Obligasyon ng employer na magparehistro sa SSS at i-report ang manggagawa

@Buti na lang may SSS | March 7, 2021

Dear SSS,

Kamakailan ay nagbukas ako ng maliit na trading company. Dahil bago pa lamang ay dalawa lang muna ang aking empleyado. Gusto ko sanang itanong kung kailangan pa bang ipa-register sa SSS ang company kahit dalawa lamang ang aking empleyado? At ano ba ang requirements? – Lolita

Sagot

Sa Republic Act No. 11199 o ang Social Security Act of 2018, obligado ang may-ari ng kumpanya na magparehistro sa SSS bilang employer sa pamamagitan ng pagsumite ng SS Form R-1 o ang Employer Registration Form sa pinakamalapit na sangay ng SSS. Gayundin, itinatakda ng batas na dapat i-report ng employer ang lahat ng kanyang empleyado sa SSS sa pamamagitan ng pagsumite ng SS Form R-1A o ang Employment Report.

Maliban sa SS Form R-1 at SS Form R-1A, kinakailangan din i-sumite ang kopya ng dokumento na magpapatunay na awtorisado kayong magpatakbo ng negosyo tulad ng Registration of Business Name, Business Permit, o anumang katunayan mula sa ahensiya ng pamahalaan na nakasasakop sa uri ng inyong negosyo.

Sa ngayon, hinihikayat ka naming na magrehistro gamit ang My.SSS na matatagpuan sa aming website, www.sss.gov.ph. Magtungo sa aming website at i-click mo ang “Employer.” Dadalhin ka nito sa employer login portal. Makikita mo sa ilalim ng “Not yet registered in My.SSS?” ang “Regular Employer,” “Household Employer” at “Coverage & Collection Partner.” I-click mo ang “Regular Employer” dahil ito ang klasipikasyon mo bilang employer. Dadalhin ka nito sa “Online Employer User ID Registration.” Punan mo ang lahat ng kinakailangang impormasyon at magpapadala ang SSS sa iyong inirehistrong e-mail address ng link upang magamit mo na ang iyong account.

Maaari ka ring magrehistro sa SSS gamit ang Central Business Portal (CBP) na matatagpuna sa https://business.gov.ph/. Inilunsad ito kamakailan ng pamahalaan upang mapadali at mapabilis ang employer registration at pagsusumite ng inisyal na listahan ng manggagawa.

Ito ay one-stop shop website na kung saan maaari mong matagpuan ang unified application form ng mga ahensiyang may kaugnayan sa pagrerehistro ng negosyo gaya ng Social Security System, Securities and Exchange Commission, Bureau of Internal Revenue, Philippine Health Insurance Corporation (PhilHealth) at Pag-IBIG Fund.

Sa ngayon, ang mga kumpanya na may isa hanggang limang manggagawa ay maaaring gamitin ang CBP para kumuha ng employer registration number mula sa SSS, PhilHealth at Pag-IBIG Fund.

Maaari mo ring gamitin ang portal para i-report ang iyong mga empleyado sa SSS, PhilHealth at Pag-IBIG Fund gamit ang Unified Employee Reporting Module nito.

Nais din naming ipaalala na mula sa unang araw na kumuha kayo ng tauhan para sa iyong negosyo, kinakailangang magparehistro kayo sa SSS bilang isang employer. At mula sa petsa na nagsimulang magtrabaho sa inyo ang dalawa ninyong empleyado, kinakailangang mai-report ninyo sila sa SSS sa loob 30 araw.

Obligasyon din ninyo bilang employer na ibawas mula sa sahod ng inyong empleyado ang employee share sa buwanang kontribusyon nito at i-remit ito nang buo kasama ang employer share sa SSS ayon sa itinakdang schedule.

Mula nitong Enero, 13% na ang contribution rate sa SSS mula sa dating 12%. At ang kasalukuyang hulog sa SSS ay mula kaya ang hulog P390 hanggang P2, 600 kada buwan, depende sa buwanang kita ng manggagawa. Hati ang employer at manggagawa sa pagbabayad ng SSS contribution kung saan 8.5% ang employer share at 4.5% naman ang sagot ng manggagawa.

