigiBanker ng Security Bank Corporation at UnionBank Online ng UnionBank of the Philippines.

Maaari ring mag-remit ng kontribusyon gamit ang Bizlink ng Bank of the Philippine Islands. Subalit, ito ay available lamang para sa mga regular employer.

Dagdag pa dito, tumatanggap din ng online payments ng mga employer ang mga bangkong kabilang sa eGov BancNet gaya ng Asia United Bank, Bank of Commerce, China Bank, CTBC Bank, Metropolitan Bank and Trust Company, MUFG Bank, Philippine Bank of Communications, Philippine National Bank, Rizal Commercial Banking Corporation, Robinsons Bank, Standard Chartered Bank, at United Coconut Planters Bank.

Kinakailangan na mayroong existing na account ang employer upang magamit ang online facility ng mga nabanggit na bangko sa pagbabayad ng kontribusyon.

Pinaaalalahanan namin ang mga employers na tiyaking ang kanilang bangko ay bahagi ng Philippine Electronic Fund Transfer System and Operations Network (PESONet). Makikita nila ang talaan ng mga PESONet participating banks sa website ng Bangko Sentral ng Pilipinas, https://bit.ly/33ZLWO2. At kung nasa listahan ang kanilang bangko, ipinapayo namin na i-enroll nila ang kanilang bank account sa Disbursement Account Enrollment Module (DAEM) na matatagpuan sa My.SSS upang dito na ipapasok ang kanilang reimbursement mula sa SSS.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Ngayong Nobyembre dapat mailipat na sa PESONet participating bank..

ang savings account ng mga pensiyunado

@Buti na lang may SSS | October 11, 2020

Dear SSS,

Ako ay SSS pensioner. Totoo bang kinakailangang ilipat ko ang aking savings account sa PESONet participating bank? – Julio

Sagot

Kinakailangang tiyakin ng mga pensiyunado na ang bangko kung saan idinedeposito ang kanilang pensiyon ay kasama sa mga bangko na nasa ilalim ng Philippine Electronic Fund Transfer System and Operations Network (PESONet).

Maaari kayong magtungo sa website ng Bangko Sentral ng Pilipinas upang makita ang kompletong listahan, https://bit.ly/33ZLWO2. Kung bahagi na ng PESONet ang bangko ninyo, hindi na kailangang ilipat ang inyong savings account para sa inyong pensiyon.

Gayundin, kung kayo ay tumatanggap ng pensiyon sa pamamagitan ng mga bangkong nakalista sa ibaba, hindi na rin ninyo kailangan magpalit ng bangko. Sa kasalukuyan, inaasikaso na nila na maging bahagi sila ng PESONet.

• Bangko Mabuhay (A Rural Bank), Inc.

• Bangko Nuestra Señora Del Pilar

• Cantilan Bank, Inc. (A Rural Bank)

• Cooperative Bank of Quezon Province

• Guagua Rural Bank

• Money Mall Rural Bank, Inc.

• Queen City Development Bank

• Rural Bank of Digos, Inc.

• Rural Bank of La Paz

• Rural Bank of Porac (Angeles City)

• Rural Bank of Rosario (La Union), Inc.

• Rural Bank of Sta. Ignacia

Kung ang bangko ninyo ay wala sa listahan ng PESONet participating banks na nasa BSP website o sa mga bangkong na nasa itaas, binibigyan kayo ng SSS ng hanggang Oktubre 31, 2020 upang ilipat ang inyong savings account sa alinmang PESONet participating banks.

Maliban sa PESONet participating banks, maaari rin ninyong piliin ang alinmang remittance transfer companies (RTCs)/cash payout outlets (CPOs) na accredited ng Development Bank of the Philippines (DBP) para tanggapin ang inyong pensiyon. Dagdag pa dito, maaari kayong tumanggap ng pensiyon gamit ang e-wallet gaya ng PayMaya o kunin ito nang personal sa pamamagitan ng DBP Cash Padala sa M Lhuillier.

Pinapayuhan din namin ang mga pensiyunadong i-enroll ang kanilang savings account o ang kanilang mobile number para sa e-wallet at RTC/CPO sa My.SSS na matatagpuan sa SSS website (www.sss.gov.ph). Kinakailangan lang na mag-log in sila sa kanilang My.SSS account. Magtungo kayo sa “E-SERVICES” tab at i-click ang “Disbursement Account Enrollment Module.”

Nilalayon ng SSS na tuluyan nang iwan ang pag-iisyu ng tseke para sa pagbibigay ng buwanang pensiyon. Sa kasalukuyang pamamaraan, nag-iisyu ng tseke ang SSS na siyang idinedeposito sa savings account ng mga pensiyunado. Dahil dito, nakipag-partner ang SSS sa DBP upang maging checkless na ang pagbibigay ng pensyon. Simula ngayong buwan ang pagbibigay ng pensyon sa pamamagitan na ng DBP na siyang magre-release nito sa mga PESONet participating banks at mga accredited na RTC/CPO.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

SSS Pension Loan Program para sa mga senior citizen members, online na!

@Buti na lang may SSS | October 4, 2020

Dear SSS,

Magandang araw! Ako ay SSS pensioner, at nais kong malaman kung paano mag-apply ng Pension Loan Program gayung hindi maaaring lumabas ang mga nakatatanda? – Jose

Sagot

Mabuting balita, Jose! Lalong pinahusay pa ng SSS ang Pension Loan Program (PLP). Mula Setyembre 15, 2020, maaari nang mag-file ng loan application ang mga kuwalipikadong SSS retiree-pensioner sa pamamagitan ng My.SSS.

Ninanais ng SSS na manatiling ligtas sa lumalaganap na sakit ang mga pensiyunado nito. Dahil dito, sinikap ng ahensiya na gawing online na ang aplikasyon sa nasabing pautang sa mga pensiyunado.

Upang magamit ang pasilidad na ito, kinakailangan na ikaw ay nakarehistro sa My.SSS na matatagpuan sa SSS website, www.sss.gov.ph. Dapat din na ikaw ay mayroon aktibong mobile number at SSS UMID-ATM o di kaya’y SSS-UnionBank Quick Card.

Kung natugunan mo ang mga kondisyong ito, maaari ka nang mag-file ng PLP gamit ang My.SSS. Kinakailangan lang na mag-log in sa iyong My.SSS account at magtungo ka sa E-Services tab kung saan makikita mo ang “Apply for Pension Loan.” I-click mo ito upang simulan ang iyong aplikasyon. Sunod, piliin mo ang halaga ng iyong uutangin at kung gaano mo ito katagal babayaran at i-click mo ang “I agree to the terms and conditions of the program.”

Maaaring i-download o i-print ang kopya ng Disclosure Statement. Makatatanggap ka ng kumpirmasyon sa pamamagitan ng email patungkol sa iyong aplikasyon.

Papasok ang halaga ng iyong inutang sa iyong SSS UMID-ATM o SSS-UnionBank Quick Card. Sa kasalukuyan, makahihiram ka ng hanggang P200,000 bilang maximum loanable amount na maaaring bayaran hanggang 24 months o dalawang (2) taon.

Nanatili pa rin ang mga kondisyon na dapat matugunan ng mga nagnanais mag-apply sa PLP tulad ng:

• Hindi dapat hihigit sa 85 taong gulang sa katapusan ng termino ng pautang;

• Walang ibinabawas sa kaniyang buwanang pensyon, gaya ng natitirang balanse sa ibang pautang ng SSS o kaya’y sobrang benepisyong binayaran ng SSS;

• Walang utang sa ilalim ng SSS Calamity Assistance Package; at

• Tumatanggap na ng regular na pensiyon na hindi bababa sa isang (1) buwan.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa aming Twitter account sa @PHLSSS. Maaari ding mag-subscribe sa aming YouTube channel sa “Philippine Social Security System.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.