Halimbawa, kung P390 kada buwan ang hulog ng iyong manggagawa, sagot mo ang P255 at P135 naman ang sagot ng iyong manggagawa. Kung P2, 600 kada buwan naman ang hulog ng iyong tauhan, sa iyo magmumula ang P1, 600 nito habang P900 naman ang bahagi ng iyong tauhan.

Sa ilalim din ng batas, may kaukulang parusa sa employer na hindi nagrere-remit ng buwanang kontribusyon sa SSS at Employee’s Compensation (EC) ng kanyang empleyado. Ang sinumang employer na hindi nagre-remit sa SSS ay pagmumultahin ng mula P5, 000 hanggang P20, 000 at maaaring makulong ng anim na taon hanggang 12 taon.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Mahalagang mag-enroll sa Disbursement Account Enrollment Module para sa pagtanggap ng benepisyo

at pautang

@Buti na lang may SSS | February 28, 2021

Dear SSS,

Magandang araw! Nais kong malaman kung ano ang tinatawag na Disbursement Account Enrollment Module ng SSS? Bakit ito mahalaga para sa mga miyembro at paano mag-enroll dito? – Sally ng Davao City

Sagot

Nakita ng SSS na malaking hamon ang pagre-release ng benepisyo at pautang gamit ang nakagawiang pagpapadala ng tseke sa pamamagitan ng koreo. Dahil dito, naglatag ang SSS ng mga pamamaraan upang mapabilis ang pagre-release ng benepisyo at pautang sa mga miyembro. Gayundin, matiyak namin ang kaligtasan ng miyembro lalo na ngayong may pandemya. Mula ng nakaraang taon, ipinatupad ng SSS ang alternatibong pagbabayad ng benepisyo o pautang sa mga miyembro ang tinatawag na SSS Bank Enrollment Module.

Sa pamamagitan nito, diresto nang papasok sa in-enroll mong account ang anumang benepisyo o pautang mula sa SSS. Maaaring i-enroll sa DAEM ang sumusunod: Bank account na nasa mga bangkong kabilang sa Philippine Electronic Fund Transfer System and Operations Network (PESONet) electronic wallet tulad ng GCash o PayMaya remittance transfer companies (RTCs)/cash payout outlets (CPOs).

Mahalaga ito dahil hindi na kailangang magtungo sa bangko upang i-encash o ideposito ang tseke ng tinatanggap mong benepisyo o pautang mula sa SSS.

Bago makapag-enroll sa DAEM, dapat tiyaking mayroon ng account sa My.SSS. Kung wala pa, maaaring magtungo sa website at i-click ang “Member.” Dadalhin ka nito sa member login portal at i-click ang “Not yet registered in My.SSS?” upang magrehistro dito. Punan ang lahat ng kinakailangang impormasyon at magpapadala ang SSS sa iyong inirehistrong e-mail address ng link upang magamit na ang account.

Dahil mayroon ng My.SSS account, maaari ng mag-enroll sa DAEM. Una, mag-login sa My.SSS account. Makikita ang DAEM sa E-Services Tab at i-click mo ito. Basahing mabuti ang mga paalala. I-click ang box ng “I certify that I have read and understood the foregoing reminders on account enrollment,” at sunod i-click mo ang “Proceed.”

Lilitaw sa screen ang enrollment option na maaari mong pagpilian tulad ng bangko, e-wallet, o RTC/CPO. Kung bangko ang pinili, kailangan mong ilagay ang iyong bank account number. Kung e-wallet o RTC/CPO, kinakailangan mo namang ilagay ang iyong mobile number na naka-link sa e-wallet o RTC/CPO.

Kapag nakapili na, i-click ang “Select Document Type.” Sa bahaging ito, dapat kang mag-attach ng dokumento o katunayan ng in-enroll mong account. Maaaring i-upload ang alinman sa sumusunod: kopya ng iyong ATM card na makikita ang account number at pangalan mo, bank certificate o statement kung naiisyu ito bago ang taong 2019, foreign remittance receipt, passbook, screenshot ng iyong online o mobile banking account, validated deposit slip, o screenshot ng iyong mobile app account para sa e-wallet.

Tiyaking malinaw ang kuha o pagkaka-scan ng dokumento. Dapat ding nababasa ang impormasyon na nakalimbag dito. Maaaring magsagawa ng karagdagang beripikasyon ang SSS upang matiyak na ikaw ang may-ari ng in-enroll mong account.

Sunod, i-click ang box ng “I agree that the information…” Tapos, i-click ang “Enroll Disbursement Account.” Magpapadala ang SSS ng magkahiwalay na mensahe sa iyong e-mail address na natanggap na ang iyong account enrollment at ang status o resulta ng iyong enrollment.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Pag-a-apply ng salary loan sa SSS, mas pinadali gamit ang mobile app

@Buti na lang may SSS | February 21, 2021

Dear SSS,

Nais ko sanang mag-apply ng salary loan sa SSS. Paano mag-apply ng salary loan gamit ang SSS Mobile app? – Tyra ng Malolos City

Sagot

Ang SSS salary loan ay maituturing na pinakapopular na programa ng SSS. Maraming miyembro ang ginagamit ang pautang na ito upang matugunan ang kanilang dagliang pangangailangang pinansiyal. Sa ngayon ay online na ang aplikasyon ng salary loan dahil na rin sa kasalukuyang nararanasang pandemya. Sa katunayan, marami sa ating mga miyembro ang nakapag-apply na ng salary loan gamit ang kanilang My.SSS account na nasa SSS website.

Kung mayroong smartphone, maaari ring makapag-apply ng salary loan gamit ang SSS Mobile App. Bahagi ito ng digital transformation ng SSS kung saan ang mga pangunahing serbisyo nito ay inililipat na sa online upang mapabilis, mapadali at mapaginhawa ang anumang transaksiyon ng mga miyembro.

Upang magamit ang SSS Mobile App, kinakailangan na naka-install ito sa iyong smartphone. Kung wala ka pa ng nasabing app, magtungo ka lang sa App Store, Play Store o Huawei App Gallery upang i-download ito nang libre.

Kasunod nito mag-login gamit ang existing na My.SSS username at password. Matapos nito ay i-tap mo ang “My Loans” at i-tap mo ang “Apply For Salary Loan.” Makikita mo rito kung magkano ang halaga na maaari mong utangin. Makikita mo rin ang Payment Mode o kung paano matatanggap ang utang. Kinakailangan na naka-enroll ang bank account sa SSS Disbursement Account Enrolment Module sapagkat dito na papasok ang inutang.

Sunod, i-click ang “I agree to the Terms of Service” at “Accept.” Pagkatapos nito, i-click ang “Proceed” o “Cancel” kung hindi mo nais ipagpatuloy ang aplikasyon. Ipapakita sa screen ang Disclosure Statement ng iyong salary loan at maaari mo itong mai-download bilang PDF file sa pamamagitan ng pag-click sa “Download.” Kapag may kopya ka na ng iyong Disclosure Statement, i-click mo na ang “Submit.” Kung ikaw ay empleyado, makatatanggap ang iyong employer ng notice sa kanyang registered e-mail address na kinakailangang i-certify ang iyong salary loan application gamit ang kanyang SSS web account para ito ay maaprubahan.

Makatatanggap ng notification sa email na successful ang loan application. Kapag naaprubahan na ang loan application, makatatanggap ng abiso mula sa SSS sa pamamagitan ng SMS o text message. Ang text message ay naglalaman ng petsa ng aplikasyon, halaga ng nais mautang, petsa kung kailan ito naaprubahan at halaga ng loan na papasok sa account. Dahil dito, mahalagang updated ang iyong email address at mobile number sa My.SSS.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.